“Honesay” ang show!

Hi OkRyanians! Daghang salamat sa mga nag-text sa milabay nga semana. Ang uban nanaway ug duna usay nidayeg. Well, normal ra na kay depende na og hain mo makapusta. Pak!

Anyway, sunod sunod ang presscon nga gipatawag sa Kapuso Network dinhi sa Sugbu niadtong milabay nga semana. Ang una nahitabo niadtong Biyernes sa Cebu Waterfront Hotel diin nahimamat sa E-Group ang regional TV head nga si Rikki Escudero. Pagka-ugma, bisan sa ka busy sa dagan sa trapiko mitekang ko sa Lighthouse Restaurant sa Gaisano Countrymall para personal nga mahimamat ang bag-ong mga hosts sa local show nga Istayl Nato sa GMA.

Pwes, magsugod ta sa natuki atol sa presscon with Ms. Rikki. As expected, subli niyang gipatim-aw nga kun duna man gani silay promotional activities sa Visayas and Mindanao kini tanan “legitimate, hayagan ug publicized.” Dili na lang ko magdaghan og yawit labot niining ratings controversy kay gisamokan na ko niini actually. Pak! Bitaw, adto na lang na sila sa husgado mag-abot oy, dili na nang mag-isig pahumot on national television.

May tama ka! Naniguro ko og pangutana ni Ms. Rikki unsay estado sa ilang local shows, ug kay nahisgutan na man lang ang ratings, dinhi napunting ang akong atensyon. As in punting gyud ang drama! Bitaw, ganahan ko aning mga taga GMA-7 kay ka level mi nga “call a spade a spade” ang mugna, kun unsay tinuod maoy isulti ug wala nay mga buwak buwak pa.

Kay ngano diretso gyud nga giangkon ni Ms. Rikki nga nangamote pa gyud ang ilang early morning show nga “Buena Mano ,” pero kun sa sinugdanan nakapahat lamang kini  og 2.3% rating, sa labing uwahi nga survey mitala na kini og 4.5%. Ang kaatbang nga show, “Maayong Buntag Kapamilya” dunay 6.3%, dason usab ni GMA-7 Cebu station manager Ann Marie Tan. “It’s still behind but we are not giving up, “ni Ms.Rikki pa. Pero dugang pa niya, dili kini kahibudngan sanglit sila kaniadto sa Unang Hirit, nagpaabot og upat ka tuig, una niini nabuntog ang kaatbang nga programa. Aminado siya nga naandan na sa televiewers ang pagtan-aw sa mga shows sa ABS-CBN tungod kay “10 years kaming nawala eh. It’s that habit that we are trying to break.”

Gipahibawo niya nga dunay mga kabag-ohan nga mahitabo sa Buena Mano, base usab sa “minute by minute rating,” diin natumbok nila kun unsay mas labing ganahan sa mga tumatan-aw.

Kalabot usab sa Balitang Bisdak, butyag niya nga talandugon ang rating niini. “Sometimes lumalapit sometimes lumalayo. Bobby remains to be our greatest strength.” Dungan niini, nakaingon si Ms. Rikki nga lahi gyud og taste ang mga Sugbuanon tungod kay gusto niini ang mga balita sa politika, samtang gipaambitan usab niya nga ang mga Ilonggo ganahan og police stories ug ang mga Davaeño interesado sa mga balita may labot sa hulga sa peace and order. Dinhi iya usab nga gitin-aw nga bukas pa ang entertainment segment sa Bisdak, nga bisan og epektibo si Cecil Quibod nga segment host, kinahanglan nila nga i-pull out tungod kay labihan na ka hago niini, gawas pa buot nila nga ma-develop ang nahisgutan isip banggiitan nga journalist.  Gitin-aw usab niya nga mibalik sila sa naandan nga 30-minute newscast sanglit dehado sila’s kontra diin game show ang giatbang nila. Niya pa, alkanse sila tungod kay kun modaog og P2M ang player sa game show sa ABS-CBN, good-bye na gyud sila. Gusto ang  management ni Ms. Rikki pa, patas ang laban pinaagi sa pagpasungag og shows nga  susama og format.

