2nd Album sa Indephums, gawas na!

Kun makabuak ug makasuya ang ilang unang album nga Rated R, sigurado nga maugdaw ang inyong kasing-kasing sa ilaha karong gipagawas nga self-titled 2nd album Indephums, kay mas bug-at ug mas mature ang mga sulod nga musika niini. Giila ang Indephums, isip usa sa mga nahaunang Bisrock band sa komunidad nga aduna’y kaugalingong tatak sa industriya nga sila lang ug  wa nay  lain  pang naghari sa usa ka happy hardcore instrumental, mao nga dili makatingala nga hinigugma sila bisan pa sa nagkalain-laing genre.

Ang mga astig nga myembro niining bandaha mao ang managsoong Ryan Cuizon (drums/percussions) ug Renan Cuizon (guitars) kauban sa ilang payter nga bokalista nga si Raymond Arsenal ug ang bag-ong bassist nga si Amuel Terariray nga sa pagsulod niya, mao say pagmugna sa Indephums sa ilang ikaduhang album. “Dako kaayo ang natabang ni Amuel sa paglambo sa among musika kay daghan siya’g suggestions ug magkasinabot mi permi sa music maong ni level-up ang among pagpanokar karon”, paambit ni Ray. Kun dili kuno tungod niya dili kuno mausab ang ilang musika.

Matod pa nila nga mao ni nga album ang mag-reflect og unsa gayud nga kind sa music ang ilahang hilig, murag maingon nga mao nani ang ilang identity as a band. Satisfied sila as Indephums kay na-express na nila ang musika nga ilaha gayod nga pinitik sa way duha-duha. “Ganahan kaayo mi sa mga tokar, mas more on shagit ug headbanging sounds with experimental ug mas kuti nga pagkahimo,” ni Ryan pa.

Kini ilang 2nd album adunay 10 ka tracks kauban sa mga carrier singles sama sa “Aromatic”, “Barusa” (ang ilang official entry song sa Nasud Ko Dilaab album) nga mas gi-enhance sa double metal ug madunggan sa 93.1 Smash FM; “K.S.K.” (Kawatan sa Katilingban) nga naghisgot sa mga dawat-limpyo nga gobyerno ug nganong nahiagoman ang dakong krisis karon sa publiko, hapit nasad kini madunggan sa kahanginan puhon. Plus naa pa jud silay gipuno nga tulo (3) ka filler songs introducing “Bratitti Jr.”, usa ka chill out song nga nindot kaayo paminawon ilabi na kun ganahan mo mapag-isa o di ba kaha padulong na matulog, maka-relax kaayo ang beat niini, “Tribalew” feat All-Star Solid Menace, ug “Universescape” kauban sad sa “Zetosk” nga ang music hinimo sa DW55.

Ang kanta nga “Ugdaw” featuring Ian Biñan (vox sa Phylum) naghisgot about love, pero ang iyang lyrics wala nagstorya og love. Nindot pud kini nga kolaborasyon kauban sa usa sa labing sikat nga bokalista sa Sugbu kay gibwelo pud ni Ian ang iyang maka-inlove nga tingog unya gisagol ngadto sa bug-at nga timpla ug di kapugngang malanay jud ka kung imo nang paminawon.

Aduna pud silay mga English nga kanta sama sa masipa kaayo nga “Seek” nga pwede mapahaom sa bisan unsang aspeto sa kinabuhi sa tawo nga nangita sa kamatooran, “pero mahadlok nga masakitan basin di makadawat ug gusto nalang kalimtan,” puno ni Ryan. Ang “Heal” nga kanta nagsulti bahin sa kinabuhi nga nasakitan apan madasigon nga nidawat sa kamatooran, “Queslagre” usa ka English-bisayan nga kompo ug ang “Santelmo” nga matod pa dako kaayo   ang ilang gihatag nga kugi ani kay daghan silag gipanggamit nga pattern para aning kantaha. “Naghisgot ni siya kabahin sa pagbuhat og daotan apan sa kadugayan, karma ra ang sangpotanan,” pasabot ni Ray. Mura man og bato kagahi ang lugapak sa ilang musika apan lawom ang mga gihuptang unod sa lyrics niini nga pwede ugma damlag makapahigmata sa mga tawong hakog ug way baruganan. 

