Again, the show must go on

Yadzz, kun kamo pa kaha si Dulce, buhaton sad kaha ninyo ang iyang gibuhat, nga gikan sa usa ka show, way katulog, mibalik na sad dinhi aron pag-atiman sa iyang papa Leoncio nga naglisod na sa pagginhawa atong Pebrero 21, unya, mibalik pa gyod sa Manila aron pagkuha sa iyang mga kagamitan kay may show na sad sa Tangub City pagka Pebrero 23, kay ang show niya maoy opening salvo sa pagsaulog sa Tangub City sa iyang ika-40 nga pagka charter city, bisa’g nasayod na siya nga dili na gyod magdugay ang iyang amahan niining kalibutana?

Mao to, mga Yadzz, nga pagka ugma, nahutdan na gyod sa gininhawa si noy Leoncio, pero kinahanglan mobalik pa gyod si Dulce sa Manila, kay may lain pang commitment, so pagka ugma na sad,, Pebrero 26 [Martes] mibalik na sad siya dinhi sa Sugbo, ug milahos sa St. Peters Funeral Homes [walking distance lang dinhi sa among office, atbang sa Cebu Metropolitan Cathedral], kay diha man ang haya ni noy Leoncio, ug nagpabilin si Dulce hangtod nalubong ang iyang amahan pagka ugma, Pebrero 27 [Miyerkules]. Pero sayo sa buntag sa Huwebes, nagdali sad si Dulce sa pagpauli, kay may show na sad siya sausa ka lugar. Kamo Yadzz, makahimo mo ana?

Pero the show must go on man gyod, mga Yadzz, di ba? Tingali wa pa mo malimot atong nag-show sila’s Dulce, Pilita Corrales ug Malou Barry diha sa Cebu International Convention Center, bisa’g namatay sad to ang pinangga kaayo niyang manager nga si Anggie Magbanua, no? Unya, pagkamatay sad ni anhing Danny Holganza, nag-show na sad sila si Jacque Magno diha sa Casino sa Waterfront Hotel sa Mactan.

Matud pa ni Dulce, “ the show must go on. Si Anggie naa sa showbiz, busa nakasabot siya sa mga kaakohan sa showbiz. Si Danny Holganza singer pod, busa nakasabot sad sa sitwasyon sa usa ka entertainer nga, bisa’g nagdilaab ang dughan sa mga kasakit, kinahanglang lingawon ang mga tawo, kay wa sila’y labot sa imong mga kagul-anan. Sila mitan-aw sa imong show, aron malingaw, dili aron moapil sa imong mga kaguol.