Magkakasabay pa pala ng concert sina Billy Crawford at si Christian Bautista. Aywan naman kung bakit kailangang magkasabay pa sila, pero siyempre mas maliit lang naman ang venue ng concert ni Christian.
Wala ring duda na ang concert ng dalawang stars na yan ay kakikitaan ng suporta ng kani-kanilang mga networks. Taga-Channel 7 si Billy habang nasa Channel 2 naman si Christian.
Kung sa bagay magkaiba naman sila ng market dahil hip-hop ang market ni Billy samantalang si Christian naman ay iyong mga mahihilig sa ballads.
Pero sa palagay naman namin, hindi na kailangang pag-isipan pa yan dahil mas maliwanag pa sa sikat ng araw na siyempre magiging mas malaking hit ang concert ni Billy kaysa sa show ni Christian. Kahit papaano naman kasi, nakapag-promote ng husto si Billy dahil nag-host pa nga siya ng isang contest sa TV para lang makakuha ng mga dancers niya sa kanyang concert. Sa kabilang banda naman, si Christian ay natira-tira pa dahil sa palpak niyang pagkanta ng national anthem ng Pilipinas sa isang boxing bout sa Alabang.
Pero natawa nga kami sa usapan namin noong isang araw, dahil sabi nga nila sino raw kaya ang mas kakampihan ni Kuya Germs. Itinuturing niyang anak si Billy, pero hindi naman maikakaila na malapit din sa master showman si Christian, na sinasabi nga niyang sa tuwing kukumbidahin niya sa kanyang show ay dumarating naman.
Pero siguro naman hindi na dapat pang intrigahin dahil si Billy naman, simula sa pagkabata, lumaki na sa shows ni Kuya Germs noon pa man. Sina Christian naman ay mga bago niyang kaibigan, pero binuksan naman niya ang kanyang TV show sa lahat ng gustong mag-promote ng kanilang mga concerts hindi ba?
* * *
Maganda raw ang naging ratings sa pagsisimula ng bagong fantasy action series ng Channel 7, pero marami rin kaming narinig na mukhang ang inaabangan ng mga fans sa nasabing palabas ay ang baguhang si Aljur Abrenica.
Malakas naman talaga ang dating ni Aljur, kahit na noong panahong contestant pa lang siya sa Starstruck. Noon pa man sinasabi ngang maraming nanonood ng show dahil sa kanya. Iyon nga lang, siguro naging masyadong over confident ang kanyang mga fans kaya natalo sila sa paramihan ng text votes.
Marami ang nagsasabing mukhang nasasapawan niya itong si Marky Cielo kahit na marami na itong shows. Mukha nga raw mas malakas pa ang batak ni Aljur kaysa kay Dennis Trillo. Siguro kasi sawa na rin ang mga tao kay Dennis dahil ilang taon na nga bang araw-araw siyang nakikita sa TV. Eh si Aljur ay bago, at saka malakas naman ang personality noong bata.
* * *
Dapat daw na tawaging “flashback queen” din si Pops Fernandez. Ang mga kwento sa kanya ngayon ay yong dahilan ng paghihiwalay nila ni Martin Nievera 10 years ago, at saka iyong naging relasyon din nila ni Piolo Pascual noong araw pa rin. Puro nga mga flashback na kwento ang lumalabas tungkol kay Pops.
Dapat magsikap naman siyang magkaroon ng mga bagong kuwento nang hindi puro flashback ang sinusulat tungkol sa kanya.