Naiwan sa Las Vegas si Pauleen Luna dahil may mga kamag-anak siya doon at type niyang samantalahin ang pagbabakasyon sa Amerika.
Nabalitaan ko na umiwas si Pauleen na magpainterbyu kay Lhar Santiago noong magkita sila sa show ng Eat Bulaga sa LA Sports Arena.
Pagsasabihan ko si Pauleen kapag dumating ito na hindi niya dapat ginawa ‘yon dahil kilala ko si Lhar.
Hindi magtatanong si Lhar ng mga isyu na alam niya na ayaw sagutin ng mga artista. Puwede naman na sabihin ni Pauleen na “no comment” siya kung tungkol sa lovelife niya ang itatanong sa kanya.
Reporter din ako kaya alam ko ang na-feel ni Lhar nang iwasan siya ni Pauleen. Kung ako ang nasa lugar niya, tiyak na na-offend din ako.
* * *
Kung natsismis noon na nagpakasal sa Europe sina Ryan Agoncillo at Judy Ann Santos, iba na ang balita ngayon.
Ang tsismis? Nagpakasal daw sa US ang dalawa. Hindi totoo ang tsismis dahil kulang na kulang ang oras nila sa shopping, ang magpakasal pa kaya sa Amerika?
Hindi matitigil ang tsismis na nagpakasal sina Ryan at Juday hangga’t hindi pa sila ikinakasal sa simbahan.
Ganyan sa showbiz. Kapag hindi pa ikinakasal ang mga lover na artista, kinukulit sila kung kailan magpapakasal at kapag kasal na sila, pilit silang pinaghihiwalay.
* * *
Ngayon ang talagang birthday ni Mang Dolphy kaya gusto ko siyang i-greet ng happy birthday.
Eighty years old na si Mang Dolphy pero wala sa itsura niya ang kanyang edad.
Kayo na ang magkaroon ng isang Zsa Zsa Padilla at masayang pamilya.
Natuloy noong Miyerkules ang launch ng libro ng life story ni Mang Dolphy.
Sa mga gustong malaman ang kanyang mga sikreto, mabibili ang libro sa inyong favorite bookstores.
* * *
Nakakaloka ang nabalitaan ko na milyun-milyong piso ang sangkot sa hidwaan ng dalawang kilalang personalidad.
Nasa korte na raw ang kaso pero nakapagtataka na hindi lumalabas sa mga diyaryo ang balita.
Imposibleng hindi pagpistahan ng mga tao ang isyu dahil malaking halaga ng datung ang involved at mga sikat na personality ang starring sa real-life drama.
Maghintay-hintay tayo. Tiyak na sasabog din ang malaking isyu lalupa’t marami na ang nakakaalam sa multi-million peso scandal!