Todo gyod diay ang pagpangandam sa 93.1 Smash FM alang sa ikaduhang anibersaryo sa “BisrocKabataan”, the authority in Bisaya rock music, kay molagbas pa ma’g Disyembre ang kasaulogan niini. To the highest level, kun sa showbiz jargon pa!
Nasayran nako gikan ni DJ Ram Dizon, pinaagi sa text message, nga gipahigayon na niya ang weekly countdown sa mga the “best of Bisrock music” in the past two years. Ug nga nahitabo na kuno ang series of Bisrock concerts tribute to the conceptualization of “BisrocKabataan” (formerly “Your Voice, Your Choice Tingog Kabataan”).
Niadtong Nobiyembre 10, gipahigayon ang Bisrock concert sa Mactan Grill sa dakbayan sa Lapu-Lapu ug nausban kini niadtong Nobiyembre 16. Karong Biyernes, Nobiyembre 23 anha gihapon ipahigayon ang konsiyerto sa Mactan Grill. Samtang duna pa’y naka-schedule sa Nobiyembre 30, Disyembre 7 ug 14 sa Zzubu Rock Bar nga naa mahimutang tungod sa obelisk sa Daang Colon. Kun mag-atubang ka’s Zzubu, naa sa tuong bahin ang Mabini Street samtang naa sa walang bahin ang Parian padulong ngadto sa Heritage Monument . Sa Disyembre 21 mahitabo ang dako nga konsiyerto (selebrasyon na sab kining matawag sa pagdanga-danga’s Pasko sa Pagkatawo sa Mesiyas) apan wala pa ma-finalize ang venue.
Nahimo akong kabahin sa tulumanon ni DJ Ram pinaagi sa usa ka imbitasyon nga may bendisyon usab ni station manager Marit Stinus Remonde. Mapasalamaton ko’s higayon kay bisan sa hamubong panahon sa akong pag-partner ni Ram sa natad sa pagpanibya may kalabotan ang Bisrock, nahimo kining mapuslanon. Ug tungod sa akong kasibot alang sa maong paningog, naka-organisar gyod og event ang Banat News pinaagi sa “Hugyaw Musika” Concert niadtong Agosto 19, bisan pa man og daghang mga pagsulay ang naagian sa Working Committee nga gisuportahan sab sa The FREEMAN Foundation, Deadspotters Society Volunteer Team (usa ka Bisrock clan), University of the Visayas Security and Safety Group, ni Sir Fred Bullecer - UV property custodian, sa mga kapolisan sa kuwerpo sa Parian, sa UV First Aid Team, ug sa 93.1 Smash FM crew – si Cris Remonde sa studio/DJ’s booth samtang silang Marciano Lapaz ug Cebu Institute of Technology on-the-job trainee Eric Silleza ang nagmaniobra sa gym aron ikahatod ang live nga broadcast sa maong konsiyerto nga nahuman alas dos na’s kadlawon.
I’m not even an authority in music apan akong nasukod niadtong tungora ang kalig-on sa nahitabong alyansa tali sa mga talento ug sa working committee. Malamposon ang paglingaw sa mga suki sa Banat News nga nagkugi og gunting og mga mastheads nga maoy silbing gate pass niadtong konsiyertoha. Mapasalamaton ko’s inyong pagtahod sa akong tingog!
Mapasalamaton sab ko’g dako sa lig-ong suporta sa mga suki namong magbabasa. Bisan pa man og daghan ang komento nga dili angayang tagaan og pagtagad kining mga bandaha kay kadto kunong tarong og pangutok dili kuno maka-appreciate sa mga kantang kinatok, bastos ug kinuwanggol. Actually wa lang siguro ninyo mamatikdi nga nabahin kining mga bandaha. Duna’y mga misakay sa bandwagon sa Bisrock aron matagad. Ug daghan sab ang mga estasyon nga willing mopatokar sa ilang mga kanta. Siguro, sa atong katilingban, naglabi lang gyod ang katok, bastos ug kuwanggol kay duna man sab mga disc jockeys nga nagpaluyo sa ilang mga kanta. Ug labaw sa tanan naa mong mahiligon sa pagpaminaw bisan katok, bastos ug kinuwanggol. Dili man siguro na manglipang kun wa ninyo paluyohi!
Sa “BisrocKabataan” ug ingon man sa Banat News, we want people to understand that along with our support to Bisrock comes our social responsibility. Bisan pa man og daghan na mi’g natabangan apan amo sang gilantaw kun angayan pa ba silang paluyohan hangtod ning mga takna-a. Human sa duha ka tuig, amo sab nga gi-assess kun nag-mature na ba sila sa ilang musicality, sa ilang direksyon, sa mga tema sa ilang mga kanta. Ambot kun nasabtan ba ni’s mga banda. Kawang ang pagsige og tuboy nila, kun sila mismo sa ilang kaugalingon wa makasabot sa ilang misyon ug sa ilang kamahinungdanon isip tigpalabang og usa ka mahinungdanong mensahe taliwala sa atong nagkaguliyang ug nagkakabus nga katilingban.
Two years na ang Bisrock Movement. Duha ka tuig nga puno sa pakigbisog. Puno sa pagsaway ug pagdayeg. Ang pangutana may selebrasyon pa ba kaha kitang paaboton alang sa ikatulo, ikaupat, o ikanapulong anibersaryo niini?
Since magsugod na ang akong maternity leave, tugoti nga ihiklin usa nako ang “Band Influence”. Salamat sa inyong pagsunod ning maong lindog ug sa inyong pagpangga sa Banat News. Atangi ang mga feature stories ni Jenicel Bathan Saludar may kalabotan ang Session of the Fighters, Absolute Failure, ug daghan pang mga banda.
Meantime, pinay_mangatkatay takes a bow!