Managsoong Joyous ug Joharni Bendoy  sa Fervent

Motim-aw sa kanunay ang senaryo sa makabag-ong bunal ug lahing pitik sa kasing-kasing binisaya nga musika karon nga gipasiugdahan sa mga dili matabas-tabas nga abilidad sa mga  Bisaya rock nga banda. Ingon na niini kainit ang pagpangharos sa talagsaong hitabo nga bisan pa man sa daghang pagtamay sa uban, nilambo ug nisalingsing sa iya ra ang penomenal nga dugay nang gimahal sa mga tinud-anay’ng bisrockistas.

Kuyog sa maong pagsulbong, daghan nang napakita ang bandang Fervent sa kauswagan karon sa Bisaya rock nga musika. Gani, usa sila sa mga pipila ka banda nga gihatagan og dakong “break” nga makapakita og dili basta-basta nga komposisyon para sa Nasud Ko album ug nakadawat nag daghang pagdayeg ang ilang kanta nga “Sunda’ng Balaod Ta” sa mga inilang kritiko sa natad sa paggaray-garay.

Ang labing gisaligan sa bandang Fervent mao ang managsoong Joyous Harry (gitarista/bokalista) ug si Joharni Bendoy (tambolista) kinsa maoy gikatahong adunay lig-on nga pundasyon sa maong banda. Si Joyous natawo niadtong Pebrero 13, 1983 ug sa susamang tuig natawo usab si Joharni pagka Disyembre 7. Lumulupyo sa M. L. Quezon St. Maguikay, Mandaue City. Nga mga bunga sa magtiayong Mr. Joy ug Mrs. Elco Bendoy. Aduna pud kini sila’y igsoong lalaki nga si Joshua David nga nagpanuigon pa og 12 anyos.

Silang duha ning gradwar sa kursong Associate in Computer Programming diha sa  AMA Learning Center sa Mandaue niadtong tuig 2002. Ug sa pagkakaron, ni padayon sa pagtungha si Joyous sa kursong Education diha sa UV Mandaue, ug mogradweyt nasab karong buwan sa Oktubre. Samtang si Joharni anaa nanrabaho sa 1 & 1 Company diha sa IT Park, Lahug.

Sa mga gagmay pa sila, magpunay pud ang ilang mga panagbangi ilabi na sa mga kinaiya sa usag-usa nga usahay rang magkatakdo. Diha gani usa ka hitabo sa mga bata pa kaayo sila nga nagkalalis sa usa ka butang nga gihilakan pag-ayo ni Joharni. “Kita ko niya, nga namutos sa iyang mga sinina sa gamay nga plastic kay molayas kuno siya”, pu’ng pa ni Joyous. “Nihilak nasab ko kay wala naman  nako siya makit-i. Didto ra diay siya sa among atop nilayas unya nagsige sab og hilak. Sukad ato, kay dili na kaayo mi mag-away og grabe kay mahadlok naman ko mangluod nasab siya.”

Nagkat-on sila og gunit sa mga instrumento niadtong nagpangidaron palang sila og 7 anyos. Kay lagi ang ilang amahan mahiligon usab sa pag utingkay og mga nota sa nagkalain-laing mga himan sa pagpanukar. Kun sa ginaingon pa, “it runs through the blood”, mao nga wala gayod maglisod ang duruha sa pagdiskubre sa liko-liko sa pagkat-on sa musika. Ang unang nahibaw-an ni Joyous mao ang paghapak sa drums, samtang si Joharni ang pagkitiw-kitiw sa gitara. Apan nabali kini, kay mas nagustohan ni Joyous ang pagkas-kas sa gitara ug mao sab si Joharni, mas ganahan siyang makat-on sa pagdakol-dakol sa drums. Sa dihang nag-edad na sila og 10 anyos, hanas na kaayo ang duruha ug didto na sila nagsugod paghalad sa ilang talento sa pagtukar sa ilahang simbahan.

