Halad, Handumanan

Duha na ka tuig sukad mahitabo ang trahedya sa Guinsaugon, St. Bernard, Southern Leyte.

Manghinaot ko nga naka-move on na ang mga pamilya nga nakalasan og mga kinabuhi. Ug nga nakat-on na kita sa leksyon nga tahoron sa kanunay ang kalikupan. Gawas nga technology can never compensate what damage it has done to the ecology, lisod kaayo kun ang Kinaiyahan na’y maningil og pautang gumikan sa mga sala nga nabuhat nato batok kaniya. Bottomline is alkansi gyod ta permi.

Usa na ka tuig sukad sa paghalin ni Rutchel “Papa Roch” Bollozos, usa sa mga miyembro sa Deadspotters Society. Hubkas na apan wala pa’y nakab-ot nga hustisya alang kang Papa Roch. Nanawagan ang nibarog nga tigpamaba sa maong Bisrock clan nga si Aileen “Ai-Ai” Panoy nga i-ampo ang kapahuwayang dayon sa kalag ni Papa Roch ug nga unta makonsensya na ug motahan sa mga awtoridad ang nagpusil kaniya.

Magpasalamat ko sa tanang suhestiyon nga akong nadawat pinaagi sa text. Paningkamotan nako nga ma-feature ang Faspitch, depende sa ilang availability ug availability sa materials. Usahay man god problema sa writer kung magpadili-dili og pa-interview ang sources. Lisod man sab og magmugna-mugna lang ta o mohangad lang sa kisame aron makalubid og mga impormasyon aron lang ingnon nga nakahibalo ta parte anang bandaha. Mas labing maayo gyod kun mo-meet pod sila namo dinhi sa Banat News  halfway. Nakasugat na ko’g banda nga menos ang kooperasyon kay lagi connected ang usa nila ka sakop sa laing pamantalaan. Nakatilaw lang ko’g insulto. Maong nakat-on na ko nga bisan pa’g BY REQUEST or BY DEMAND ang artikulo, dili na ko makig-negotiate kun dili andam makigtambayayong sa kawsa ang sources.

* * *

Mo-congratulate ko sa Cebu Malay Society of Composers, Artists and Producers tungod kay human sa “Halad” nga alang sa panawagan sa usa ka hiniusang Zzubu kon Sugbu niadtong 2006 diha sa Mandaue City Sports Complex, malamposon ang follow-up project niini nga “Handumanan” nga gipasundayag sa SM City-Cebu sa bisperas sa Sinulog festivity ning tuiga. Tungod kay dako man ang akong respeto alang sa mga talentong Bisdak, ang mosunod nila nga proyekto maoy atong sumsuman dinhi sa Tribu Zzubu “segment”. Zzubu ang karaang ngan sa Sugbu nga usa kanhi ka “fishing village”. Busa, mata’g lumad nga Bisdak nga magpakita og excellence sa musika, sa pag-compose ug pag-produce og mga pasundayag, dinhi ning maong kolum nako ituboy ang ilang kawsa ug pakpakan ang ilang mga paningkamot.

Pinaagi sa kugi nilang Joe Go (chairman sa Handumanan concert), CEMSCAP president Warfe Engracia, Jun Laspiñas (sounds and lights manager), Teresita Domingo (marketing manager) ug musical director Febes “Doy” Montaña nga maoy “maestro” sa 12-piece Mutya Orchestra, nahatagan na sab og bulok ang mga imortal kon klasikong mga kantang Binisaya. Pinaagi sa talento nilang Dr. Bernard Elvis Pino, Sarah Silva (nga miawit sa Dahong Laya, gihulagway nga usa ka love song that has outlived other love songs over the years), Lady Michelle Arrizabal, Dr. Warfe Engracia (miawit sa Kamingaw sa Payag) samtang si Eddie Dakay diha sa piano, ug Thea Domingo nga mihatag og rendisyon sa kantang “Paborito ni Lolo”, nahimong hugyaw ang maong konsiyerto nga giisip nga usa ka paglingi sa mga huning misikat sa nakalabay’ng panahon.

Giawit ni Athens Engracia ang “Amahan Namo” doxology ug ang Bisdak medley sa mga kantang gipasikat ni Susan Fuentes. Misugat sa mga nanan-aw ang band overture sa mga popular nga kantang Sinugbuano – Sa Kabukiran, Pobreng Alindahaw, uup. Human sa overture, ang theme song sa maong pasundayag nga nag-ulohan og “Handumanan” (sa panuwat-orihinal ni Montaña) gitagaag kinabuhi ni 1970 Tawag ng Tanghalan grand champion Novo Bono. Nagdilaab gihapon ang kasibot sa mga nanan-aw sa walay kamatayon nga “Matud Nila” nga giawit usab ni Bono. Apil sab sa “Handumanan” si Girlie Lapinid-Laspiñas (ang tingog likod sa “Langit ug Yuta) ug si Vice Mayor Michael Rama nga mihatag sa iyang interpretasyon sa Pasayloa ug Hikalimti. Suportado ni Rama ang maong proyekto nga gisabak sa iyang buluhatan. Stage director sa Handumanan si Ron Heri Tan (production designer, Panaghoy sa Suba) nga mao usab ang founding chairman sa Cebu Film Society. Maayo unta’g madayon ang giplano sa pundok ni Tan nga usa ka Cebuano filmfest aron atong makita ang mga produkto sa mga Bisdak filmmakers sama ni Jerrold Tarog ug Ruel Antipuesto. Atangi ang pagsalida dinhi sa “Confessional” ni Tarog ug Antipuesto. Pagahisgotan na nato sa lain nga artikulo kay naghuwat pa sab ko sa mga materyales gikan ni Tarog.

Human sa Halad ug Handumanan, buot itunol ni Montaña ang iyang pasalamat ninyo tanang nagmahal sa huning Bisaya. “Sayod ko nga wala pa sila matagbaw. Atangi ang among sunod nga proyekto featuring Giga Yanong from Chicago , Illinois . Usa ni ka Bisdak talent nga siguradong ikapasigarbo nato kay wala gyod ni siya malimot sa iyang cultural roots bisan pa man og didto siya magdako sa laing nasod,” pasalig ni Montaña.

Akong nasayran nga gikan si Giga Yanong sa pamilya sa mga musikerong Bisdak ug nga moabot siya sa Tribu Zzubu karong Hunyo bitbit ang iyang saxophone alang sa paghatag kanato’g dili-dali-hikalimtang matang sa kalingawan.

Congratulations diay ni Lady Michelle Arrizabal nga naka-qualify sa screening sa Pinoy Idol , usa ka reality TV search alang sa mga mosunod nga henerasyon sa mga songbirds. Patterned kini sa American Idol nga gimugna ni Simon Cowell. Atangi puhon sa GMA-7 ang paglugwa sa pipila ka mga eksena atol sa usa sa mga screenings nga dinhi gipahigayon sa Sugbu.