Para nila dako jud kaayo og nahimo ang “Bisrock” isip ilang training ground sa dihang nagsugod pa sila sa uno kay naabot sila sa ilang nahimutangan karon, nahimamat ang mga nagkalain-laing tawo, napadungog nila ang ilang musika, nakadawat sa mga didto ug diri nga achievements ug masinati ang di kabayrang kalipay nga idolohon sa kadaghanan. “Nindot ug dako kaayo og natabang ang Bisrock namo as musikero, kay naka-benefit jud mi ug tungod sad, ni evolve ang among music ug proud kaayo mi as musicians kun asa nami dapit karon,” pu’ng pang Ryan. “Katong 1st namo nga album murag stepping stone to namo nga mailhan mi sa mga tawo ug karon nga ni-iswag na sa mas mature ang among music, dili sad nga nanghambog mi apan pwede napud nga ma-compete sa mga bands sa kaulohan,” dugang ni Ray. Ang ilahang mensahe sa mga bag-ong nagtukod karon og banda nga, “Sa tinood lang sa, if mag-Bisrock sila, dili sila motan-aw sa Bisrock rapud nga banda para naa say thrill ang ilang music kay kun mo-look out ra sa usa ka basehanan pareho ra ang music tanan,” ni Renan pa. “Unya mostly dili pa polish ang kanta kay okay nalang nila basta nga maka-pass lang sila which is dili unta angay kay para rasad na sa quality sa ilang music ba,” puno sad ni Ray.

Nangutana ning tagsulat kun unsay nagpalig-on nila as Indephums? Midali ug tubag si Renan ug miingon, “Mighty Bond!,” gikataw-an siya ug giuyonan nilang tanan ug hastang lingawa na hinoon. Didto nalang daan makita na nga bisan sa gamay nga butang, magkasinabot gayod sila sa tinod-anay nga pagkahigala. Kataw-anan man, apan adunay bili kay wala nila giseryoso ang mga panghitabo, ang ilaha nga malingaw sila, madunggan sa tanan nga adunay respeto, mga lawgaw apan naay baruganan ug kalma ra kaayo pero mga banggiitan diay. “Ni adapt ko nila sa music, ako rang na-catch-up tanan ug naka cope-up ra dayon ko sa ilang mga tirada, murag one day ra gani naka jam dayon ko nila”  mabalaknon nga paambit ni Amuel nga daw nagluha sa kalipay.

Tungod sa ilang gipakita nga kalig-on, bisan asa man sila mahimutang, down-to-earth gihapon sila ug wala jud nanagko ang ulo sa Indephums nga gihangad sa mga kabatan-onang Bisaya.  Mapasalamaton sila una ni God, sa ilang mga parents and families, sa original members sa Stonestomp, ni Evert, John, sa Hunchbox (Ray’s highschool band), Metal Instinct, Makadawa, Mantequilla, ni Ian Biñan of Phylum, sa mga fans nga wala mapul-i og suporta, kay kun wala sila, “wala sad mi karon,” ni Maam Eleanor sa paghigugma, ni Dj Ram, ug sa ilang mga kauyaban, ni Annalyn (Ryan), Dot-dot (Ray), Jin (Renan) sa pagsabot sa tanan, ni Zidane nga ilang Sound Technician.

Kun ganahan mo makakita sa unsay latest sa Indephums, bisita lang kamo sa www.myspace.com/indephums ug mahimo sad silang i-add sa friendster nga mailto:[email protected].Ug sa mga ganahan mopalit sa ilang 2nd Album Indephums, available kini sa Manu, 2nd flr. Emall o text/tawag lang aning numeroha 0923-8719268.