Bisrock Concert nga gipasiugdahan sa ‘Mga bata’
Kun duna may dapit sa Sugbu diin daghang mga batan-on ug hamtong ang natakdan sa dili na gyod mapugngang pagkuyanap sa “kagaw” sa Bisrock, tingali, di sad papiri ang lungsod sa Barili. Kay ngano? Nag-iyahay man god paggimaw karon diha sa maong lugar ang daghang banda nga nahigugma ug nagpakitag labok sa musikang Bisdak. Klaro na kaayo sa pattern ang kadako sa ilang potensiyal nga makatampo pagpatunhay sa atong musikang Binisaya. Kana kon matudloan lang sila ug maggiyahan sa saktong pag-agak.
Tungod niini, ang “MGA BATA” kun Mga Grupo Alang sa Barilihanong Arte, Talento ug Abilidad— hugpong sa mga grupo nga gilangkoban sa nagkadaiyang pundok sa mga batan-on, hamtong ug edaran nga naghupot og talagsaong talento sa pag-awit, pagsayaw, pagtokar (sa banda), dula sa entablado o drama ug uban pang abilidad nga sarang makatampo pagpalipang sa Bisayang kultura sa maong lungsod, nagpahigayon og usa ka dakong fund raising concert niadtong Disyembre 8, 2007 diha sa dakong hawan sa Barili Public Plaza atol sa kapistahan sa ikaduhang patron sa lungsod nga mao ang Mahal nga Birhen sa La Purisima Immaculada Concepcion. Giulohan ang maong kalihokan og “No Ticket, No Entry” Bisrock Concert for a Cause. Tumong sa maong aktibidad nga makatigom og igong pundong salapi nga igasto sa gitinguha nga labing unang Bisrock Songwriting Seminar nga ipahigayon sa sunod tuig. Sa tuyo nga maagak ug maggiyahan ang bag-ong subol nga mga Bisrock bands sa maong dapit sa saktong paggamit sa Bisayang pinulongan diha sa ilang pagtagik og mga kanta. Nakita man god nga kini gyod ang kasagarang suliran nga giatubang karon sa mga bag-ohang banda ang paggamit sa kaugalingon natong pinulongan. Sama pananglit sa pulong “taga” nga gigamit na isip “taga kaon” ug “taga buntag o taga udto” imbis unta “matag kaon” ug “kada buntag o kada udto” ang paggamit niini nga sakto.
Astig ug mga payter ang mga banda nga nanokar atol sa maong gig. Aw, kinsa kahay wa magpanikad pag-jam sa numero unong banda sa Bisrock nga Missing Felimon!? Hinuon dili kini ang unang higayon nga nanokar diha ang parokya ni Insoy, kondili, ikaduha na nila kadtong higayon nga nakigrakrakan sa mga Bisrakers sa Barili. Una nilang pag-perform nahitabo niadtong miaging tuig 2006 sa samang petsa, dapit ug okasyon. Nanokar usab niadtong gabii sa Disyembre 8 ang nag-anam na kainila nga mga Bisrock bands sama sa Radstuff , Brain Damage ug God Smugglers. Ug siyempre, wa gyod magpalupig ug nakigduyog sa rakrakan ang bag-ong subol nga mga banda sa Barili sama sa 1+1=Zero, Krazy Goblinz, Kaylu, Oikos, Adlib Slot, Sticky Fingers, Necodemos ug Replica. Nipakita usab og labok ang laing tulo ka banda nga mao ang Dugho’s Tribe, Slightly Used ug Tukasa.
Ang maong paglanogay sa musikang Bisaya sa lungsod sa Barili niadtong halandumong gabii sa Disyembre 8 ning tuiga gipangunayan gyod pagbudlay aron matigayon pinaagi sa duha ka batan-on nga dili ikalimod ang gugma sa Bisayang musika nga sila si Joel “Awie” Tubilan ( drummer sa Radstuff ) ug Julipher “Tawawa” Genterone ( bokalista sa 1+1=Zero ). Apan wala usab magpabaya ang nagpakabanang mga lokal opisyal sa maong dapit kinsa andam kanunay ug tagana pagsuporta sa kaugmaran sa talento sa ilang mga batan-on. Kamatuoran niini, aduna nay gipahigayong labing unang Bisrock Musiklaban diin giabaga tanan sa mga barangay opisyal ang galastohan sa barangay Guibuangan (nahimutang distansiya lag diyotay sa Poblacion), ug
Ang “No Ticket, No Entry” Bisrock Concert for a Cause sa malambuong lungsod sa Barili niadtong Disyembre 8 ning tuiga wala magpasabot nga wa gyod katan-aw kadtong wala gyoy ikaabot pagpalit og tiket. Kay sa hilom, nagreserba man ang “MGA BATA” og 500 ka tiket nga ilang sekretong gipanghatag niadtong buot gyod motan-aw sa nahisgotang concert apan wa lang gyoy diyot bisan usa-ka-dako sulod sa bolsa. Kay tagpila man gyod diay ang tiket atong gabhiona? Sus, tag 20 pesos ra!
- Latest