Niadtong tuig 2000, nisulod og seminaryo si Joyous sa usa ka bible school. Didto niya natukod ang bandang Super David. Siya mao ang vox/rapper sa maong banda samtang ang iyang igsoon kay maoy nagdala sa rhythm guitars. Ang iyang nakaila sa grupo maoy drummer. “Nasuko man gud akong mama nga dili mi magkuyog ug way labot akong bro sa banda so mao to, amo nalang siya gikuha as rhythm”, dugang pa ni Joyous.

Ang ilang mga impluwensiya mao ang Apache Indian, MC Hammer, Backstreet Boys, Boys II Men, John Mayer, Creed, Switchfoot, Jars of Clay, Aerosmith. Nagkanayon ang duha og paambit. “Kung rocker ka, para nimo music is music…we appreciate all kinds of music, we don’t discriminate.”

Ang mga membro sa bisrock pud nga bandang Glass of Dirt maoy nag-agni nila nga mosuway og sumite og kantang binisaya sa 93.1 Smash FM station. Dugay nasab nilang kaila ang maong grupo sa simbahan nga ilang gitokaran nga dunay parehong paghigugma sa genre nga Contemporary Christian rock. Ang “Dili Molubad” ang una nilang kanta nga ilang gihatag sa maong istasyon. Sa pagkatinuod lang, kining kantaha kay iningles ang orihinal nga liriko nga gihubad lang sa ilang amahan ug gidugangan pud ni Joyous og lain pang mga tudling. Mahitungod kini sa dakong paghigugma sa Dios ug mahimo sab nga ikaasoy sa gugma ngadto sa usa ka kinaham.

Ang labing una nga gig nila isip Fervent natigayon diha sa Tipolo public market sa miaging tuig 2006. “Kulbaan jud mi ato nga time, tensyonado pud…nakafeel mi og gamay nga anxiety”, matod pa ni Joharni. Pero bisan pa man, nalipay gayod sila nga nakapaambit sa ilang mga gipanghuptang talento ngadto sa pundok sa mga kabatan-onang bisaya.

Ang dili nila malimtan nga gig mao katong nitokar sila sa event nga giulohan og Soundskool nga nahitabo sa Boracay ug sa Rizal Memorial Stadium sa Manila. Usa ka semana kini nga kasaulogan diin kuyog nila ang mga bandang sikat kaayo sa atong nasud sama sa Sugar Free, Bamboo, Parokya ni Edgar, ug Hilera niadtong Nobiyembre 2006. Didto nila nasaksihan kung unsa kanindot ang maka jam sa inilang mga banda sa kaulohan ug nga gidayeg pud ang ilang mga kanta bisan paman sa kalisod sa pagsabot sa bisayang pinulungan. Ug gibati pud nila ang dili mabangbang nga pagkasadya niadtong tungora.

Sa nadunggan na nila ang ilang kantang “Dili Molubad” sa labing una nga higayon, nindot kaayo ang ilang gibati, hasta sab ang ilang mga ginikanan nga proud gayud kaayo kanila. “Basta motukar na ang among kanta sa Smash, kay manawag dayon mi sa amo parents if kadungog ba sila”, pu’ng pa ni Joyous. “Feel namo satisfied kaayo mi sa among effort nga gihatag sa kanta”, puno ni Joharni.

Para nila ang pagtukar sa entablado ug pagsilbi sa Ginoo dugay nang nakatatak sa ilang alimpatakan ug naglatay nang daan sa ilang mga kaunoran ang paghigugma sa musika. Dako gayud kaayo ang ilang pasalamat ngadto sa labing makagagahum sa paghatag kanila og talagsaong talento ug usab ngadto sa ilang mga ginikanan nga hingpit kaayo ang pagsuporta ngadto kanila.

Karong umaabot Nobiyembre 2007, madasigong nagdapit kaninyo ang Fervent nga mosaksi sa ilang unang album launching nga self-titled ug adunay 12 ka tracks, inubanan sa ilang mga kanta nga gipalanug-lanog na sa Smash, sama sa Dili Molubad, Way Bale Na Lang, May Paglaum Pa (featuring Nico of Kabobo) ug daghan pa.

Ang Band Influence sa inyong kinaham nga si Maria Eleanor Elape Valeros, mabasa ninyo sunod semana. On leave siya pagkakaron.