Naglibog ang utok sa mga sakop sa entertainment press kang Yasmien Kurdi tungod kay sa presscon para sa Loving You gihimakak niini ang taho nga duna siyay uyab nga flight attendant. Wala pod angkona ni Yas nga daghan ang nangulitawo karon niya. Pagkakaron, walay laing show si Yasmien gawas sa SOP ug mao kini ang hinungdan nga nakadesisyon ang dalaga nga mopadayon sa iyang pagtuon sa sunod semester. Moeskuyla kini sa New Era College ug mokuha sa kurso nga International Studies. Samtang, mikuha usab karon og review classes ang nahisgutang young actress sa Angelicum matag Lunes, Miyerkules ug Biyernes, maong gibalibaran niini ang Gagambino. Matod pa ni Yasmien nga desido gyud siya nga makahuman og eskuyla ug misugyot pa kini nga andam niyang talikdan ang kinabuhi sa showbiz kung makahuman na siya sa iyang kurso karon. Matod usab sa mga himantayon nga ang maong desisyon sa dalaga maoy makahatag og kalipay ngadto sa pamilya niini tungod kay sa sinugdanan pa, supak ang pamilya niini sa iyang pag-arista.
Katrina ug Nadine makauban ni Dennis sa Gagambino
Karong adlawa ang last taping Sa Magdusa Ka nga gibituonan nila ni Dennis Trillo ug Katrina Halili diin matod pa sa nahisgutang aktor nga matagbaw gayud ang mga nagsunod sa maong Sinenobela sa finale niini nga makita karong Agosto 29. Karong hapon, mamatay na si Roland (Gabby Eigenmann) kansang napuno ang kalawasan niini og mga samad dinunggaban ug si Christine (Katrina) ang makit-an nga maoy nagkupot sa kutsilyo nga gigamit sa pagdunggab sa nahisgutan. Si Christine ba ang nagpatay ni Roland? Madungan usab sa maong insidente ang pagkawagtang sa ilang anak ni Rod (Dennis) nga si Jun-jun. Sa ilang bahin, sa dihang gipangutana si Dennis sa PangMasa kalabot sa ilang status karon sa iyang kanhi uyab nga si Carlene Aguilar, misugyot lang kini nga open sila karon sa ilang communication tungod sa ilang anak nga si Calix Andreas. Midugang usab ang aktor nga kung wala siyay trabaho o bisan inig kahuman sa iyang taping kay mohapit gyud siya sa balay ni Carlene aron makita ang ilang anak. Nadala na si Calix matod pa sa pinuy-anan ni Dennis ug sa balay sa parents sa aktor apan wala kini matulog sa ilaha kay mohilak kini kung dili makakita ni Carlene. Karong umaabot nga Septiyembre 22, magsaulog na si Calix sa unang tuig sa adlaw’ng natawhan niini. Samtang gikataho nga sila si Katrina ug Nadine Samonte ang mga leading ladies ni Dennis para sa iyang next project, ang Gagambino. Si Polo Ravales ang main kontrabida. Si Nadine unang nahimong leading lady ni Dennis sa usa sa labing malampuson nga Sinenobela, Kung Mahawi Ang Ulap sa GMA-7. Si Katrina pod sa naghinapos nga Magdusa Ka.
Aga naguol ug nag-ampo para ni Francis
Nag-taping si Aga Muhlach sa iyang sitcom nga That’s My Doc sa dihang nahibaw-an niya ang balita nga dunay sakit nga leukemia si Francis Magalona. Matod niini nga bisan panagsa na lang sila magkakita sa nahisgutan apan iya kining giisip nga usa sa iyang mga giampingan nga higala. Kahinumduman nga nagkauban sila niini sa usa ka pelikulang “Bagets” daghan nang katuigan ang milabay.‘‘I have fond memories of Francis. Sana, makaraos siya sa bagong dagok na ito na dumating sa kanyang buhay. I will pray for him,’’ padayag ni Aga ngadto sa PangMasa. Samtang, sa That’s My Doc, diin padayon hangtod sa last Saturday sa Agosto ang giingong anniversary month mulugwa sila si Makisig Morales, Maja Salvador, Jay-R Siaboc, John Prats ug Shaina Magdayao isip mga guests karong Sabado. Guest usab ang impersonator nga si Vice Ganda.