Maglisod na karon sa pagsungasong sa kinatas-ang bahin sa pagpanglipang ang mga kinakusgang banda sa kaulohan dinhi sa kabisay-an tungod sa paghari sa Bisaya Rock nga mga tigpanukar.
Mokuha ug moambit og inilang mga grupo gikan ngadto ang mga tig-organisar og dagko nga mga kalingawan, apan lahi ra gayud ang mahakot nga pundok kun tatak Bisrock na ang pagahisgutan. Tataw na kaayo ang pag-ugmad sa entablado sa mga kinaham natong mga bisaya nga mga banda.
Matod nila, makalilisang sa pandungog ang mga saba kaayo ug siyagit-siyagit nga mga kanta karon sa mga kabatan-onan. Apan lahia ninyo ang bandang Metal Instinct kay bisan sa kabug-at sa ilang paggama sa tono sa ilang musika, daw dili kamo magmahay sa mga gipaambit niining mga mensahe nga tinud-anay nga panghitabo karon sa atong palibot. Matulun-anon kasagaran ang ilang mga komposisyon ug dili ikapamasin lamang nga mga obra.
Ang kolaborasyon sa managsoong Leif Lormann Terariray (tambolista) ug Philamuel Paul (gitarista) maoy nagsilbing dakong haligi sa Metal Instinct. Natawo niadtong Oktubre 25, 1979 si Leif, samtang si Amuel niadtong Hulyo 4, 1982. Aduna pa kini sila’y mga manghud nga silang Niño Gibbson, Sean March, Mark Lester ug si Jeremy Frederick. Mga anak sa magtiayong Manuel ug Laura Terariray nga mga residente sa Tipolo, siyudad sa Mandaue.
Sama sa ubang panimalay, magpunay ang panaglalis sa mga musmos nga mga batang managsoon sa sulod niini. Dili tuyoon ang mga panghitabo, apan ang mga kasina ug pagtagad sa usag-usa managlahi kaayo ilabi na kun mga duwaan ug batan-ong kalingawan ang pagailogan sa mga bata. “Sauna mag-ilog mi permi sa bisikleta, sa family computer, ug win bee nga permi jud namo awayan ni Amuel”, pu’ng pa ni Leif. “Maglagot gani ko sa una kay naa ko’y gi-save nga game, then inig kadlawon siya ang molampos ato. Mao nga iyahang pangalan ang makadaug permi. Moana dayon siya nako nga nakalampos na siya. Tikasan kaayo”, saysay pa niya inubanan sa dako nga buhakhak sa manghud niyang si Amuel.
Bisan pa man sa panaglahi nilang kinaiya, nagtakdo man sad ang ilang panlantaw sa musika. Dagko nang nagsugod og kat-on og instrumento ang managsoon. Si Leif niadtong nagpangidaron na siya og 18- anyos, diha pa nag-awas-awas ang iyang pagkamahiligon sa paghapak sa drums. Samtang si Amuel, nahigugma sa gitara niadtong 13 anyos palang siya. Bintaha gamay si Amuel kay nagkalain-laing mga instrumento man ang iyang nakamahuan sama sa bass guitars ug drums. “Self-taught ra jud ni among pagkat-on, usahay manghuwam rami sa silingan o di ba kaha moabang og instruments sa studio”, dugang ni Amuel.
Sa natad sa pagtagik og mga liriko sa mga kanta, master kaayo si Leif sa iyang panghunahuna kay kasagaran nga mga kantang naglangkob sa ilang EP album nga gi-launch na pag Mayo 2007 diha sa Handuraw, naghisgot man og mga reyalidad nga panghitabo sa kalibutan karon nga matod pa “community problems” ang gitagaan niya og pagpakabana. Ang pagtulisok usab sa tono mao pud ang gitampong dili masayon sa iyang manghud nga si Amuel.
Niadto pa diay’ng 1998 nagsugod na og tukod og banda ang duruha nga gitawag og T.O.D. nga kasagaran mopatokar lamang og mga cover songs kauban pa sa lahi nga mga miyembro. Ang ilang mga impluwensiyang mga foreign bands mao ang Sepultura, Soulfly, System of a Down, Killswitch Engage ug siyempre ang Metallica nga mao gayud ang ilang inspirasyon sa klase sa tono nila karon.
