Managsoong Anthony ug Jojo sa Phylum ug Aying sa Session of the Fighters

Ang  mga tipik sa kasingkasing sa mga kabatan-onan karon nahigugma sa binisayang mga sonata nga adunay mga kasikas sa instrumentong inubanan sa “rock genre” ug mga hinagoang liriko nga kasagaran mohapak sa linghod nga pagbati sa mga kabataan. Kining penomenal nga mikuyanap diri sa Sugbu ug lakip na sa ubang dakbayan sa Kabisay-an, maoy nag-alarma sa karera sa ubang mga tiggama og pasundayag sa bisan unsang aspeto sa kalingawan.

Ingon sila nga mas sadya sud-ongon sa usa ka grupo nga adunay puparehas og kamay-ong. Pero naa’y mga magsoon sa industriya sa musika nga bisan sa ilang makapasinang “bonding” sa tinud-anay nga kinabuhi, managlahi gihapon ang gi-amomahan nga banda. Pareha sa gwapong si Yael Yuzon nga gitarista/vox sa sikat kaayong bandang Spongecola, nga close kaayo sa iyang rakista pud nga igsoong si Yan Yuzon, apan sa bandang Pupil gihalad ang iyang talento isip lead guitarist. Ug dili lang sila ang magsoong nga adunay tim-os nga panaghigalaay pero nagkatibulaag sa lahi-lahing banda, hasta usab ang managsoong Dok Sergio (Pupil) ug si Japs Sergio (Rivermaya) nga puros bihasa sa pagpatingog sa makabungog nga lagubo sa bass guitars. Duha lang kini ka paresan sa magsoon nga rakista diri sa Pilipinas nga mipalutaw sa ilang kangilngig isip mga musikero.

Dinhi sa siyudad sa Sugbu, aduna pu’y mga rakistang magsoon  nga managlahi ang gialagaran nga banda, apan gihiusa gihapon sa paghigugma sa pagpalanog sa ilang gustong mahiaguman. Sama nalang ni Ariel “Aying” Talledo (vox/gitarista) sa Session of the Fighters, nga igsoon nilang Josephus “Jojo” (tambolista) ug Anthony (bahista) sa bandang Phylum nga nagkasinabot gihapon sa pagdiskubre sa kalibutan sa musika, bisan paman managlahi ang banda nga ilang gibatonan sa ilang talagsaong talento ug kamaayo sa pagpanukar.

Si Aying ang kinamaguwangan sa tanan, nahimugso niadtong Agusto 28, 1978, misunod si Jojo niadtong Septiyembre 15, 1979, samtang si Anthony niadtong Oktubre 8, 1984. Aduna pud kini sila’y laing igsoong lalaki nga gihinganla’g Marlou. Mao kini sila ang mga buotang anak sa magtiayong Anno Talledo ug Florida Binghay-Talledo nga mga lumulupyo sa Bontores St., Basak San Nicolas sa siyudad sa Sugbu.

Misugilon ang kinamaguwangang si Aying nga sukad sa gagmay pa sila, close na jud kaayo ang ilahang bonding. Tungod sab siguro nga puros gayod sila mga lalaki ug dug-ol ra ang antaw sa ilang mga edad. Mga sipat ug permi lang mabunalan sa ilang lola kaniadtong nagtungha pa sa mga gagmay pa sila. Sa matag bakasyon, magkatapok silang magsoon kauban sa ilang mga ig-agaw ngadto sa balay sa ilang Lola Ebyang nga inahan sa ilang Mama sa probinsiya sa Pinamungajan. “Sa una pakan-on jud mi sa among lola og tinughong, tagsa-tagsa jud mi og panaksan kana pa jung dako nga panaksan”, pasiuna ni Aying. “Unya dili man mi kahurot sa sinukad ni lola, so mao to among ipanghagtak ang tinoghong sa silong kay naa man mga iring ug mga manok sa ilawom sa sawog nga kawayan”, dugang pa ni Jojo nga inubanan og dagkong katawa sa iyang mga igsoon nga nakahinumdom sa ilang kasiaw sa una. Kasagaran nilang pabadlung kay mahitabo anha gayod sa kan-anan kay maglinabayay sila og lugaw, nga maabot sa punto nga magkamuritsing silang tanan ug mabunalan na hinoon sa ilang lola Ebyang.