“Istayl Nato”

 Sama sa balita dinhi sa Banat Hugyaw niadtong Biyernes, karong Domingo na gayud molugwa, 10:45 sa buntag ang bag-ong lifestyle/travel show sa GMA-7 diin hosts sila si Anna Maris Igpit ug Chad Burden. Hugyaw ang Audio Video Presentation o AVP nga nasaksihan sa mga sakop sa Cebu ug Manila press nga nagtapok diha sa Lighthouse Restaurant sa Countrymall, diin gipakita ang pipila ka mga talan-awon nga nindot kaayo ang angle sa camera. Its something to look forward to, maoy hinungdan nga nakapakpak ko og dili oras. Pak!

Bitaw, tsika ni Regional Entertainment TV program manager Jocelyn “JB” Bautista motadlas sa Tungatungang Kabisay-an ang “Istayl Nato,” aron pagkaplag sa nagkadaiyang talan-awon, istilo ug daghan pa sa nagkadaiyang dapit. Daling namalibad si Ms JB dihang akong gipangutana kun ang MagTV ba maoy hinungdan nganong nag-reformat sila. Niya pa, pildi sa Oi! Show Nato ni ang kontra, pero wala nuon ko makapangayo og figures o rating. Anyway, miingon si Ms. JB nga “its about  time” nga mopadayon sila sa sunod nga ang-ang tungod kay kanunay man usab sila nga dunay variety shows, busa karon na ang panahon nga mga nagkadaiyang dapit ug mga estilo na usab ang ilang ipaila.

Samtang si Anna, miingon nga excited siya nga nakuyawan tungod kay una kini niyang TV show, duna na nuon siya’y hosting experience sukad pa sa high school pa lamang siya sa St. Theresa’s College hangtud na nga nahimo na siyang Bb. Pilipinas-World. Ang akong friend nga si Troy Ciar sa Superbalita, nagsige og pangutana ni Anna kalabot sa iyang relasyon sa businessman nga si Glen Soco, nga matud pa sa nahisgutan supportive niya. Mikatawa ang babaye dihang akong giintriga og kanus-a preparasyon na ba kini sa iyang pagka first lady unya sa Mandaue, City. Pagka taod taod miabot si Chad sa among lamesa human usab siya gihinabi sa Manila press busa ako siya’ng giingnan nga kinahanglan niya nga magtuon og Bisaya karon nga main host na gayud siya, diin mitubag siya nga inanay na siya nga nagkat-on. Nagdungan mig react ni Sir Roger Serna, dihang miingon si Chad nga mag-Tagalog siya usahay sa show. Pwes, amo siyang giingnan nga wa mi kauyon. Pak!

 Gitino ni Chad nga tinuod nga papirmahon unta siya sa GMA Artist Center og management contract human siya naapil sa Final 20 sa Starstruck Batch 4 pero mihukom siya nga mopauli dinhi sanglit “he loves Cebu.” Tsar! Mao ra gyud kaha nay rason or apil pud ang fact nga Cebuana ang imong love? Pak

Of course si Anna balik Southwestern University isip B.S. Tourism sophomore, ug niya pa manghangyo na pud siya sa iyang mga maestra nga sabton siya kun dunay taping. Iya hinuon giklaro nga very supportive ang iyang mga professors sa SWU. Mitug-an pud siya nga gitanyagan siya para Buena Mano pero wala mahinayon kay duna pa siya’y laing commitment adtong higayona bisan pa man og interesado pud siya nga sudlon ang News and Public Affairs. Pwes, karon dili lamang siya beauty queen, student ug sakop sa Models Association of Cebu, TV host na pud siya. Hugyaw ha!

Hala atong atangan mga OkRyanian’s kining “Istayl Nato” karong Domingo na! Sama sa akong segi og balik balik, kadaugan natong mga Sugbuanon kun dunay bag-ong local show, busa manan-aw lang gud ta. Pak!

Ugma diay, atangi pud dinhi sa Banat Hugyaw kay nagkatsika mi nila ni Jason Abalos ug Matt Evans last Saturday.

Text mi gihapon my dear OkRyanians sa 09295886046. As usual include your name and address. Ug magdungog gihapon ta matag Lunes hangtud sa Biyernes, 3-4pm sa dyLA 909 khz. Pakpak!