Hindi namin alam kung alin ang nauna sa desisyon ng GMA-7 na palitan sina Jennylyn Mercado at Patrick Garcia nina Nadine Samonte at Polo Ravales sa Maging Akin Ka Lamang o ang kagustuhan ni Jennylyn na mag-lie low sa showbiz habang lumalaki ang tiyan.
Ngayong Sabado na magsisimulang mag-taping sina Polo at Nadine, dahil malapit nang umere ang Maging Akin Ka Lamang at 40 sequences ang kailangang i-reshoot ni direk Gil Tejada. Pati sina Isabel Oli at Carlo Aquino ay magre-reshoot din at may mga eksenang kasama sila nina Jennylyn at Patrick.
Hindi pa namin nakakausap si Nadine, pero si Polo ay masaya na may kasunod agad siyang project at okey lang sa kanya kung kapalit siya ni Patrick. Unang team-up nila ito ni Nadine at umaasang tatanggapin sila ng viewers.
* * *
Ayaw pa ring pag-usapan ni Sunshine Dizon ang kanyang lovelife, kaya hindi nakumpirma kung break na sila ni Jojo Manlongat, gaya nang naglabasan. Sa iba namin nalamang nagkaroon lang sila ng matinding away at ngayon ay back to normal ang kanilang relasyon. Nakikita raw si Jojo na muling dumadalaw sa bahay nina Sunshine sa White Plains, patunay na sila na uli.
Magtatapos na ang La Vendetta sa January 11 at wala pang makuwentong next project si Sunshine. Hindi pa raw siya ipinatatawag ng management ng GMA Network at binigyan ng go signal na magbakasyon for one month.
Kaya lang, kumalat na sa press ang next soap na gagawin ng actress, drama uli ito at sinabi na sa amin ang title, pero hindi muna namin isinulat hangga’t ‘di kumpirmado. Ang masasabi lang namin, malulungkot ang fans ng isang actress na nag-i-expect na sa idolo nila ibigay ang malaking project.
* * *
Positive ang comment ng mga kasama ni Jennylyn Mercado sa La Vendetta sa kanyang pagbubuntis, pati ibang kaibigan nito sa showbisz ay maganda ang mga ipinahayag.
Namukod tangi lang ang comment ng isang actress at talagang natawa kami nang mabasa. Sabi ba naman ng hitad, hindi pa rin siya naniniwala at hihintayin niyang lumaki muna ang tiyan ni Jennylyn. Baka raw bawiin nito ang inaming pagbubuntis.
May mga binanggit na example ang actress ng mga “Diumano’y nangyari kay Jennylyn, pero iba ang totoong nangyari. Basta, tawa kami nang tawa nang mabasa ang text. Mahirap lang idetalye at baka magkagulo.