Masaya na sana ang lahat pagkatapos makapag-usap nina Angel Locsin at Claudine Barretto noong July 23, at naayos ang kung anuman ang naging problema sa kanilang pagitan. Pero noong July 25, may nabasa o nabalitaan na naman daw si Claudine tungkol sa kanila ni Angel and obviously, hindi nito nagustuhan dahil nasira ang kanyang mood.
Sa taping pa naman daw ng Iisa Pa Lamang nabasa o nabalitaan ni Claudine ang ‘di masabi ng aming source kung ano. Ang nangyari, nagpaalam ang actress na uuwi na at sa ibang araw na lang ipagpapatuloy ang taping.
Six sequences na ang natapos ni Claudine nang masira ang mood, kaya pinayagan na rin siyang maka-uwi. Dahil walang natatago sa showbiz, isa sa mga araw na ito, malalaman din kung anong item sa kanila ni Angel ang hindi nagustuhan ni Claudine, kaya na-pack-up ang taping nito nang nabanggit na drama-teleserye.
* * *
Nadawit si LJ Reyes sa isyu nina Katrina Halili at Alyssa Alano laban kay Riza Santos, dahil lumabas na pati siya’y inisnab din ng huli. Pero sabi ni LJ, hindi siya tinarayan nang magkita sila sa C.R. ng World Trade Center, hindi lang sila nagbatian, dahil hindi sila magkakilala.
Kahit hindi involved, tinanggap na rin ni LJ ang pag-o-offer ng friendship ni Riza at sabi nito, “it’s always nice to gain a new friend.” Next time na sila’y magkita, generous na siguro sila sa kanilang mga ngiti at mas maganda kung may kasamang “hi” and “hello.”
Samantala, featured sa Dear Friend episode mamaya si LJ as the girlfriend ni Mark Herras na first time gaganap na bading at makaka-relasyon ni Paolo Contis.
Kasama rin si LJ sa cast ng afternoon soap na Una Kang Naging Akin as the stepsister ng isa sa mga bida. Masaya ang actress na muling maging director si Joel Lamangan na director din niya sa Babangon Ako’t Dudurugin Kita.
Makakasama ni LJ sa Una Kang Naging Akin ang ex niyang si Alfred Vargas, pero walang dapat ikatakot ang boyfriend niya at girlfriend ni Alfred, dahil friends na lang ang turingan nila at masaya sila sa bago nilang relasyon.
* * *
Ilang araw absent sa Wowowee ang sexy newcomer na si RR Enriquez at ang narinig naming rason ay dahil nagkaroon ng infection ang ipinaayos nitong puwet. Ang tsika sa amin, tinuklap uli ang puwet ng dalaga para tingnan kung bakit nagkaroon siya ng infection.
Binanggit sa amin ang clinic kung saan nagpalaki ng puwet si RR, pero hindi namin isinulat at baka may sapat namang rason kung bakit nabulilyaso ang butt enhancement ng dalaga. Wala rin daw balak mag-demanda si RR at ang ipinakiusap lang ay gamutin ang kanyang infection at gandahan ang ayos ng kanyang puwet.
* * *
Bukas, 7:15 pm, pipiliin ang ultimate IT Girl sa The Debutante ng Q-11. After 12 weeks of life-changing tasks and activities, pipiliin na kina Shinina, Kate, Bea, Michelle at Sam ang mananalo sa reality show at mag-uuwi ng maraming prizes.
Ang huling task ng lima ay interbyuhin ang host ng show na si Marc Nelson at si Rovilson Fernandez na host ng Ang Pinaka. Ang judges na kikilatis ng winner ay sina Fortune Ledesma, Abby Arenas-de Leon at Ms. Ping Federis.
Ang mananalo ay tatanggap ng P50,000 cash at marami pang iba.