Gisugdan nila ang pagkat-on sa pagdala og gitara sa nag-edad palang sila og 14-15 anyos. Kinaugalingon ang ilahang pagdiskobre sa mga tono, ug kay wala paman sila’y ilang kaugalingong instrumento niadtong tungora, adto ra nila gahinan og oras sa balay sa ilang kaig-agawan ang paggitara. Si Jojo diha ra nagkat-on paghapak sa drums nga nagpangidaron na siya og 20 anyos. Sila-sila ra ang naghimo sa ilahang gitawag nga “combo-lata” gamit ang mga karaang gallon aron ingnon nga mura sab kini og tinuoray nga drumset. Astig sab kaayo kini si Anthony kay diha ra siya nakat-on og kupot sa bass guitars sa dihang siya ang gikuhang bahista pagsugod og tukod sa bandang Phylum. Hinoon, hanas naman sad kini siya kaayo sa pagkitiw-kitiw sa gitara, mao nga dali ra siya nakat-on sa instrumento nga maoy sumpay sa iyang imahe karon. Dili pud palupig ang ilang maguwang nga si Aying, kay bisan paman anaa siya sa lahi nga banda, payter pud kaayo kay siya man ang nagsilbing haligi sa bandang Session of the Fighters. Ang ilahang mga impluwensiya mao ang The Beatles, Incubus ug ilang kababayan sa Pinamungajan, ang Missing Filemon.

Mahibulong siguro kamo nganong wala nakighiusa si Aying sa banda sa iyang mga manghud. Kini tungod kay katong mga panahona nga nagsugod pa lang ang Bisaya Rock, bag-ohay pang nakagraduate si Aying sa University of the Visayas sa kursong Architecture. Sa pagkatinood, aduna sila’y showband kauban iyang manghud nga si Jojo ug iyang agaw nga si Ton-ton (lead guitarist sa Phylum) sa una. Ug kadtong nakatrabaho na siya, miundang siya sa maong banda ug gigahinan sa unang prayoridad ang pagpanginabuhi.

Sa paghiabot niya ngari sa Sugbu gikan sa halayong dapit sa Mindanao nga diin didto siya nadestino sa iyang trabaho, nainganyo siya sa makabag-ong witik nga gipakita sa mga bandang bisaya. Kay ang musika man gayud ang una niyang gihigugma, mao nang nagtukod siya og iyang kaugalingong banda nga mao karon ang gitawag nga Session of the Fighters. Ganahan unta siya nga babaye ang bokalista sa banda, apan wala man siya’y nakaplagan mao nga gisuwayan niya nga samtang magitara, siya usab ang tingog nga mopalanog sa iyang mga obra o mga komposisyon.

Sa mga bisan asa nga gigs nila karon, mabantayan siguro nato nga magkakuyog jud ang duha ka banda, ug bunga usab kini sa ilang pagsuporta sa usag-usa. Daghan pud sila’g mga pasundayag nga dili nila makalimtan. “Ang katong gig namo sa Palompon, Leyte kay usa jud to sa mga the bests nga among naadtoan. Kay ginam kaayo mi ngadto ug gisuroy-suroy pud mi sa nagkalain-laing lugar sa resort”, paghinumdum ni Jojo. “Niadto diay nang November 27, 2006. Pagustoan mi sa among ganahan, then ila pud ming gipataak sa usa ka isla ngadto nga aduna’y Giant Bat Kingdom nga pwerti jud namong lingawa”, dugang pa ni Aying nga nakakuyog sab niadtong tungora kauban ang iyahang bandmates. Apan ang dili makalimtan ni Anthony mao katong adunay MOR Bisrock Awards sa Tabunok, Talisay kay wala na sila katokar tungod sa kagubot nga nahitabo. “Didto nalang namo nakuha ang among awards sa backstage kay naundang naman ang show ato”, saysay pa ni Anthony nga nagkatawa sa maong kasinatian. Ug ang bag-ohay nga nahitabong dakong kalingawan niadto lang Oktubre 20, nga ang duruha ka banda apil sa maong kalihokan sa Bay Break nga gi-live sa Studio 23.

Sa mga nag-unang mga adlaw nga miuso ang Bisrock, makabantay man sab  siguro ang mga nag-unang tigpaminaw  sa Smash nga maoy unang nagpalanog sa mga kantang binisaya gikan sa mga bandang uhaw sa pagtagad nga madunggan. Nakasaksi usab kita sa Phylum sa ilang “Palagot sa Kontra” nga mao gayo’y unang kanta nga ilang gipasikat. “Hapi kaayo mi ato nga time nga nadunggan namo ang among kanta, wala mi katoo, lipay jud kaayo mi”, paghinumdum ni Anthony. Dako sab  kaayo ang kalipay nga nahiagoman ni Aying sa dihang nagsugod napud og tim-aw ang ilang mga gisumite nga mga kanta ilabi na sa ilang “Ayaw Padala sa Tama” nga maoy unang nagtatak sa ilang banda.

Ang mga pasalamat sa managsuon ngadto sa ilang mga ginikanan nga bisan dili hingpit ang pagsuporta ngadto kanila, pero proud usab kaayo kini sa ilaha. Ngadto kang DJ Ram Dizon, sa tanang FM stations nga nagpatokar ug mga bisayang komposisyon ug sa mga tawo nga padayon gihapon nga misuporta sa mga bisaya nga banda.

Adunay umaabot nga ikaduhang album ang Phylum nga gilangkoban og 14 ka tracks, samtang ang album sa Session of the Fighters mapalit na sa Manu, 2nd floor sa Emall ug aduna kini 10 ka nagkalain-laing kanta.