Simple apan makahuluganon. Kini maoy paghulagway ni Chelo Vallena, Supervising Producer sa news program Balitang Bisdak sa GMA-7, sa ilang kalihukan niadtong Sabado sa gabii isip pagsaulog sa ika walo na ka tuig nga paghatud og lab-as ug detalyado nga mga balita sa maong programa.
Usa ka “recognition” ug pagpasidungog sa mga binuhat nga angay himoong sumbanan sa uban gumikan sa ilang pag-uli og mga butang ingon man salapi nga napalgan ang higlight sa ika walo nga anibersaryo sa Balitang Bisdak. Busa niadtong Sabado nahimong bida ang 14 ka mga indibidwal tungod sa maayo nilang binuhatan.
Sila mao si Ruben Luciano, Joel Abella, Eric Amaro, Arnel Pahamonot, Nestor Patino, Brendan Lozaga, Boy Baniga, Denniel Tenchaves, Edgar Libaton, Oscar Arnado, Erwin Sambano, Joseph dela Pena, Lolit Villacorta ug Agripino Cariso.
Suma pa ni Vallena dugay na kaayo niyang plano nga pasidunggan ang mga tawong matinud-anon, “ to tell the public nga naa pa gihapoy mga tawo nga honest.”
“Dugay na kaayo ni nga pangandoy nga mapasidunggan pud sila. Happy kaayo ko. Ang-ang sige lang og dawat sa ilang ipang-uli unya wala nato sila ma-recognize properly,” nagkanayon si Vallena.
October 4 gyud ang kasumaran sa Balitang Bisdak suma pa ni Vallena, apan gihimo nilang tibuok buwan ang selebrasyon diin duna usab sila’y mga nagkadaiyang civic activities isip pagtamod usab sa ilang baruganan nga “Serbisyong Totoo.”
Dungan niini gipahibawo niya nga dunay mga bag-ong segments usab nga angay atangan diha sa nahisgutang news program. Gihulagway niya nga “challenging” ang kompetisyon tali sa ilang kaatbang ug nga “we are competing competitively.”