Small but terrible. Gagmitoy maong makapuling. Ug bisan mas tag-as pa kay nila ang ilang mga kurbata nga kabahin sa ilang getups, gipakita sa bandang Ouchla kun unsa sila kaangayan mamahimong “grand champion” sa OctoFever Battle of Bands Season 3 sayo ning semanaha diha sa Elizabeth Mall.
Sa ikatulong tuig, gipahigayon na usab sa E-Mall ang OctoFever Battle of Bands isip paghatag og matang sa kalingawan ngadto sa mga E-Mall shoppers. Kada Oktubre, kining maong kalihokan maghatag og kabibo ilabi na niadtong mahiligon kaayo sa pagbanda-banda, matud pa ni Ma’m Delna Abellano, ang marketing and events coordinator sa E-Mall.
Ang pagpanawat sa mga entrante gisugdan niadtong sayong bahin ning buwana. Gani, adunay 18 ka mga banda ang nagparehistro alang sa maong indigay. Naus-os lamang ang ilang gidaghanon niadtong Oktubre 20, Sabado, sa dihang gipahigayon ang elimination round isip paghatag og luna sa walo ka banda nga mao na lama’y nagtigi alang sa grand finals niadtong Oktubre 21, Domingo.
“Bukas ang contest to all amateur band performers who are students and those who have no professionally recorded albums yet or gigs in clubs or bars,” pagsaysay pa ni Abellano sa mechanics sa maong kompetisyon.
Gipasumite sab ang mga partisipante og clear demo CDs nga adunay duha ka kanta. “Two songs of their choice, any genre and that each song should not exceed five minutes,” niya pa.
Bukas usab ang indigay sa orihinal nga komposisyon ug lakip sa mechanics ang pagsumite og gimakinilya nga lyric sheet niining maong musikanhong mugna. Lakip sa mga requirements ang resibo sa minimum purchase bale’g P500 sa bisan unsang E-Mall participating tenants (way labot ang hardware, appliance ug grocery store).
Human sa makuting eskutinyo sa nakuha nilang mga puntos tumoy sa dagang sa mga hurado atol sa elimination round, ang walo nga nasulod sa final round mao ang Shepherd’s Plaid, D’Virginz, Baronets, Daigami, J-Slash, 13th Mass, 3 Hours & 10, ug ang Ouchla.
Gipahigayon ang tulumanon alang sa grand finals sa nataran sa edipisyo sa E-Mall. Sa walo ka mga bandang “nagpakitang gilas”, ang Ouchla lamang ang bugtong nakapahugyaw sa mga tumatan-aw gumikan kay bisan pa man sa kalinghod pa’s mga pangedaron sa mga sakop niini, mipabuhagay man ang pundok sa gitawag og “performance level”. Walay lalis nga sila ang nakakuha sa pinakataas nga percentage, labi na sa audience impact. Tataw na sab daan nga nakuha gyod nila ang pagsalig sa mga hurado kay nag-akin-akin ug nagyango-yango man ang mga hurado inubanan sa ilang tam-is nga mga pahiyom samtang nagsud-ong sila sa mga bata nga mihatag sa ilang rendisyon sa kantang “Bring Me to Life (Wake Me Up Inside)” sa Evanescence ug sa ilang orihinal nga komposisyon nga “Hangin” nga gipahaom sa istilong reggae.
Ang criteria nga gibasehan sa pagpili sa mga mananaug mao ang musicality and composition – 40%, originality and style – 30%, stage presence – 20%, ug ang audience impact – 10%. Sa katapusan, nasakgaw sa Shepherd’s Plaid ang ikatulong luna (2nd runner up). Ang mga sakop niini nga silang Axel Bacaltos sa keyboards/vocals, RJ Lim sa bass, BJ Lim sa drums, JK Llamoso sa guitars/backup vocals ug Carl Salabsab sa rhythm guitar nakadawat og total cash prize nga P7,000 ug tropeo. Samtang nakuha nilang Adonis Laborte, Jr. (drums), Johnley Bayking (bass), Noel Alferez (vocals) ug Joebert Trocio (lead guitar) sa bandang 13th Mass ang ikaduhang luna (1st runner up). Sila nakadawat og P13,000 cash ug tropeo.
Ang mitumaw nga grand champ mao ang Ouchla nga maoy pinakabata sa tanang miapil sa kompetisyon. Sila nakadawat og P21,000 cash ug tropeo. Nakadawat sab sila og printer gikan sa Kodak ug 8-hour recording session for one song (radio quality) sponsored by Mediatrack AV Production Studio.
Sa gipahigayong pakighinabi human kahuwasi sa ilang gibating “euphoria” ang banda, nasayran nga kabanay diay nila ang kaluha (silang Joevan ug Joepert Lauron) nga mga sakop sa neo-grunge punk band 3Chordschoir nga usa sa mga Bisrock bands (nagpasikat sa kantang “Tulisan”). Ang mga sakop sa Ouchla nagpangedaron pa og gikan sa 10 hangtod 14 anyos. Silang Noel Ensalada, Jr. (rhythm guitar), Jammel Joyce Ensalada (vocals, drums), ang managkaluhang Ram Jay Ensalada (drums, keyboards ug vocals) ug Ronald Ray Ensalada (lead guitar) nanagtungha sa City Central School, samtang si Rachel Mancao (bass) nagtungha sa University of Cebu-Main.
Nahimong host sa maong pasundayag si Bischikador Yuri nga host usab sa Oi! Show Nato Ni! sa GMA-7 Cebu . Ang mga hurado sa maong kompetisyon gilangkoban nila ni Paul Dean nga usa ka langyaw, Frederick Villarojo, Rolo Manayon nga usa sa mga establisadong musikero sa Sugbu, Roy Villarojo ug Howard Monteza. Gipaluyohan ang maong battle of bands sa LBC, Kodak, Alchor Forex ug Mediatrack.