Emilio tsinika ni Bill Pullman

Maggi-guest sa Showbiz Central mamaya si Antoinette Taus at maganda kung sa kanya na itanong kung totoong kinuha niyang manager si Perry Lansigan, ang manager ni Dingdong Dantes habang nandito siya.

Si Dingdong mismo ang nagsabi nito sa amin, pero nagbibiro lang daw siya. Kung ganu’n, bakit si Perry ang kinausap ng staff ng Dear Friend nang kunin si Antoinette para sa Victor at Mimay episode ng Sunday drama series?

Siguro nga nagkamali si Dingdong at sa halip na booking agent ay manager ang nasabi, the point is, ang manager pa rin niya ang kinausap sa guesting nito sa Dear Friend. Hindi kami magugulat kung si Perry din ang kinausap ng mga taga-Showbiz Central sa guesting ni Toni mamayang hapon.

* * *

Si Mark Anthony Fernandez ang hiningi ni Sunshine Dizon sa staff ng Obra na makapareha sa Sapi episode ng drama anthology at kung saan, gaganap silang mag-asawa. Si Topel Lee ang director din nila sa Sundo ng GMA Films.

Reunion nina Sunshine at Mark na unang nagkasama sa Impostora ang Sapi at masusundan ang kanilang pagsasama sa Victor at Mimay episode ng Dear Friend to be aired on October 12, with Antoinette Taus.

Si Chynna Ortaleza ang gaganap na girlfriend ni Sunshine sa Butch episode na ang anak ay kanyang inalagaan. Joel Lamangan directs this episode. Si Jay Manalo ang hunk na love interest ni Sunshine sa Rosa Negrita episode sa direksyon ni Jun Lana. Ang Drama Queen episode sa direksyon ni Maryo J. delos Reyes ang magbubukas sa four weeks stint ni Sunshine sa Obra na magsisimula sa October 9.

Posible kaya ang nabanggit ni Sunshine na baka si Dingdong Dantes ang maging leading man nila ni Iza Calzado sa remake ng All About Eve? Gagawin kasi ng actor ang remake ng Ang Babaing Hinugot Sa Aking Tadyang with Marian Rivera. Maganda sana kung ang actor nga ang gaganap sa role ni Kenneth Yoon na ginampanan ni Jang Dong-gun.

Samantala, ipinakita ni Sunshine ang fresh marks sa kanyang left arm nang ginawang Vaser Lipo Selection ni Dr. Manny Calayan noong September 25. Two liters ng fats sa braso, likod at tiyan niya ang nakuha sa two hours process at sa pinagdaanan, ayaw na raw niyang tumaba.

* * *

Lalong hindi makakalimutan ni Emilio Garcia ang Selda dahil ang pelikula ang nagpanalo sa kanyang best supporting actor sa Urian. Malaki na ang pasasalamat niya sa pelikula dahil pinalakpakan siya nang ipalabas sa Montreal World Film Festival at ang movie rin ang naging way para makilala siya ng foreign actor na si Bill Pullman.

Kuwento ni Emilio: “Sino naman ang hindi matutuwa sa sinabi niyang it’s an honor to meet you and you’re a great actor. Sabi rin niya, watch out for this guy. Nag-usap kami about the Philippines dahil nakapunta siya rito sa shooting ng Brokedown Palace. Ang sarap pakinggan na tinawag niya ako sa first name ko tuwing magkikita kami.”

Sunod na mapapanood si Emilio sa digi film na Walang Kawala (No Way Out) sa direksyon ni Joel Lamangan at showing sa November 12. Gagampanan niya ang role ng abusive cop na si Rufo at husband ni Jean Garcia. Tiniyak nitong kamumuhian siya ng moviegoers sa pelikula dahil sa ginawa niya kay Jean at kina Joseph Bitangcol at Polo Ravales.