Gihugyaw ni Katrina Halili

Nahugyaw gyod ang siyudad sa Sugbo atol sa pagbisita sa Olive-C goddess ug two-time FHM sexiest nga si Katrina Halili, hilabi na sa iyang sexy nga pagrampa sa lingerie fashion show nga “Katrina Xposed: A Sexy September Affair” niadtong September 20, 2008.

Ang dul-an sa tulo ka oras nga pasundayag sa Teatro Casino sa Pagcor-Cebu Waterfront Hotel and Casino Lahug, Cebu City nagpasiatab usab sa mga grandyusong lingerie collections sa walo ka mga bangiitang fashion designers, gawas pa sa Playmates collection ni Katrina.

Ang nahisgutang collections naglangkob sa Indian Kamasutra ni Danny Booc nga nagpatilaw sa buhong nga kultura sa mga Indian; Acapulco Collection ni Leonardo Igloria kinsa nagpresentar sa Southern-American culture; Red Light ni Lemuel Rosos diin gipakita ang pakigbugno sa mga Pilipinong kabataan batok sa mga kakuyaw sa katilingban; Gregorian Vampires ni Bernardo Flores nga mipakita sa kalantip sa imahenasyon diha sa karaang istorya mahitungod sa legendary folkloric nga mga binuhat; ug Wild Fantasies ni Edwin Bayaton nga mipakita sa gitawag og human’s ordeal with personal orgy.

Giwagayway usab atol sa maong mabulukong okasyon ang Contemporary Collections ni Edwin Alba nga tinong dili usab maitsapwera; Male Strip Walkers ni Brendon Val Cenon nga mipalutaw sa kamadanihon sa mga kaliwat ni Adan; ug dili paulahi ang most controversial Filipino Story ni Manuel Tumaque diin dili tuyo nga kutawon ang konserbatibong panglantaw sa mga Sugbuanon.

Nadani usab sa mga Manila ug Cebuano models ang mga manan-away pinaagi sa metikuluso nilang pagdala sa nagkadaiyang lingerie masterpieces nga may igong pagsalig sa kaugalingong katakos nga maoy nakapahimo sa pasundayag nga angay pagasaulugon.

Apan ang mas labing gikagubtan sa show mao ang seksing Psalmstre endorser nga si Katrina Halili kinsa mihatag og usa ka hugyaw nga numero kauban ang Cebu Simple Squad Dancers. Nakadawat usab ang sunod nga Miss X sa usa ka standing ovation gikan sa bagang duot sa mga sumasaksi niadtong gabhiona. Dayag ang mga syagit nga “more” gikan sa mga kalalakin-an alang sa iyang sexy catwalks.

Tungod sa makabungog nga kalamposan, si Psalmstre CEO Jim Acosta mibungat sa plano nga ang maong pasundayag pagasundan.