Ngilngig na ang mga celebrities karon tungod kay kung sauna ang mga artista ang mohatag og regalo ngadto sa ilang mga fans, karon ang mga fans na mismo ang mopadala og mga gift ngadto sa ilang mga idol sa showbiz. Ug mga mahalon pa gyud ang maong mga regalo nga madawat sa mga artista bisan ang mga nahisgutang mga fans tua nanimuyo sa abroad. Parehas sa Pinoy Dream Academy Grand Star Dreamer nga si Laarni Lozada diin nakaani kinig daghang pagdayeg tungod sa gisul-ob niini atol sa gipahigayon nga interview sa movie press kauban ang ubang mga finalists nga sila si Bugoy, Miguel, Lizel, Van ug Cris. Tsika sa PangMasa nga gipangutana sa entertainment press si Laarni kung kinsa nga couturier-designer ang nagpahuwam o naghatag sa maong sinina nga iyang gisul-ob apan igo ra kini miingon og, ‘‘Di po ito bigay sa akin ng any couturier-designer. Imported po ito, ang may bigay, isang fan ko na naka-based sa U.S. Ipinadala niya po sa akin through my surrogate Mom,’’ni Laarni pa. ‘‘Kahit po itong mga accessories na suot ko, galing din po sa fans.’’
Nicole giregaluhan pod sa Yonics
Pwerteng lipaya sa kanhi PBB Teen housemate nga si Nicole Uysiuseng tungod kay matod pa wala kini magdahom sa gihatag nga sorpresa sa ka-loveteam niini nga si Josef Elizalde atol sa pagsaulog sa birthday sa nahisgutan. Nasayran sa PangMasa nga gitawagan gyud ni Josef kansang kauban niini ang ubang mga housemates sa PBB Teen Edition Plus si Nicole atol sa mismong adlaw nga natawhan niini nga kuno paadtuon sila sa Bahay ni Kuya. Gikuha ni Josef si Nicole sa may Guilly’s, usa ka eatery nga duol ra sa ABS-CBN ug sa PBB house ug tungod kay walking distance lang ang gilay-on gikan sa maong eatery, mao nga naglakaw ra sila. Matod pa ni Nicole nga giingnan siya ni Josef nga mohapit una sila niadtong tungora sa Ai Sarap, usa ka restaurant nga gipanag-iya sa komedyante nga si Ai Ai delas Alas. Ug sa dihang misulod na sila sa maong restaurant, nakugang siya kay kalit nga nanggawas ang mga grupo nga gilangkoban sa ilang fans nga misinggit pa kanila og, “Yonics!”(kombinasyon sa Josef ug Nicole). Samtang, na-touch gyud si Nicole kay wala siya magdahom nga himuon kadto ni Josef diin gikunsabo pa niini ang ilang mga fans.
Samtang usa ka Hawaiian party ang gisaulog ni Nicole atol sa debut niini nga gipahigayon sa Mandarin Oriental Suites. Matod pa nga hinatag ni Josef ang mga sinina nga gisul-ob sa young actress atol sa maong party. ‘‘Actually, dalawang dresses ang bigay ni Josef for my birthday,ni Nicole pa ngadto sa PangMasa. Samtang, ang nakapakugang sa tanan kay daghan kaayong mga regalo nga nadawat si Nicole gikan sa ilang mga fans sa Yonics diin naka-based pa ang mga nahisgutan sa abroad. Ug matod pa nagkontakay pa ang maong mga Yonics fans gamit ang yahoo diin nasabutan sa mga nahisgutan nga mag-amotay sila alang sa party ni Nicole. Gikalipay gayud sa young actress ang maong mga suporta nga gihatag sa ilang mga fans ni Josef ngadto kaniya. Apan ang mas gikalipay ni Nicole mao ang pagtambong sa iyang amahan, ‘‘But what made my second party very memorable was the surprise appearance of my Dad (Mike Uysiuseng). All the while, habang kinakausap ko siya sa phone, akala ko nasa Cebu siya. Iyon pala, na sa labas lang siya ng ballroom. I don’t think I can ask for a more memorable debut party,’’ panapos pa niini.