Mariel di na dapat nag-comment
Walang ibang ambisyon si Kuya Germs kundi ang parangalan ang mga tao sa showbiz. Kung natatandaan pa ninyo, sa kanyang Sunday show noon nagsimula ang pagbibigay ng tribute sa mga beteranong artista. Bago ang kanyang show, wala namang ginagawang ganyan sa tv.
Sinimulan din niya ang Walk of Fame. Noong una consultant lamang siya sa nasabing proyekto, pero nawala nang lahat ang may mga interes noong araw, kaya ang ginawa ng master showman ay itinuloy niya kahit na siyang mag-isa lang.
Hindi pa natatagalan, sinimulan din niya ang Paradise of Stars, parangal din ‘yan sa mga kapwa niya artista.
Ngayon naman ang gusto niya ay magkaroon ng isang red carpet premiere ulit ang pelikulang The Big Broadcast, bilang pag-alala sa golden anniversary ng pelikulang iyon.
Ang The Big Broadcast ay itinuturing na pinaka malaking musical movie na nagawa sa ating bansa.
Sabi ni Kuya Germs, napag-usapan na raw nila ang tungkol dito ni Manay Ichu Maceda. Gusto rin niyang makausap ang iba pang mga taong may kinalaman sa pelikulang The Big Broadcast.
Ang apat na bida sa pelikula ay sina Susan Roces, Amalia Fuentes, Eddie Gutierrez at Jose Mari.
* * *
Nag-comment pa si Mariel Rodriguez na mali raw si Joey de Leon dahil hindi naman siya umiyak sa Wowowee, noong binabanatan ni Willie Revillame si Joey de Leon. Sinabi kasi ni Joey na isa sa mga kundisyon niya ay makita rin ang dalawang co-host ni Willie na umiiyak kagaya ng pag-iyak nila noong tinitira ni Willie si Joey on the air.
Bakit kaya kailangan pang mag-comment si Mariel. Kung hindi nga siya umiyak, baka naman hindi siya ang tinutukoy ni Joey. Hindi man siya umiyak, baka ganoon ang tingin ni Joey kasi umiyak naman talaga ang isa niyang kasamang co-host.
* * *
Gusto raw sana ng isang dating male sexy star na magbalik showbiz, kahit na sabihin pang father roles na lang ang puwede niyang gampa nan. Kaya nga lang ang tingin naman ng iba ay masyadong huli na ang kanyang ambisyon.
Sana kung hindi pa bulgar ang kanyang dating trabaho. Kasi kung babalik siya sa showbiz ngayon, tiyak na maraming lalabas na kuwento tungkol sa kanyang naging trabaho noong araw.
- Latest
