Din-a gyud kapugngan ang kasikat sa batang aktor sa GMA-7 nga si Buboy, kansang character bag-o lang namatay sa Dyesebel. Nagbunga gyud ang hinaguan sa nuybe anyos nga si Buboy o Noame Villar sa tinuod nga kinabuhi, tungod kay nakapamalit na siya og kabtangan diin duna na siya’y balay ug duha ka mga sakyanan nga Hi Ace van ug Nissan nga bisan second hand lang pero fully paid na. Ang igsuon niya nga 21 anyos gitagaan niya og puhunan para mamaligya og CD ug DVD, ug iyang giklaro nga dili kini pirated. Ang 19 anyos niya igsuon maoy nagsilbi niya nga personal assistant. Samtang ang iyang amahan maoy nag-atiman sa gamay nila nga negosyo nga karenderia. Samtang ang iyang inahan maoy kuyog-kuyog sa iyang mga lakaw. Duna napud siya’y personal driver nga iyang sinisuweldohan.
Samtang lakip si Buboy sa cast sa Obra diin makauabn siya ni Sunshine Dizon nga maoy bida. Naa pud siya sa La Lola ni Rhian Ramos. Laing proyekto sa bata, mao ang pelikulang Iskul Bukol diin siya maoy modala nga anak ni Vic Sotto.
Kahinumduman nga si Buboy ang grand champion sa Little Big Super Star sa little edition diin gipilde niya si Makisig Morales. Apil siya sa Callalily, una pa siya mibalhin sa GMA-7. Mga kanta sa Aiges ang iyang tirada.