Emosyonal kaayo ang nahimong pagduaw sa nahibiling tulo ka mga contenders alang sa titulong “American Idol” nga gipakita via QTV11 niadtong nakalabay’ng semana. Hinungdan man gani nga dili gyod nako palabyon kining semanaha nga dili makatuslob sa akong luwag diha sa nagbukalbukal nang kawa sa kinutoban ning maong reality-competition TV show kansang mga hurado gilangkoban nilang record producer Randy Jackson, pop singer and choreographer Paula Abdul ug British music executive Simon Cowell. Ug dili sab gyod nato saypon ang pag-atang kinsa gyod ang takos pagatawgon og “aydol”.
Si Syesha Mercado durong hilak sa dihang nakita, atol sa maong homecoming, ang iyang mga supporters didto sa Sarasota, Florida diin siya usa diay ka aktres tungod kay natuman gyod niya ang iyang pangandoy “TO LIVE HER DREAM”; samtang si David Archuleta nga maoy makig-face off ni David Cook karong gabii alang sa finalé sa 7th season sa AI mipauli sa Murray City, Utah ug pwerte sab nakapatulo sa iyang luha kay dili siya katoo unsa kabaga ang iyang mga magdadayeg – kasagaran mga bata – nga nagpadayag sa ilang hugot nga pagpaluyo sa batan-ong David pinaagi sa mga placards ug t-shirts nga diin nagbuntaog ang “DAVID ARCHULETA: WELCOME TO UR DREAMS”.
Bisan tinoora og klaro na nga kun vocals ug stage prowess ang pagahisgotan, si David Cook ang angay sa titulong “7th American Idol” apan tungod kay lingin man ang kalibotan likayan sa nako ang pagpasiatab nga si Cook gyod ang – hayag pa’s 100 buyas nga bombilya - pagaisipong bag-ong aydol nga kahilera nilang Kelly Clarkson (first American Idol, 2002), Ruben Studdard (2003), Fantasia Barrino (2004), Carrie Underwood (2005), Taylor Hicks (2006) ug Jordin Sparks (2007).
Buot kong mobinbin karon sa una sa iyang istorya kay ang iyang kaagi isip contestant sa AI usa man ka classic example sa panultihong Tinagaw’g nga “kapalaran ko ma’y di ko hanapin, dudulog lalapit kung sadyang akin.”
Ti-aw mo ba’y sa unang hugna sa audition sa American Idol alang ning maong season, dili man diay kini si David Cook ang interesadong maoy sunod hangdon isip “aydol”. Igo ra man diay siya nga mikuyog sa iyang igsoon nga si Andrew, kinsa mao gyoy mikisikisi kay mo-audition nga didto pagahimo-a sa Omaha , sa estado sa Nebraska. Gikuyogan niya ang iyang bro isip paghatag og moral support kay dili baya lalim ang giagian sa tanang nagpa-audition. Libo ka libo ang namasin nga mahiapil sa final 24; gani daghan ang nagmugna sama na lang adtong Pinoy nga si Reynaldo Lapuz aron lang mapansin. Ang uban bisa’g walay angay mamugos gyod nga mokanta’g usab sa pamasin nga mausab ang hunahuna sa mga hurado. Apan sa kametikuloso aning Simon Cowell (unsa pod kahay gama ani niyag siya poy magpasundayag no? Naa ba kaha’y malingaw?), mas nahimong “sayon pa sa kamelyo ang paglusot sa buslot sa dagom.” Tinukmod sab sa kahigayonan nga didto na mismo sa lugar sa gi-awdisyonan, misuway na lang pod si David Cook kay gigalgal naman pod sa iyang mga katropa (kay lagi kamao man siya mogitara ug nindot sab og tingog). Pero lingawlingaw ra gyod kuno tong iyaha! Kumbaga, wala’y seryosohay. Gusto lang niyang makasulay og mga bag-ong kasinatian. Apan ang kanhi bartender sa Blue Springs, Missouri mao naman hinoon ang na-isyuhan og numero ug maoy subject sa magic words sa mga hurado nga “SEE YOU IN HOLLYWOOD”. Ug sa kasamtangan gihuwat na lang ang pagdeklarar pag-usab ni Simon Cowell sa mga pulong “David Cook wins the night!”
Sa iyang pagtikang og balik sa Kansas City, Missouri nahimo sab nga mahinuklogon ang mga gutling kay nahimamat niya’g balik ang iyang kanhi music teacher ug gitunolan niya kini’g usa ka pungpong sa mga bulak isip pasalamat sa tanan niining impluwensya kaniya sa natad sa musika. Ang nakanindot pa gyod kay ang final three contenders gitunolan sab og citation sa mga chief executive sa ilang lugar. Pagkabulahan! Gitagaan gyod sa mga kadagkoan sa ilang dakbayan og dakong importansiya ang ilang mga paningkamot.
Daghan kaayo ang nangandoy apan pipila lamang ang gipili nga angayan sa titulong aydol. Nagsugwak ang naningkamot nga mainila sa nagkadaiyang rason – kasagaran self-fulfillment ug economics. Apan dili tanan may gasa nga makalahutay sa pag-agi sa hagip-ot nga buslot sa dagom. Bisag unsaon sab nato’g wadwad kun ang butang dili angayan nga atong pagahuptan – o dili kita takos magtinil niini - dili gyod motugot ang kahigayonan. Apan tan-awa si David Cook, imbis hinoon igo rang mi-escort, karon gihugonhugon nga kun ang pangagpas sa kadaghanan maoy patumanan – siya na gyod ang ikapitong aydol.
Bitaw sab, kay kun ako la’y pabut-on ug isalibay nang 56 million American votes, tataw na kaayo nga si David Cook maoy mas labing angayan. Kay kun siya ang mag-perform, mora naman ko’g nagsud-ong og professional artist. Mora na siya’g rock icon para nako! Siya sab ang labing consistent sa iyang performances. Dili sama sa akong bet nga si Jason “The Dreadhead” Castro nga inay naabot na noon sa katapusang hugna, mora na ma’g giatake sa kalaay. Sayang sab si rockista Carly Smithson nga unang natagak kay ni Syesha. Para nako mas angayan ang mga rakistang imortal mamahimong aydol kaysa istilo ni Syesha nga Broadway/RnB.
Karong gabhiona magtigi ang magsangay - David versus David ang tonada. Ug kay lagi mobotar pa man ang minilyon ka mga fans nga “nangaungo” sa AI, pwes ugma na ang deklarasyon opisyal sa mananaug, alas 8 a.m., Mayo 22, live ni. Samtang ang replay sa alas 6 p.m. na. O ayaw na mo’g react anang terminong “naungo” kay sa street language ug swardspeak buot ipasabot ana “involved, engaged, engrossed, hooked”.
Mas ngil-ad pa kun ingnong nabuang o nayabag! Balik ni David Cook, nakahinumdum pod ko’s usa ka salida nga diin ang linya sa usa ka aktor nagkanayon: “May mga bagay talaga sa mundo na kahit anong pilit natin hindi mangyayari, at may mga bagay din na kahit hindi pa natin pilitin ay sadyang nagaganap.”
Mao na diha! Kun para imo gyod ang usa ka butang, mahitabo gyod kini kay gipamulong na god diha sa Balaang Kasulatan, sa lumpinid nga giulohan og Ecclesiastes nga “everything has its time and purpose under the heavens!”