Medyo tuliro ko rong semanaha mga fwenzter kun kinsa ang akong hatagan og dakong pagtagad dinhi sa espasyo nga gitagana alang sa tanang matang sa musikero. Kinaham man god nako ang mga songs ni Don Moen. Yepz, si Don Moen nga music evangelist! Nahigam sab ning promoter ni Don Moen kay kun sa manok igtatari pa, inilog kaayo ni siya nga Gospel music artist. Dugokon gyod ang pasundayag. Minglab-as na noon sa akong panumduman kadtong tawo nga nangutana nako’g sampol sa kanta aning Don Moen. So mibirit gilayon ko’g “God with us/so close to us, Emmanuel” ug kanang “Come to the river of life/you will find healing here/come to the river of life/come and drink freely here.” Tiaw mo ba’y miingon man, “aww hala kang Don Mee-yon man na!” Ngeks, Don Mee-yon gyod? Mora mag Korean!
Nan, kay pwerte naman gyod nakong baligya adtong kalihokan ni Don Moen sa ilang pag-anhi niadtong nakalabay’ng tuig (actually, morag ika-lima naman ni nilang balik), matawag na lang ni og snippets ang info nga akong i-share ninyong mga mahiligon sa contemporary Gospel music. Sa April 11 (karong Biyernes), bitbit na sab ni Don Moen ang iyang mga chiwariwariwa alang sa “Don Moen Worship & Revival Tour” nga anha pagahimoa sa University of Southern Philippines Open Grounds . Magsugod ang concert 7:30 pm. Tag P200 to P500 ang tickets. Life-changing ang kasinatian sa tanang Don Moen concerts, ako ning ikagarantiya. Makalimot ka’s mga isyu sa nasod labi na gyod ning dakong bakak nga nagkuwang ang bugas. Pag-tsur mo oi, ang bugas pwerteng daghana labi na’s Tabunok Market. Ang mamalitay ra’y wala! Kay wa pa’y inog-kompra.
Pwes kay sige na man ko’g budyong aning Don Moen, tagaan nako’g pagtagad karong adlawa ang Pinikpikan. Pihadong nakaila na ang tanang mahiligon sa World Music aning pundoka. Sa akong mga kaliwat nga mga Ilocano (kay taga Abra man ang kaliwat sa akong biological father), familiar gyod mos “pinikpikan” nga paagi sa pag-ihaw og pagluto og manok. Pero di ko mo-elaborate ana kay brutal na alang sa mga Sugbuanon. Ari nalang tas mga mahinungdanong kalamboan mahitungod sa Pinikpikan.
Pinikpikan ang tingog likod sa Metronomad, ang ilang pinakaunang “recorded music collaboration”. Tungod kay indigenous man ang ilang musika, ihatod nila ang ilang mga tigpaminaw balik ngadto sa bukid sa Cordillera. Samtang ang “Atas” (Tinagalog sa “misyon”) gihulagway nga “danceable percussive music.” Usa kini ka panagtagbo sa mga nagkadaiyang indigenous instruments nga gigamit sa mga pundok etniko sa Pilipinas sama sa agong - Mindanao large brass gong (kadungog na mo ani? Paminaw mo’g Bombo radyo kay mao niy makabungog nga instrumentong ilang hapakon). Naa sab ang angklung – bamboo rattles, bird flute – modulated bamboo wind instrument, ceramic drums o goat skin ceramic drums, devil’s water chime - goat horns nga tinuhog; djembe – usa ka African goblet-shaped wooden drums; doumbek - middle Eastern wood drums, derbouka - metal drums; gabbang ug gaklab – wooden blocks; gangsa – Cordilleran flat brass o silver gongs (kanang bitbiton sa mga Igorot), kubing (Mindanao)/ullibaw (Cordillera) – bamboo jaw harp; kulintang – Mindanaoan set sa walo ka brass gongs; seed shakers/seed pods, T’boli bells – gagmay nga ligngin nga bronze bells, tungatong: bamboo segments; higalong – long steel o nylon lute, kuglong – short version sa higalong, ug faglong o medium-length steel-stringed lute.
