“Paminawa” album sa Assembly Language

Bata man o matiguwang, dili kapugong nga moikid-ikid kung ang hit song na sa bandang Assembly Language nga “Chinita” ang madunggan sa kahanginan. Sikat kini nga kanta kay bisan asang radio stations daghan man ang mo-request niini. Gani gihigugma kini sa mga kababayn-ang adunay mga singkit ug pikot nga mga mata, mga chinita ba, kay lagi pwerti pud nilang kiliga kay murag sila ang gipadungog-dungogan sa maong kanta nga adunay chorus nga “Inday, nagtabisay akong laway, Tungod sa matahom mong panagway...hahay. In love jud ko sa clasmate ko nga Chinita, kay nindot siya moporma, labi na kung mo smile pa sa akoa”. Gituhoan nga kining maong kanta maoy nagpatuyhakaw sa ilang talagsaong talento nga niuban sa listahan sa mga banggiitang linya sa mga bisayang banda.

Atong tagsa-tagsaon pag-ila-ila ang upat ka mga musikero nga nihimo og tatak sa Sugbu ilabi na sa mga bisayang rakistas. Ang payter nga tighapak sa drums, mao si Zen Go, ang kaniadto nilang bass karon lead guitars na, si Mark Anajao, si Simplicio Kiskisan Jr. nga mas nailhan sa ngalang Emping mao ang ilang bokalista ug bahista na karon, ug si Nahshon “Nahsh” Maquiling ang ilahang bokalista/guitars ug duna pud siya’y laing banda nga “16 minutes”.

Ang sinugdanan sa ilang pagpundok dili isip usa ka banda, kundi nagkaila-ila lang kini sila sulod sa classroom. Classmates sila sa usa ka subject nga ginganlan pud og Assembly Language sa ilang kurso nga Computer Engineering sa Cebu Institute of Technology. Tungod kay mahilig man sila sa musika, nagkasabot ang upat nga magtukod og banda ug kay isig ka paborito man nila ang subject nga Assembly Language ug dinhi sang mga orasa sila magka-bonding, giuyonan nila nga mao nalay ipangalan usab sa ilang grupo.

Sa mga komposisyon sa grupo, ang bida nga tigmugna sa mga lyrics mao silang Nahsh ug Emping, ug kun kinsa man kadtong nakahimo sa maong kanta, mao sad ang mokanta. Sama sa “Chinita” nga kang Emping ug kang Nahsh pud sa unang gipasikat nila nga kantang “Tabang”. Samtang si Zen ug Mark ang tig arrange sa music ug mga beatings sa ilang mga kanta. Mahinumduman nga usa sad kini sila sa 11 ka mga bisrock bands nga adunay official entry song sa Dilaab Album nga Nasud Ko nga giulohan og “Smuggled Goods”.

Sa dugay-dugay napud nga pinaabot nila nga maka-release sa ilang hinaguan, karon hatagan kamo nila sa ilang kaugalingong album entitled “Paminawa” nga mao pud ang usa sa ilang carrier single nga adunay 10 ka tracks. Ang mga kanta sulod niining album mao ang Di Madutlan, Way Imposible, Don’t Let Go, Chinita, Tabang, Mabdos ug uban pa. Sa mga fans nga naghinam-hinam nga makakuha sa ilang copy, available kini sa mga tindahan sama sa Manu sa Emall, A. Salonga SM, Kolot’s Eatery, Ting’s Studio, Smash Fm Station, ug sa ganahan nga makaminos sa presyo kontaka lang si Engr. Boyet sa numero 0915-7793529.

Ilang gipasalamatan ilang mga ginikanan sa tanang suporta, sa mga amigo, sa tanang Bisrockers, sa tanang Clans, sa mga tinud-anay nga nisuporta ug sa wala mosuporta, sa mga nipalit ug mopalit pa sa CD.

Kung ganahan mo og update sa ilang mga gigs ug latest pictures, bisita lang sa www.assemblylanguage.bravehost.com ug mahimo pud silang e-add sa friendster nga [email protected].