Dakong sorpresa ngadto sa kadaghan nga mitan-aw sa Big Night sa Pinoy Big Brother Celebrity Edition, ang pagdaog ni Ruben Gonzaga of Davao isip Big Winner niadtong Sabado sa gabii sa Araneta Coliseum.
Kini tungod kay sayo pa lang, ang migawas nga tsika mao nga ang nagtigi gayud og maayo sa text votes mao sila si Gaby de la Merced ug si Riza Santos.
Apan, nailog ni Ruben ang simpatiya sa publiko busa nagsugwak ang iyang boto, nga maoy naghatud niya ngadto sa kadaugan.
Nakakuha si Ruben og 506,402 votes (32.17%), nga gisundan ni Riza Santos sa ikaduhang puwesto nga dunay 430,135 votes (27.33%); pero ang paborito sa hapit tanang audience nga nagpunay og siyagit sa sulod sa Big Dome — si Gaby de la Merced—naa sa katulong puwesto lang ug nakakuha og 406,892 votes (25.85%) ug ikaupat mao si Will Devaughn (230, 509 o14.65%).
Kagahapon sa The Buzz, gipadayag ni Ruben nga laraw nilang tibuok pamilya nga mobalhin na og puyo sa Manila, ngadto sa balay nga usa sa iyang mga premyo.
Sila si Riza ug Will desidido nga ipadayon ang ilang pagpanimpad sa showbiz, samtang si Gaby buot nga padayunon ang iyang hosting career gawas sa iyang pagka-car racer.