Isip pagsaulog sa ilang ika- siyam nga anibersaryo sa industriya mipagawas na ang sikat na kaayo nga grupong Sugarfree sa ilang bag-ong album, ang SUGARFREE LIVE! with The Manila Symphony Orchestra. Ang album nagtangag sa mga panghitabo sa ilang malampuson nga concert sa milabay nga tuig.
Ang Sugarfree gilangkuban sa mga inila na kaayo nga sila si Ebe Dancel (lead vocals and guitar), Jal Taguibao (bass and back-up vocals) ug Kaka Quisumbing (drums).
Ang nahisgutang grupo maoy nagpasikat sa mga kantang Hari Ng Sablay, Mariposa, Kwarto, Wag Ka Nang Umiyak, Dear Kuya ug uban pa ug ubos kini sa EMI Philippines.
Gipaniguro usab sa Sugarfree nga magpadayon gyud ang ilang paghatag og mga makalingaw ug makapatandog nga mga kanta ngadto sa publiko. Kahinumduman nga naglangkob sa nagmalampuson nila nga mga album niadto ang Sa Wakas (2003), Dramachine (2004) ug Tala-Arawan (2006).
Apil sa bag-o nila nga album karon nga SUGARFREE LIVE! ang ilang sikat nga single nga PUGAD diin makita usab ang mga eksena sa pag-shoot sa maong video. Ang album nagkantidad og P299 nga mapalit na karon sa mga nag-unang record bar sa nasud sama sa Music One, Odyssey, Astroplus ug uban pa.
Pwes duha ka disc ang nasukip sa Sugarfree Live—1 and 2. Sa unang disc naa ang Overture, Prom, Hari Ng Sablay, Kwentuhan, Kwarto, Telepono, Kung Ayaw Mo Na Sa Akin, Still Fighting It, Tulog Na ug Mariposa. Samtang sa disc 2 naa ang mga kanta nga Huling Gabi, Unang Araw Wag Ka Nang Umiyak, Kailan Ka Ba?, Ikaw Pala, Burnout, Makita Kang Muli, Batang-Bata Ka Pa ug Dear Kuya.