D’Absolute: Kampeyon sa Bisrock Band Challenge

Matawag kuno nga significant kaayo ang pagkahimugso sa D’Absolute Band sa kalibotan sa lokal nga musika. Pormal nga natukod ang D’Absolute (kanhi Absolute Failure) niadtong Agosto 2006. Nakapadasig kanila ang pagtukod og banda human giorganisar ang usa ka band contest sa kanhi lungsod sa Naga nga sila mga lumolupyo sab. Ang band contest gipahigayon sa samang buwan. Tungod sa ilang interes nga moapil sa maong kompetisyon nagdali-dali sila og tukod og banda. Sa dihang sige na sila’s ilang ensayo hangtod nga nagdanga-danga na’ng pista, gipangulbaan na sila kay labing unang higayon kadto nga mosalmot sila’s indigay sa mga astig nga rakista niadtong Agosto 18, 2006.  “Wala lang namo gidahom nga kami modaog sa maong tigi,” matod pa ni Jerell “Budong” Alidon, ang bahista sa banda.  “Ang amo lang nga makahatag og dugang kaalegre sa aktibidad. Kay kun daghang mangapil, mas bibo man.”

Sa dihang nahuman na kuno sila’g perform sa entablado, ug nag-upoy-upoy na lang sa kilid-kilid nagpaabot sa hukom, gipahibalo sa emcee nga gideklarar silang mananaug sa mga hurado. Butang nga wala nila damha kay mga tang-an ang ilang mga kontraryo niadtong gabhiona sa pagpahigayon sa Naga Battle of the Bands 2006 nga gisalmotan sa 12 ka mga Naga-based bands.

Ila kunong na-realize nga dili diay sila Absolute Failure, kundi Absolute Success.

Ug didto na nagsugod nga ila nang giseryoso ang musika nga Bisrock. Human niadto daghan pa gyod sila’g mga contests nga naapilan. “Kalooy sa Ginoo, katulo na mi nagkampeyon. Nakasuway na sad mi’g ma-second, ug ma-third placer,” apas-sumpay ni Budong ug mga kauban.

Silang Ranil Burlas (vocals) nga tinun-an sa Welding sa TESDA-Minglanilla; Israel Repollo (vox), 4th year student sa Sienna School of Naga; Algie “Jekoy” Sepasip – lead guitarist sa Naga National High School, 4th year gihapon; Jerell “Budong” Alidon (bass guitarist) – automotive student sa College of Technological Sciences-Cebu (Cebu Technical School), iyang manghod nga si Junaldz Alidon (keyboardista), ug iyang lain pa gyod nga manghod nga si Jovel Alidon (drums), 1st year student sa Naga National High School mao ang mga sakop sa D’Absolute, kanhi Absolute Failure.  Si Ranil ang ilang kompositor. Si Israel kaabag niya sa pag-kompo. Sa cover songs hinoon, diha eksperto si Israel . Bisan unsang tingoga makuha ni Ranil kay may abilidad man siyang usab-usabon iyang tingog malangyaw man o local ang music artist nga iyang awaton. Si Jekyll maoy sinaligan nga lead guitarist. Kun gitara na’y hisgotan, diha siya payter kaayo. Gani, nahimo man siyang best guitarist atol sa usa ka kompetisyon diha sa Talisay Sports Complex. Si Budong  ang bass guitarist maoy nagpalanog sa nagdahunog nga bajo. Samtang si Junaldz, gawas nga keyboardist, siya sab maoy modawat sa mga invitations or bookings alang sa gigs. Samtang si Jovel mao ang fayter nga drummer pero makamao sab siya sa lain pang mga instrumento. Gipasidunggan sab siya isip best drummer niadtong kompetisyon nga diha gipahigayon sa Talisay Sports Complex. Sila ang tingog likod sa “Napakyas”, “Pandesal”, “Forever” ug “Magpabilin” nga nanganaw-kanaw sa Smash 93.1 – Home of the Bisrockers.

Ang pinakadako unta nilang achievement mao ang pagkasulod nila’s Top 10 sa Muziklaban 2007 diha’s Mactan apan lagi kay may menor de edad man sa tapok mao nga na-disqualified sila. Apan nahulipan ra sab og dakong dungog ang maong kaparotan kay niadtong Sabado, ang D’Absolute maoy nahukmang kampeyon sa Mandaue Bisrock Band Challenge. Second placer ang Lamat, samtang third placer ang 13th Mass. Lakip sa mga mingsalmot ang Influence, Suicide, Baronest, Flirt ug Misteach.

Impluwensya sa D’Absolute kanhiay ang VST and Company sa dihang showband pa sila, mga Disco 80s kuno ang ilang tirada kanang makapasayaw sa mga tawo, hot stuff susama sa Dancing Queen sa Abba, ug mga kanta sa Tropical Depression, ug medley sa mga chartbusters. Duna sab kuno’y panahon nga ni-switch sila into retro. Apan mas gusto nilang nuntan ang slow rock. Sulod sa ilang CD sampler ang kantang Napakyas, Pandesal, First Love ug Magpabilin. Lubog lang hinoon ang mensahe o lyrics ning mga kantaha ug maoy una nakong gireklamo. Sa tono wala’y karat ning grupoha. Tinood nga kun instruments lang ang basihan, maayo ang templada sa grupo. Aduna pa sila’y laing mga komposisyon – ang Istambay, First Love, Giduwaan ug Forever nga gitagik sa Iningles.

Memorable para nila ang mga gigs sa lungsod sa San Fernando labi na ang Battle of the Bands didto; ang laing gig sa Naalad, Naga; ug ang gig sa Tangke, Naga. Latest influences nila ang The Calling ug Disturb.

Sa Naga Bisrock History nga gig nakauban nila ang Wet Slipperz, What’s The Frequency?, Jimmycycle ug daghan pa. Samtang sa Bisrock sa Uling naka-jam nila ang Republika, Jimmycycle ug Castle Freak. Ug atol sa Live Band sa Colon concert duol sa Salcon, Naga nakauban nila ang Makadawa.

Shoutouts: Daghang salamat nilang Papa Eusebio ug Mama Betty, sa Stone Stomp, Phylum, Makadawa, Jimmycycle, Republika, Dead String, Late Weekend, Castle Freak, 13th Mass, Econo140, Smooth Friction, Baronest, Two-Side Circle, ug ang The Alidz Band. Nanghinaot si Budong nga mausab ang batasan sa ubang nagbanda-banda nga adunay crab mentality.

Nalakbitan ni Budong nga duna kuno’y banda nga ila ra sab nga kaila nga imbis motabang nila, kusog naman hinoon kunong mangdaot ug kun duna’y gigs nga buot unta silang ilakip, ang maong banda mao nama’y mohangyo nga itagak sila’s listahan. Kapaet nga sugilanon! Suroya ang Imem.com/absolutefailure ug alang sa gigs text ni Junaldz sa 09215858819.