“Bahid” nga dunay kasulbaran

Theater Guild mapisagarbohon sa ilang bag-ong stage play nga nag-ulohan og “Bahid”. Ang nahisgutang duwa sa entablado maghisgot sa pamilya, gugma ug ang pagdawat sa kamatuoran sa sitwasyon sa kinabuhi.

Sugilanon kini nila ni Butch ug Edwin kinsa nahulog ang pagbati ngadto sa usag-usa human sa wala damha nga panagkaila. Silang duha gikan sa mga adunahan ug inila nga mga pamilya sa katilingban . Si Edwin ubos sa higpit nga pagdisiplina sa iyang sundawo nga amahan kinsa dako og ranggo sa organisasyon, hinungdan nga maglisud kini pagdawat sa kamatuoran nga nakigrelasyon ang iyang anak  sa isig ka lalake.

Samtang si Butch inusara nga gibuhi sa iyang inahan busa uhaw kini sa presensiya sa usa ka amahan. Niadtong bata pa ang iyang pangidaron gipalayas ang iyang amahan sa iyang inahan tungod sa pagka-palahubog niini.

Managsama nga dunay suliranan ang duruha gumikan sa gubot nila nga pamilya.Pwes, giunsa man pagsugakod sa ilang relasyon kun sila mismo dunay personal nga kalbaryo?  Ang “Bahid” sinulat sa inila nga si Wilfredo Ma. Guerrero, kinsa giisip nga theater icon tungod sa kadaghan sa iyang mga obra nga gihatagan og kinabuhi diha sa entablado sa sulod ug gawas sa nasud.

Ang director sa nahisgutang stage play mao si Loyd Sato , usa ka anthropology student ug kasamtangang presidente sa University of San Carlos Theatre Guild ug migamit sa pinulungang Tagalog sa istorya.

“When I read the script I was dead-set to mount it, because of the richness of the dialogues, the challenging characters, and the timeliness of the play. I can say that this is Theatre Guild’s most thought provoking play. It is our hope, that at the end of the play, the audience will be moved to a point that they will question their existence and their own personal relationships,” nagkanayon si Sato. Nasayran nga kapin sa 50 ka mga tunghaan gikan sa siyudad ug probinsiya sa Sugbu ang mingsuporta sa maong stage play. Gipasalig usab sa mga sakop sa produksiyon sa Bahid nga limpiyo ug hapsay ang dagan sa ilang dula.

Matawag nga ang “Bahid” maoy anniversary presentation sa USC-TG kinsa magsaulog  sa ilang ika- 33 nga tuig sa pag-produce og mga matulun-anon nga mga stage plays.

Ang nahisgutang stage play langkoban sa nagkadaiyang estudyante sa USC nga nagkalain-lain pod ang kurso ug pipila gyud ka mga bulan nga nag-antos gumikan sa makuti nga rehearsals.

Gidapit sa USC Theatre Guild ang tanan sa pag-aninaw sa “Bahid” karong August 30 ug 31 sa SM Cinema One ug sa September 6, 2008 sa Ayala On Stage.

Alang sa mga pangutana kung asa mapalit ang ticket niini, tawag lang sa 253 1000 local 185.