Sama sa gipaabot ug gitagna sa kadaghanan, si Rizzini Alexis Gomez, kansang hulagway napatik sa page one sa Banat News adtong milabay nga Miyerkules, mao gayud ang nakalangkat sa titulo isip Miss Mandaue 2008, diha sa Cebu International Convention Center adtong May 7.
Gihakot usab niya ang kasagaran sa minor awards sama sa Best in Costume, Best in Swimsuit ug Miss Photogenic.
Pero dunay mga miisa ang kilay human wala direkta nga natubag ni Rizzini ang final question, kalabot sa unsaon niya paghulagway ang pulong “Mandaue” kun mahilakip kini sa Webster Dictionary. Ang tubag sa pangutana ni Rizzini naghulagway sa iyang kaugalingon nga mga hiyas ug iyang gihuman pinaagi sa pagpanawagan sa tanang mga Mandauehanon sa paghiusa ug pagbaton og ‘commitment” alang sa pag-uswag pa sa maong syudad. Dihang nahinabi na siya sa Banat Hugyaw pipila ka minuto human siya nakoronahan, mapaubsanong niyang giangkon nga wala siya magdahom nga siya maoy mogawas nga mananaug. Nabati niya ang tubag sa upat ka finalists, sanglit siya man labing unang gitawag. Ni Rizzini pa, maayo ang tubag sa iyang mga katigi, gawas nga mga maanyag usab sila. Lisod niya pa ang maong indigay. “I feel very tired yet very happy. It’s very fulfilling,” ang 17-anyos nga nursing student sa University of Cebu- Banilad nagkanayon ngadto sa Banat Hugyaw. “ I only expected to be first runner-up because it was a tough competition.” Dihang subling gipangutana unsaon niya paghulagway ang Mandaue kun kini mahilakip sa Webster, tubag ni Rizzini: “Progressive and very beautiful.” Samtang mikompleto sa royal court mao sila si Phoebe Kaye Fernandez, First Runner-Up; Alexis Arcenas, Second Runner-Up; Benjielyn Rose Ongluico, Third Runner-Up; ug Hyacienth Diva Mantalaba, Fourth Runner-up. Ang naglangkob sa Top 10 mao sila si Ciarra Joyce Buot, Mhon Therese Menaling, Celeste Cajegas ug Mayumi Bister.
Si Fatima Yvonne Flores napili nga Miss Ingenius Photogenic ug Smart Texters Choice; si Jessa Mae Rosal maoy migawas nga Miss Friendship ug Best in Evening Gown; Darling of the Press si Jannylyn Tiopes ug Best in Talent si Kimberly Rose Cabrera. Ang Best Designer Award nakuha sa nagmugna sa gown ni Arcenas.
Nasayran nga ang panel of judges nagtamod niining mosunod nga criteria: Beauty 35%, Charm, Poise and Grace 20%, Personality 20 % ug Wit and Intelligence 25%.