Dingdong ka-level  na si David Beckham

Nahugyaw ang mga himantayon sa showbiz human sa balita nga napatik sa PEP kagahapon nga usa ug bugtong si Dingdong Dantes lang ang Filipino nga lakip sa  25 Sexiest Men of the World. Kini suma pa sa E! entertainment usa sa mga sikat nga networks sa Hollywood diin aduna kini 88 million subscribers sa  U.S. ug  600 million sa lain-laing dapit  sa kalibutan.

Nasayran nga unang nakigtambayayong ang E! Entertainment sa Unilab—tiggama sa Medicol nga giduso ni Dingdong—ubos sa mando sa executive producer sa nahisgutang estasyon nga si Charlene Sakoda .

Gipaabot nga i-feature si Dingdong sa usa sa mga segments sa E! Entertainment pinaagi sa usa ka interview sa third or fourth quarter niining tuiga.

Nangayo usab ang E! og footages ug photos ni Dingdong nga gikan sa iyang mga  teleserye, pelikula, Bench fashion show ug ang  event sa Cosmo.

“I can assure you that we are only looking to glorify Dingdong Dantes and will only mention him and your footage in a positive light. The show is scheduled to air in the 3rd or 4th quarter of 2008. We do not have a more specific time frame as of yet.” Parte sa suwat nga gipadala sa E! Entertainment ngadto sa Unilab.

Lakip sa makauban ni Dingdong mao ang mga sikat pod nga sportsmen ug celebrities sa laing mga nasud sama nila ni Gilles Marini (France), Kostas Martakhs (Greece), Michael Lewis (Israel), Dan Carter (New Zealand) ug  David Beckham (UK).