Lumad nga Talisaynon ang nanghawod sa Supermodel of the World Philippines nga gipahigayon sa Manila niadtong Biyernes sa gabii. Dili man tuod siya maoy nidaog sa titulo, apan mahayag nga ugma ang nagpaabot niya isip, First Runner –Up. Siya mao ang 18-anyos nga Fil-British nga si Gwen Trott, kinsa usa sa mga lig-ong pambato sa nabantog na kaayo nga Models Association of Cebu, (MAC), ubos sa pagduma ni Chicoy Tomol.
Nasayran sa Banat Hugyaw nga 600 ka mga aspirants gikan sa tibuok nasud ang mipailawom sa rigid screening, diin unom lamang ang gikuha isip finalists ug maoy nagtigi didto sa NBC Tent niadtong milabay nga gabii. Si Gwen nga dunay gitas-on nga 5’9, mao usay napili nga Esac Best in Runway ug Sony Bravia Most Photogenic. Suma pa nga wala mo-enroll si Gwen sa milabay nga semester tungod kay gipunting niya ang iyang oras sa pagpangandam alang sa maong model search, diin gibansay siya sa banggiitang designer nga si Protacio.
Pwes, nagbunga ang iyang paningkamot tungod kay base sa tsika ni Tomol ngadto sa Banat Hugyaw kagahapon dunay negosasyon karon tali sa MAC ug sa Cal Carries Asia, aron ang nauwahi maoy moduma ni Gwen alang sa modeling stints abroad ug sa Singapore na siya magbase.
Si Gwen, 15-anyos lamang niadto dihang nakaplagan ni Tomol sa University of San Carlos Girls High.