Gabby-Claudine

“Iisa Pa Lamang” ang title sa teleserye nila ni Claudine Barreto ug Gabby Concepcion sa ABS-CBN. Makauban dinhi sila si Angelica Panganiban ug Diether Ocampo. Original ang story sa maong teleserye, dili kini remake sa 1992 movie nila ni Richard Gomez ug Dawn Zulueta, diin si Joey Albert ang mikanta sa theme song. Sa teleserye, si Lani Misalucha na ang moawit sa theme song. Ang Queen of Philippine Cinema nga si Ms. Susan Roces, apil usab sa nahisgutang project diin sa May 2, na ang unang taping day gitakda.

Charice Pempengco

Star Records ang mo-produce sa unang album sa international singing sensation nga si Charice Pempengco. Sa radio program sa beteranang kolumnista sa PangMasa, Manay Cristy Fermin adtong Lunes sa hapon, gibutyag ni Charice nga maglakip kini sa duha ka original compositions—‘Born To Love You Forever ug It Can Only Get Better”—nga sinuwat para gyud kaniya sa mga Swedish artists. Of course apil pud ang kanta ni Whitney Houston nga “And I’m Telling You” nga maoy nakapasikat niya sa You Tube hangtud na nga gidapit siya sa nagkadaiyang TV shows sama sa Oprah, Ellen DeGeneres ug Paul O’ Grady.

Aubrey Miles

Sumsuman karon sa mga balita sa kaulohan nga si Aubrey Miles ang gipasabot sa blind item kagahapon kalabot sa usa ka sexy star nga upat ka buwang mabdos, nga nasakpang nag-cocaine sulod sa usa ka sakyanan didto sa The Fort niining bag-o lang. Suma pa nga ang gipasabot usab nga hunk mao si Troy Montero. Ang nakaparat sa maong balita mao nga gidala si Aubrey sa Taguig Police Station, apan gibuhian ra usab dayon tungod kay dunay nakig-negosasyon para niya. Wala sa blotter sa kapolisan ang maong insidente ug gihimakak usab kini sa mga otoridad. Samtang walay pamahayag si Aubrey ug Troy sa maong balita tungod kay matud pa dugay na kining wala na sa nasud ug ang iyang handler wala nay komunikasyon niya.

Ciara Sotto

Ang building permit maoy nakalangay nganong hangtud karon wala pa makasugod ang show ni  Ciara Sotto nga giulohan og ‘Fever” didto sa Las Vegas. Hangtud karon gisigehan pa og tukod ang theater house diin adto sila mopasundayag, lakip usab ang duha ka mga Pinay nga kauban sa production—Karlyn Bayot ug Rizza Navales. Ang nakanindot hinoon mao nga bisan og wala pa sila makalugwa, padayon silang nagdawat og sweldo sa ilang mga rehearsals. Samtang usa na lang ka kanta matud pa ang gipaabot ni Ciara ug molugwa na ang iyang ikalima nga album, diin labing espesyal sa tanang komposisyon mao ang sinuwat sa iyang daddy nga si Tito Sotto para sa iyang mama nga si Helen Gamboa.

Malou Choa Fagar

Ang Executive Producer sa Eat Bulaga, Malou Choa Fagar ang labing bag-ong biktima sa mga walay kwenta nga text message nga nakapakuba ug nakapakugang sa mga sakop sa iyang pamilya nga nakadawat sa mensahe og kadlawon nga dako. Ang mensahe nagkanayon nga   ‘dead” na ang nahisgutan. Nasayran nga duha ka mga writers nga napungot ni Fagar human wala sila maka-interview ni Vic Sotto sa set sa Dobol Trobol, maoy responsabli sa maong mensahe. Ang tsika mao nga gipasaligan ni Fagar nga iyang ipaabot sa publicity head sa movie ang ilang hangyo, meaning kun magsugod na ang publicity para sa pelikula ni Vic ug Dolphy, lakip sila sa imbetahon. Nagtuo matud pa ang maong mga writers nga gi-snub sila ni Fagar busa milusad sila og negatibong artikulo batok sa movie, lakip na niini ang pagpakatap sa mensahe. Usa ka columnist-editor ang mitambag kang Fagar nga pasakaan og kaso ang duha ka mga writers—unjust vexation.

Richard Gutierrez

Mi-resign na sa SOP si Richard Gutierrez. Kini aron matud pa sa iyang mama ug manager nga si Annabelle Rama, paglikay sa mga intriga. Pero motekang gihapon si Richard sa maong show matag higayon nga duna siya’y project nga i-promote, sama na lamang karong Domingo diin i-promote ni Chard ang grand finale sa Kamandag. Giklaro usab sa kampo sa actor nga naplantsa na ang ilang problema sa GMA-7, nga daan nang gitin-aw ni Annabelle nga dili sa big bosses ang ilang isyu kundili sa mga production people. Gitakda na nga mopirma og bag-ong two-year exclusive contract si Richard sa GMA-7 karong pipila ka adlaw.