Usa ka kasaligang tinubdan ang mibutyag ngadto sa PangMasa nga nagka-istorya na sila si Gabby Concepcion ug ang GMA Films, ug matud pa maayo ang resulta niini. Gikatahong nagkasinabot ang duha ka mga kampo nga dili na padak-on ang problema.
Tsika pa nga dili na mahinayon ang pag-uli ni Gabby sa iyang nadawat nga downpayment gikan sa GMA Films, ug kun mahapsay gyud sa hingpit ang ilang problema mahinayon ang paghimo og pelikula sa maong actor sa nahisgutang movie outfit.
Sa higayon nga okay na ang tanan, ang manager ni Gabby nga si Mrs. Rose Flaminiano na ang mohangyo sa Star Cinema aron tugtan ang actor nga himoon ang movie sa GMA Films. Gilaoman usab nga mosugot ang film arm sa ABS-CBN tungod kay wala man malilong nga nakapirmang daan og kontrata si Gabby sa GMA Films.
Ang napanlantawan nga problema mao ang kun kinsay mauna og himo – movie with GMA Films o with Star Cinema?
Pagkakaron matud pa, giandam na sa Star Cinema ang hugyaw nga proyekto para ni Gabby. Mauna lang hinoon og himo ni Gabby ang teleserye kauban si Claudine Barretto, ang “Iisa pa Lamang”.
Ang nasagap pod nga tsika sa PangMasa mao nga ang giluto karon nga proyekto sa GMA Films mao ang movie diin magkauban sila si Gabby ug Marian Rivera.
Samtang, balik acting na gyud si Gabby atubangan sa camera tungod kay gisugdan na ang iyang taping last Friday para sa episode niya for “Maalaala Mo Kaya”.
Sa wala pa ang taping, mipailawom una og workshop si Gabby isip pangandam tungod kay dugay na siya nga wala makaatubang o maka-arte atubangan sa camera.
Katapusan nga MMK episode ni Gabby niadto pang 90’s diin kauban niya si Fanny Serano.