Giapod-apod ang “Atas” gawas sa Pilipinas pinaagi sa paningkamot sa Tropical Music (Germany) ug sa Amazon.com - usa ka online shop. (Tingali mao na ni resulta kay dili man god ta mo-appreciate sa atong mga Pinoy artists. Tua na gibaligya sa gawas, nya kita diri sige og patronize sa mga foreigners. Mora ta’g nag-exchanging gifts!)
Ang mga sakop sa Pinikpikan mao silang Butch Aldana, Sammy Asuncion, Gerry Baguio, Maria Carolina Rodriguez Bello (wailer ni siya’g Manobo chants), Billy Bonnevie, Bo Yu, Dante Bosch, Budeths Casinto, Dr. Stix, Boy Garrovillo, Louie Talan ug Tito Martinez. Sukad sa ilang pagkaporma niadtong 1989, ang Pinikpikan magtukaran na sa nagkalainlaing music venues ug events dinhi sa nasod. Sagad nilang gigs ang provincial festivals, Earth Day jams, cultural shows, community ug school events, concert bars ug labi na gyod ang world music festivals.
Matod pa ni Maria Carolina Bello “the band has been a favorite in conducting music and drum-playing workshops for students of primary and secondary schools in the urban centers.”
Sa tuig 2001, nadawat sa pundok ang pasidungog nga Best Album of the Year alang sa “Atas” nga gitunol sa KATHA, usa ka award-giving body nga gilangkoban sa mga orihinal nga Pinoy music composers.
Sa laing bahin, unod sa “Obra Encantada” (Enchanted Works) ang Pinoy indigenous chants ug beats. Samtang ang “Kaamulan” nga na-release niadtong Nobiyembre 23 mikutlo’g inspirasyon gikan sa Kaamulan festival sa Bukidnon. Buot ipasabot sa kaamulan, gathering kun panagtapok. Nanagtagbo sa melodiya niini ang Asian, Latin, Arab ug African nga impluwensya nga gikanta sa sinultihang Filipino, English, Spanish ug French.
Tema sa ilang mga kanta ang kalinaw, panaghiusa ug ang kalikupan. Aduna sila’y bersyon sa classic Filipino folk song nga Sarung banggi (Bicolano, nagpasabot og “one night”) ug “Butanding” nga usa ka matang sa whale shark sagad makit-an sa San Bernardino Strait o sa kadagatan sa Donsol, Sorsogon.
Ang Pinikpikan usa usab ka artistic collaborator sa Cultural Center of the Philippines sa ilang han-ay sa mga national cultural events. Sa gawas sa nasod, nahimong representante sa Pilipinas ang maong grupo sa Association of Southeast Asian Nation’s Cultural Summit niadtong Septiyembre 2002 didto sa Angkor Wat, usa ka historic site sa Cambodia. Niadtong Nobyembre 2002 ang banda mitokar sab sa World Rhythm Series ug sa 2004 sa Singapore Music Festival nga giorganisar sa Singapore National Arts Council. Gihulagway ni Marcelline Santos sa Philmusic News nga ang musika sa Pinikpikan “original, tribal and rhythm-driven. It’s sincere, it’s quite universal.” Samtang matod pa ni CH Pardo sa Rhythm Nation nga “Pinikpikan today has evolved to totally catch the Filipino spirit of music and merge it with that of the world around us.” Hinungdan nga tumong karon sa Pinikpikan nga maghimo pa’g mga kanta nga tribu ug talagsaon ang paningog. “Pinikpikan aims to create a unique sound and visual experience that is truly world-class Filipino world music,” matod pa ni Bello .
Magpasundayag sila dinha’s Ayala Center-Cebu karong Biyernes (4:30 p.m. sa Paseo Solana) alang sa “Summer Solstice” campaign sa nahisgotang mall. Alang sa dugang kasayoran suroya ang www.pinikpikan.com. o tawag sa Concierge - 2315342 local 324.
