Inanay nga pagtekang sa hagdanan sa kalampusan

Mga kabischika hello ninyong tanan! Karong adlawa malipayon ko  kay usa na pud ka dance group ang akong ipaila-ila. Bisan sa ilang kalayo dinhi sa dakbayan sa Sugbu natagaan nila og panahon ang inyong Yurs truly para ilang ma-share ang ilang mga pagsuway para mas magdugay sila sa natad sa pagsayaw, sa entablado man o sa tinuod nga sayaw sa kinabuhi! Pahimutang kay ania na ang dance group all the way from Sibonga, Cebu—Prime Sensation!

Duha palang ka tuig ang dance group nga Prime Sensation sa natad sa pagsayaw. Ang tinuod dili gayud sila tantong bag-o  kay namugna sila niadtong 1999, apan lahi ang ngalan nga ilang gidala—Prime Movers. Pero sa pagligid sa mga adlaw kinahanglan nila nga mosakay sa unsay kabag-ohan aron ma-swak sa mga bag-ong panghitabo sa atong palibot.

“Prime Movers mao ni ang karaan nga name sa original members,” pahiunang BisChika ni Jonald Angelo Manubag, ang usa sa mga orihinal nga miyembro sa grupo ug kasamtangang choreographer sa grupo. Gitawag nilang Prime Movers sa una, meaning “high or on top”, ug giilisan sa Prime Sensation kay para kini sa mga bag-ong miyembro nga mas bata ug hilig ang pagsayaw.

Dili nila malimtan ang mga pagsuway sa dihang nagsugod pa ang Prime Sensation kay kaniadto hapit wala pa silay mga costume. Pero wala kini mamahimong babag para nila. Gani sa sige nilang pag-apil og mga contest nga silay makadaog, hinay-hinay silang naka-angkon sa mga costume nga para magamit nila sa mga raket.

Para sa grupo inspirasyon nila ang Maneouvers Dancers. Ang tatak sa usa ka Prime Sensation mao ang gitawag nilang “anger style” ug hiphop.

Para sa ilang choreographer nga si Jonald, ang pagsayaw parte na sa iyang kinabuhi. High school pa lang siya, nabaid niya ang iyang talento kay aktibo siya sa mga school activities. Bisan aduna na siyay kapikas sa kinabuhi, ang gugma sa sayaw iyang gipaambitan sa mga miyembro sa mga Prime Sensation.

Ang iyang hangyo sa mga bag-ong miyembro nga dili nila pakyason ang mga pangandoy sa pagsayaw. Kinahanglan una nilang buhaton ang pagsunod sa mga “rules and regulations” sama sa dili magbisyo and always practice to be on time.

Ang iyang pangandoy nga unta sa umaabot pang mga tuig mas molambo ang ilang grupo. Para sa maong grupo sa pag-apil sa Luvyugan sa Oi! mao ang dakong hagit   bisan wala nila nalangkat ang titulo. Para nila ang kasinatian dili kabayran og pila lang nga kantidad sa salapi kay para nila mamahimo kini nilang giya sa mga umaabot pa nga mga indigay.

Mapasalamaton sila nga sa pagkakaron dako kaayo ang suporta nga gihatag sa ilang lokal nga kagamhanan sa Sibonga hilabi na sa ilang pinalanggang mayor nga si Mayor Lionel Bacaltos nga maoy nagsuporta sa mga kinahanglan sa grupo gikan sa mga costumes ug uban pa. Mao nga buhaton nila ang tanan nga hugyaw gyud pirmi ang ilang mga performance kung adunay modapit kanila.

Para ni Jonald dili lalim ang mamahimong “kuya” sa tanan hilabi na ang ubang miyembro mga pasaway pero happy siya kay iya kining contribution sa ilang lugar para sa mga kabatan-onan nga dili maadto sa mga dautang buhat.

Sa pagkakaron modawat sila og mga miyembro sa mga nadasig nga mapakita ang ilang talento. Ang qualifications? Adunay hilig sa sayaw!

Para kang Jonald hangtud kaya pa niya dili siya moundang sa pagpaambit sa iyang talento kay kun unsa niya kamahal ang iyang asawa mao pud ang paghigugma niya sa pagsayaw. Para sa mga miyembro nga silang Jeff Geraldizo,Ross Daryl Rivera, Jermaes Cabante, Cris Jay Corias, Jerry Silva Jr., John Denver Geraldizo, JL Janson,Clarence Quinto, Ryan Enriquez, Jay-r Gandionco, Jedmark Alaban, Em-em Domiquel, ayaw kalimot sa mga tawong nahimong instrumento aron sa hinay-hinay  makab-ot ang inyong mga pangandoy.

Para sa mga mokuha sa serbisyo sa Prime Sensation pwede ninyo makontak sa # 0922-9010369 pangitaa lang si Jonald Manubag.