Natukod ang bandang Metal Instinct niadtong miaging tuig 2006 nga diin Certifikados pa ang ngalan sa banda. Apan nausab kini sa dihang nisugyot ang bag-ong mga miyembro nga ilisan tungod sa dili ikasulti nga rason. Sa entablado sa San Roque Gym sa Wireless, Mandaue niadtong Agosto 2006, unang nagpabuhagay ang banda sa ilang mga kompo inubanan sa heavy metal genre.
Wala mapukan ang ilang pagpanukar sa Marigondon niadtong Marso ning tuiga nga diin gipaundang na sila sa usa ka konsehal niadtong dapita kay gisabaan kini og aduna pa gayu’y “rumble” nga nahitabo sa tunga sa crowd atol sa ilang pasundayag. “Wa jud mi mo-undang ato kay gisinyasan man mi’s organizer nga mopadayon lang, so mao to nakakanta pa jud mi og four ka songs unya jam man pud kaayo ang mga tawo ato gud bisan dunay gamay kagubot”, matod pa ni Amuel. Mao kuno kato’y usa sa ilang mga gigs nga dili nila makalimtan ug kanunay’ng mahinumduman.
Sama sa ubang bisaya nga mga banda, nangigking pud ang ilang mga dalunggan sa unang higayon nga nabati nila ang ilang mga hinaguang komposisyon nga gitagaan og kinabuhi sa istasyong 93.1 Smash FM nga tinuoray nga misuporta ngadto kanila. Dako pud kaayo ang garbo sa ilang mga kaliwatan sa mga naangkon nilang pagtagad nga gihatag sa mga bisrockistas ug bonus pa nga madugangan ang ilang mga didto ug diri nga mga higala.
Ang managsoon nag-agi sab og mga pagsulay sa ilang pagkaamigo kay nahugno sa makadiyot nga panahon si Leif sa iyang manghud nga mao na karon ang bag-ong bahista sa sikat kaayong bandang Indephums. “Nagkalalis pud mi ato nga time oy, kay abi jud nakog biyaan nami niya, nasayangan ko kay gipalitan na gud nako siya og gitara,” pu’ng ni Leif. Sa laing bahin, mipasabot usab si Amuel, nganong nakadesisyon siyang mohatag sa iyang serbisyo sa Indephums. “Dili man gud, ang usa pud nga rason mao nga nagka walay klaro ang una namong bokalista sa Metal Instinct, so mao to nga timing pud kaayo nga gikuha ko sa Indephums isip bag-ong bahista nila. Nagkasinabot nami ato sa akong maguwang nga dili sad jud ko kabiya sa Metal Instinct kay diri gud ko naggikan.” Karon aduna na’y bag-ong bokalista ang Metal Instinct ug nisamot pa gayud hinoon ang pagpursige sa managsoon nga patingogon gihapon ang bandang gihagoan nilang matukod ug nikulit na og pangalan sa industriya sa Bisaya Rock.
Ang mga pasalamat nila una sa Magbubuhat sa kalibutan nga mao ang hinungdan nganong nahiagoman nila ang ilang nahimotangan karon, sa ilang mga ginikanan ug pamilya nga grabe gayud kaayo ang pagsuporta nila, ni Dj Ram, Mam Eleanor (ang hinungdan sa tanan nganong nailhan sila), Ray (Indephums), Mam Marit, Zarah Smith, Handuraw, Hans (Backyard Studio), Renz (Celestial Jamming Studio), Loloy (Glass of Dirt), 3ChordsChoir, Braindamage, Makadawa, John Paul (Abscond), Ai-ai (DSS), Arnel Ong. Ang target date sa ilang ikaduhang EP album launching kay mahitabo karong Hunyo 2008 nga naglangkob sa ilang kantang nagstorya bahin sa tulis ug ang kabangis sa tawo nga giulohan og Asa?