dyLA 40th Anniversary Rakrakan

Congratulations sa tanang mga campus journalists ug mga aspirants nga niapil sa school-based press conference nga gipahigayon sa Labogon National High School ug sa Mandaue City Comprehensive National High School diha sa dalan Plaridel. Katambayayong sa MCCNHS ang ilang sister school, ang Mandaue School of the Arts, sa pagpahigayon sa maong campus journalism seminar niadtong Sabado. Nahimuot kaayo ko nga daghan ang nagpakita og interes nga palamboon ang ilang katakos sa pagsulat – News Writing, Feature Writing, Editorial Writing, Sports Writing ug Copy Editing.

“The next best thing to being a rocker is to be a journalist,” mao kini ang akong gipasigarbo atol sa maong mga seminars nga diin usa ko’s mga resource persons nga ni-handle sa mga group dynamics ug workshops alang sa staff members sa ilang isig ka mga school paper/organ/publication. Salamat kaayo sa pag-imbitar ni Ma’m Dorothy Seno, Ma’m Dolor Dayondon, Ma’m Reina Perez ug Ma’m Emily Cabusa.

Pila ra’y pagligid sa panahon mga rockistas, anibersaryo na sab sa dyLA – Tingog sa Mamumuo. Ug tungod kay igsoon man kini sa dyWF-93.1 Smash FM nga maoy nagpalanog sa huning Bisaya rock, mahitabo na usab ang laing Rakrakan ugmang adlawa (Septiyembre 27) diha sa ALU Welfare Center sa Vimcontu Compound, Pier 1. Libre ang maong pasundayag (libre entrance, libre sad ang exit pung pang DJ Ram Dizon) apan ang mga spectators gihangyo nga mosunod sa mga lagda sa estasyon aron makasulod sa venue. Ang mga reglamentos naglatid nga dili mahimong magbitbit og hinagiban sa sulod, dili sab mahimong magtinil og mga sharp-pointed objects lakip na ang bolpen ug mga bladed instruments, mga bakos nga sprocket type, mga botelya ug ingon man mga de lata nga softdrinks. Hinoon duna’y mga legitimate vendors nga gi-tap ang management sa ALU-Vimcontu nga maoy mamaligya og mga pagkaon ug bottled purified water sa sulod. Sila na ang bahala’ng mo-monitor nga dili gamiton ang mga basiyong purified water bottle sa pagpasakit sa mga nanan-aw o paggubot sa event.

Sa pagsaulog sa ika-40 nga tuig sa dyLA, padayong opisyal niini nga partner sa pagpanulat mahitungod sa kalamboan ug sa rakrakan ang BANAT News-Kasaligan Gyod! ug ang The FREEMAN – duha sa lima ka mga mantalaan sa Star Group of Publications.

Magpasundayag ugma sugod alas-5 sa kahaponon hangtod na’s lawom nga kagabhion ang mga bandang nahimong kabahin sa Smash – Cebu ’s Rock Fortress ug Home of the Bisrockers. Ang imbitado’ng kinse kabuok banda naglakip sa Senex, Circle of Willis, Timeslot, Retdem, Assembly Language, Wet Slipperz, Fervent, Agadiers, What’s The Frequency?, Kabobo, Aggressive Audio, Gangrene, Glass of Dirt, Indephums ug Agipo.

I-hook up ang Rakrakan live sa Smash alang niadtong dili makakita sa linawas nga pasundayag; labi na kadtong nahimutang labang og lawod, sama sa mga suki sa “BisrocKabataan” (10 a.m. – noontime) sa Surigao del Norte, Dumaguete City, Canlaon City, ug mga lungsod sa Negros Oriental ug Occidental, sa Bohol, Ormoc City ug lain pang mga lungsod sa Leyte kutob sa maabot sa signal sa 931.Smash FM ug 909 dyLA.

Kwarenta na ka tuig nga naghatod kaninyo og lab-as ug de kalidad nga mga balita ug tulumanon ang dyLA nga nagpalanog sa tingog sa mga mamumuo. Lakip niining mga de kalibreng programa ang dyLA Interaction (8-9 a.m.), dyLA Lintunganay (9-10 a.m.), ug OkRyan! (3-4 p.m.).

 Ang dyLA 40th Anniversary Rakrakan gipaluyohan sa Touch Mobile, Gillamac’s Marketing, Inc.; Metro Gaisano, Senate President Manuel Villar, Afsilin Vitamin Mineral Premix, Salcon, 1st district Rep. Eduardo Gullas, Senator Loren Legarda, Handuraw, Sound Balloon ug Aldeguer Group of Companies nga maoy tiggama sa Islands Souvenirs shirts. Lakip usab nga mosuporta ang Fungisol, Penrex, ug USA Sports.