Mikabat og four takes ang sinagpaay nila ni Regine Velasquez ug Nadine Samonte para sa ilang eksena sa Ako Si Kim Samsoon sa GMA-7. Kini tungod kay matod pa nagpunay og pakatawa si Eugene Dominggo sa ilang taping busa wala malikayi ni Regine nga mokalit lang og buhakhak tungod sa adlibs sa komedyana.
* * *
Gideklara sa mga kriteko nga si Sarah Geronimo na matod pa ang bag-ong Nora Aunor tungod sa kainit sa pagdawat sa mga tawo sa iyang pelikula nga “ A Very Special Love” ubos sa Star Cinema ug Viva Films diin leading man niya si John Lloyd Cruz. Suma pa nga ang kainit sa paghangop nga natagamtam ni Sarah susama gyod sa kang La Aunor kaniadto.
* * *
Daghan ang mi-react sa pamahayag ni Richard Gutierrez kagahapon nga napatik dinhi sa Banat Hugyaw nga matod pa ang mga ngabil ni KC Concepcion maoy labing humok nga lips sa tanan niyang nahawkan. Nangutana ang mga himantayon unsa kahay reaction nila ni Angel Locsin, Anne Curtis, Heart Evangelista ug Marian Rivera kabahin sa gisulti ni Richard? Labaw nang buot masayod ang mga himantayon unsay ikasulti sa ex-girlfriend ni Richard nga si Georgina Wilson?
* * *
Daghan ang nakapangutana kung kahibalo ba kaha si Valeen Montenegro nga hangtud karon naghandom lang gihapon ang iyang kanhi boyfriend ug fellow Star Magic talent nga si Victor Basa nga magkabalik unta sila? Kanhi mag-sweetheart ang duha. Matod ni Victor nga ang ilang relasyon ni Valeen kaniadto usa sa labing halandumon nga hitabo sa iyang kinabuhi.
* * *
Daghan ang nagpaabot sa paglugwa ni Joey de Leon sa Startalk karong hapon tungod kay daghan ang naghinamhinam sa luwatan niini nga pamahayag human siya mi-resign isip kolumnista sa usa ka broadsheet human usab gibirahan o gidaot sa sister tabloid niini ang show sa Eat Bulaga sa US nga matod pa wala mapuno ang venue bisan pa og gipanghatag na lang ang ticket. Naglibog si Joey nganong dunay ingon niana nga intriga nga makita man unta ang tanan sa video nga naghuot ang mitan-aw sa maong show. Gisakitan si Joey tungod kay igsuon ra nga mantalaan sa maong broadsheet ang miunay og bira nila.
* * *
Magsugod na sunod Sabado, August 9, 10 a.m sa GMA-7 ang labing bag-ong magazine show nga giulohan og Ka-blog!. Ang maong show nga pagadumalahon nila ni Andrea Torres, Mico Aytona, Lucky Mark Mercado ug Monica Verallo maghisgot sa tanang butang may labot sa mga batan-on.