Sa kadaghan nang mga banda nga natukod, ma-Bisrock man o dili, normal na lang sa panghitabo nga adunay mabungkag ug duna say molahutay sa gidugayon sa panahon bisan pa man sa masugatang mga pagsuway.
Hasta gani kadtong mga banda nga establisado o sikat na ug nakakulit na sa ilang ngalan sa natad sa industriya sa musika, nabungkag o nagbuwag man gani gihapon, unsa pa kaha ang mga grupo nga bag-o pang subol. Usa ka pananglitan, kinsay magdahom nga mabungkag pa ang legendary Pinoy rock band nga Eraserheads sa kaulohan? Unsa kahay nasulod sa utok nilang Ely Buendia (vocals/rhythm guitars), Raymund Marasigan (drummer), Buddy Zabala (bass guitar) ug Marcus Adoro (lead guitars) nga silang upat nagbuwag man? Nga kun buot hunahunaon, ang ilang kasikat o kainila labaw pa unta sa kuwarta bugti sa way kamatayong mga kanta nga natampo nila sa arte sa musika. Lain pang sikat ug maingon natong lig-on sad og pundasyon ang haligi apan nabungkag lang gihapon mao ang bandang Rivermaya. Ambot sad kun sa unsang hinungdan nga kalit mang mibiya si Rico Blanco sa grupo nga una nang gibiyaan ni Bamboo.
Sa lokal nga kasikas sa musika dinhi sa atoa partikular na sa Bisrock, daghang bisrockers ang nakamatikod nga upat na lang ka membro ug bag-o na ang bahista sa Brain Damage — ang bandang nagkompos sa Bisrock hits nga “Tabanog” ug “Papilit”. Sukad atong gigs diha sa Carcar niadtong Disyembre 1 ug sa Barili niadtong Disyembre 8 ning tuiga, daghan ang nahibulong nganong wala na atol sa ilang pag-perform ang magsoong Reynan ug Ryan Alqueza, kinsa maoy orihinal nga bahista (Ryan) ug gitarista (Reynan) sa maong banda. Kun atong panid-an, kini ra bang Brain Damage inanay na untang nakakulit sa ilang ngalan ug ilado na sa mga Bisrock fanatics bisan wa pa sila maka-album. Ug anugon lang kun kini dili nila pahimuslan. Unsa kahay nagpahiping mga rason nganong naingon ini sila karon?
Dihang nakahigayon og pakighinabi ang Banat Hugyaw kang Christian Ando (bokalista), wa mapugngi ang pagpakisayod kun hain na sila si Reynan ug Ryan. Si Christian wa magduha-duha pagtug-an nga aduna diay nahitabong di maayong pagsinabtanay sa orihinal nga mga sakop sa Brain Damage. Kini may kalabotan sa presyo sa talent fee nga ilang dawaton sa higayon nga dunay modapit kanila aron patokaron. Hinuon, wa kaayo idetalye sa bokalista ang labing unod sa hinungdan apan siya miingon nga ila karong gipaningkamotan kutob sa ilang mahimo nga mauli ang maayo nilang kabubut-on tali sa duha ka managsoon. Giangkon sad sa laing duha ka orihinal nga sakop sa Brain Damage nga sila si Jade Rubie Luna (gitarista) ug Janel Ernie Quizon (drummer) nga lahi ra gyod ang ilang “chemistry” sa pagtokar ibabaw sa entablado uban sa managsoong Alqueza, kay lagi, sila man gyod ang kauban nga responsable sa pagkatukod sa banda. Pero kun showmanship ug pagkablit lang sa bass guitar maoy hisgotan, di sad mabiya sa tapad kining ilang bag-ong bahista sa Brain Damage. Maila kaayong eksperto na sad ni ibabaw sa stage. Kaingnon pa, wa say kurat! Pabalitokon sad ang instrumento kun magkinaunsa. Hinuon sa gihapon, manghinaot lang ta nga nahilot na karon ang “piang” nga nasinati sa bandang Brain Damage.