Eat Na Ta!

Karong adlawa, 11:30a.m.-12n molugwa na sa lokal nga telebisyon ang labing bag-ong game show nga gitumong alang lamang sa mga Sugbuanon ug mga bisaya. Kini mao ang Eat Na Ta, nga dalit sa TAPE Inc., naggama sa longest running variety show Eat Bulaga. Sama sa nabalita na dinhi sa Banat Hugyaw sa milabay nga Sabado, pormal nga gipaila ngadto sa E-Group ang tulo ka mga hosts nga moduma sa programa—Papa Joe, Cutie del Mar ug Cerg Michael.

Upat ka mga segment ang maglangkub sa maong programa, “Itaktak Gyud,”diin ang player dunay kahigayonan nga modaug og P20,000 o makatekang sa Eat Bulaga aron mosalmot sa Taktak Mo o Tatakbo diin P1M ang nagpaabot isip jackpot prize; “Itaas…Iubos! Imong Bulsa Mabdos” diin dunay premyo ang masakpan nga nagtan-aw sa maong programa diha sa nagkadaiyang panimalay; “Ang Akong Pangandoy,” diin dunay suwat hangyo nga hatagan og katumanan; ug ang “Kwarta Na Ni” diin ang bulahan nga texter makadaog og P300. Ang maong mga segments duna usay tugbang sa radyo nga mabati sa dySS Lunes hangtud sa Biyernes sa susamang takna.

Mismong ang EP sa Eat Bulaga nga si Malou Choa Fagar ang mitekang gayud sa Sugbu aron makighimamat ug mipaila sa maong programa ngadto sa entertainment press. Ang nakanindot ni Fagar mao nga walay pagpinig niyang giangkon nga nagmugna sila og ingon niini nga mga pasundayag tungod kay gilubong sa Wowowee ang EB dinhi sa Sugbu. Ang nakapasubo niya pa mao nga ang nailhan sa mga Sugbuanon mao ang Vic Sotto nga bida sa Okay Ka Fairy Ko kaniadto ug dili ang Vic Sotto nga host. Gisalikway niya nga nanundog sila sa pikas estasyon, kansang game show mao ang “Kapamilya, Winner Ka.” Suma pa nga dugay na kini nilang giluto ug gani ilusad na unta kini niadtong milabay nga buwan, apan gitun-an gyud nila og maayo unsay gusto sa mga Sugbuanon aron makaingon og “Lami Gyud!”

Political color?

Atol sa maong pakighimamat, si Cutie maoy gihansakan sa daghang mga pangutana. Lakip na niini ang intriga nga ang iyang pagdawat sa maong show, may kalabutan sa iyang laraw nga muhulip sa iyang amahan nga si Representative Raul del Mar sa umaabot nga piniliay sa 2010.

Nagsugod isip anchor sa GMA Network News, matud ni Cutie nga dugay na niyang pangandoy nga makabaton og public service program ug ang Eat Na Ta, diin siya maoy mogunit sa “Ang Akong Pangandoy,” ang para niya mao nay tubag. Dili usab talent fee ang basehanan niya pa, tungod kay ang iyang kagustuhan gyud maoy nagpasulabi, ingon man ang gugma niya sa trabaho.

“Whether we do the show in the north or south district, it doesn’t really matter. And they (TAPE) got me not even knowing about my possible intentions of running in three years,” tug-an pa niya.

Suma pa niya tungod sa Eat Na Ta mas daghan na ang iyang higayon nga makabisita sa Sugbu ug makig-uban sa iyang pamilya sanglit sa Manila na siya nagbase sulod sa daghan na nga katuigan.

“The talent fee is good enough. Actually it’s never really about the money. If were going to talk about the talent fee my first job for Repertory Philippines was P150, that’s not even enough for parking. It’s really the love for it, I love to host, this is the kind of work I like. I don’t even feel like I’m working, we were there like 10 a.m. to 5 p.m., I didn’t even have time to eat lunch but it does not matter. I was happy,” tin-aw pa niya.

Wala siya mipailawom sa audition, ang negosasyon nahitabo tali ni Choa ug sa talent manager nga si Shirley Kuan. Butyag pa ni Cutie, gisibog una niya ang iyang kagustuhan nga mobakasyon sa Europe kauban ang duha niya ka suod nga higala gikan sa Los Angeles tungod kay nag-awas ang iyang gugma alang sa Eat Na Ta.

“I’m not really interested in competing. I only interested in doing the best we can,” tubag niya dihang gipangutana unsay expectation niya kun magsungag na ang Eat Na Ta ug Kapamilya, Winner Ka, sugod karong buntag.

Sa pagpadayon sa presscon, hingpit na nga gipangutana sa Banat Hugyaw ang ilang kagahapon ni Martin Nievera ug ang estado sa iyang lovelife pagkakaron.

“Oh my God, why are you asking the most intriguing question?,” pasiuna niya, dayong katawa. “The status of my lovelife is I am single again. I’m dating right now but not seriously seeing just one single person.”

Suma pa ni Cutie nga kaniadto pa wala gyud siya mutubag sa mga pangutana kalabot nila ni Martin, “but suffice it to say, we broke up May of last year.”

Bukas si Cutie sa mga pangutana, tataw nga dili na malimod ang iyang kasinatian sa pag-atubang sa camera ug ang iyang abilidad pagpakighugoy hugoy. Si Papa Joe usab nag-ugom og taas nga kasinatian sa panibya isip ang tingog luyo sa sikat nga programa sa dyRT, “Talk To Papa” matag hapon. Silang duha, plus ang dili usab malimod nga abilidad ni Cerge Michael isip stage performer maoy mo-agda ninyo og “Eat Na Ta,” sugod karong buntaga, sa pamasin nga makaingon ka og “Lami Gyud!”

Ubos sa direksyon ni Paolo Mercado, kansang background sa entablado dili kabintahaan; Kapuso ikaw maoy magbuot! Atangi.