Cueshé, ganado sa pangatlong album
Matapos maging hit albums ang Half Empty, Half Full at Back to Me ay tiyak na matutuwa ang mga fans ng Cueshé dahil nagbabalik ang banda para sa kanilang bagong handog – ang Driven album.
Totoong driven at ganado sila ngayon sa CD nila kasi naglalaman ito ng mga bagong komposisyon na may patok na formula ng tungkol sa pag-ibig tulad ng Drift, Back to You at Minsan. Ang carrier single ay BMD.
Ipinagmamalaki ng banda na may lalim at mas magandang tunog ang Driven at para ito sa mga naniniwala sa kanila. “Nagpapasalamat kami ng sobra sa aming mga fans na sumusuporta at ito ang aming pangako… ang walang tigil na paggawa ng mga kanta,” sabi ni Ruben Caballero, vocalist at gitarista.
Ang iba pang mga miyembro ng Cueshé ay sina Jay Justiniani (vocalist din), Fritz Labrado (bassist), Jovan Mabini (lead guitarist), Jhunjie Dosdos (keyboardist), at Mike Manaloto (drummer). Ang kanilang Driven album ay nasa mga record stores na mula sa BMG.
- Latest
