Hasta ang manager ni Jennylyn Mercado nga si Becky Aguila dismayado sa “no comment” ni Patrick Garcia dihang gipangayuan og reaksyon sa The Buzz kalabot sa tsismis nga dili siya maoy amahan sa gisabak sa young actress.
Suma pa sa PangMasa, ang wala mauyoni ni Becky mao ang linya ni Patrick nga kun dili man gyud gani siya maoy amahan, magpabilin siya hangtud nga dunay mutumaw ug mosawo sa responsibilidad.
Matud ni Becky wala siya magdahom nga mamahayag si Patrick og ingon niadto. Ang iyang gipaabot mao nga ipalanog ni Patrick sa tibuok kalibutan nga siya maoy amahan sa gisabak ni Jen ug nga malampusan nila ang tanang intriga sa ilang relasyon, pero dili kini maoy nahitabo.
“Its clear that he, himself has doubts, so kung ganun din lang pala, let go of Jen na lang. I’m really so disappointed. If there’s anyone who should defend Jen, its him,” nagkanayon pa si Becky ngadto sa PangMasa.
Nanghinaot si Becky nga sa kadaghan sa intriga nga gibato ngadto ni Jen, mahunahuna pud unta ang bata nga naa sa sabakan niini. “Please, leave the baby alone. Tama na yang mga intrigang yan,” hangyo na lamang niini.
Jay-R: Paghikog wa sa hunahuna
Gihimakak ni Jay-R Siaboc kagahapon ang migawas nga taho, lakip na dinhi sa Banat Hugyaw kagahapon nga matud pa misuway siya og hikog tungod sa milabay nga semana tungod kay nasayran niya nga dunay laing uyab si Irish Fullerton sa Amerika.
Sa balita sa TV Patrol World kagabii, gipakita pa ni Jay-R ang iyang liog nga walay lakra sa hinigtan o uwat sa samad, sanglit gikataho nga nylon cord ang iyang gigamit sa iyang pagsuway pagpakamatay. Suma pa ni Jay-R personal na kaayo ang maong intriga ug para niya dili na maayo hunahunaon o tan-awon. Medyo lihay na ang pamahayag ni Jay-R labot ni Irish tungod kay kun sa milabay nga mga adlaw miingon siya nga maayo ang ilang relasyon sa Fil-Am ug gani giingon pa niya nga mag-pre Valentine date sila, kagabii sa mao gihapong balita sa TV Patrol nagkanayon na siya nga wala sila’y commitment sa dalaga. Samtang giangkon ni Jay-R nga nakasinati siya og depression pero wala musulod sa iyang hunahuna ang maghikog.