Managsoong Vann ug Goryo John Aznar sa Gangrene

Nahulma ang mga nagkalain-laing grupo inubanan sa ilang tagsa-tagsa ka mga pambato ug mga gipanghambog nga mga komposisyon nga gipalanog sa nag-unang istasyon nga tinood nga misuporta sa Bisaya rock, ang 93.1 Smash FM. Giladlad ang mga abilidad sa musikerong Bisdak ug dili sab ikalimod nga lahi ra ang mahakot nga pagtagad kun pundok Bisrock na ang hisgotan.

Usa ang bandang Gangrene nga miburak na sa pagpalukanap sa paningog nga hinay-hinay nang gitagamtam sa mga Bisrockistas nga nahigot na karon sa ampay kaayo nilang paglayatlayat ug pagyangoyango sa taman sa bag-ong genre nga nauso ning kasamtangang henerasyon.

Ang managsoong Giovanni “Vann” (lead guitarist) ug Gregory “Goryo John” Aznar (drummer) sa Gangrene, mipakita na sa ilang katakos sa paggamit sa mga tolonggon nga mao sab ang hilig sa ilang mga ginikanan. Naglatay na, matud pa, sa ilang kaugatan ang paghigugma sa musika, usa sa natad sa mga arte.

Lumolupyo sa H. Ascencion Street , Urgello, Cebu City ang managsoon. Bunga sa tim-os nga pagminahalay sa magtiayong Virginia ug Gener Aznar. Kinamaguwangan si Vann ug ikatulo si Goryo John sa walo ka managsoon. Sukad pa kuno sa una, sila nang duha ang mag-inunungay ug magkasinabot sa daghang mga butang. Si Vann natawo niadtong Enero 23, 1982 samtang si Goryo niadtong Nobiyembre 5, 1985.

Sa nagtungha na sila sa elementarya sa Southwestern University , diin nagpangedaron na og 12- anyos si Vann, samtang otso anyos pa si Goryo, giregalohan si Vann sa iyang inahan og acoustic guitar.

 “Ako man mom ang nagtudlo namo ni Goryo nga makat-on og guitar, tulo mi kabook managsoon nga makamao mogitara. Gi-share niya namo sa gagmay pa mi ang iyang mga nakat-onan,” pamahayag ni Vann nga mapagarbohon kaayo nga ang iyang inahan ang nangunay og tudlo kanila. Didto nagsugod ang tanan nilang pagdayeg ug paglantaw og dakong balor sa musika.

Si Goryo naa pa sa iyang ika-upat  nga ang-ang sa hayskul karon diha gihapon sa Southwestern University kay lagi sa una “nabuang” kaayo siya sa skateboarding ug magbinuntagay permi sa kalingawan, sa mga online games sama sa Dota AllStars ug CounterStrike.

Sa nag-edad na siya og 16- anyos, gipalitan pod siya sa iyang mga ginikanan og iyang kaugalingong drumset. Nagkat-on ra siya pinaagi sa pagpaminaw sa mga langyaw nga bandang iyang kinaham. Unya iya rang sabayan ang mga teknik niini sa paghapak. Karon natuman ra gyod niya ang iyang gipangandoy nga mahanas og maayo sa maong instrumento.

Samtang si Vann, bag-ohay lang nakakupot sa iyang diploma. Migradwar siya niadtong nakalabay’ng tuig, sa buwan sa Oktobre dinha sa SWU. Isip usa ka Computer Engineering graduate, karon aduna na siya’y kaugalingong studio nga gibunyagan ra pod niya’g “Vann Studio”, diin dinha siya mag-record ug mag-mix og mga komposisyon sa mga banda.

Kasagaran makahunahuna gyod og tagik si Vann og mga kanta sa iyang mga bakanteng oras. Ang kantang “Come Around” sa ilang album maoy iyang gipangunayan og compose. Usa pod karon sa iyang gikabisihan mao ang paghatag sa iyang oras isip bag-ong tigkitiwkitiw nga gitarista sa bandang Kabobo.

Ang ilang mga impluwensiya mao ang mga kinaham nila nga mga banda sama sa sikat kaayong Radiohead, Switchfoot, Incubus, Dishwalla, 311, Deftones, Faspitch, Urbandub, ug Saosin.

Nipaambit pod si Vann nga nagsugod ang iyang pagkahilig sa pagbanda niadtong nagtungha pa siya sa hayskul. Ang labing una niyang banda mao ang Floating Caskets nga milungtad pod og duha ka tuig. Sa college na siya, duna na pod siya’y laing banda nga ginganlan og Mother Mayhem nga milungtad og upat ka tuig. Ug wala pud niya gihikaw ang iyang talento ngadto sa Ginoo kay apil pod diay kini siya sa pagtokar para sa Couples for Christ sa ilang simbahan. Disciple ang ngalan sa banda.

Samtang si Goryo dunay banda niadtong 2005 nga ginganlan og Chill ug English band nga Kriemhild Tokyo Juggernaut nga ubos sa Harakirimosh Production.

 Pero nisamot ang ilang bonding kay matag adunay lakaw si Vann kuyog sa iyang mga barkada, mukuyog man sab ug mo-jam si Goryo nila. Didto nagsugod ang ilang tandem ug silang duha nga managsoon dunay dakong papel sa bandang Gangrene.

Ang labing unang gig nila isip bandmates sa Gangrene didto mahitabo sa Casbah Bar niadtong 2005. Naka-launching na pod sila sa ilang unang album didto sa Handuraw niadtong Hulyo 8 sa miaging tuig. “ Para nako, memorable kaayo to kay daghan kaayo ang tawo, init kaayo pero lingaw kaayo mi,” matod pa ni Vann nga mauwawon kaayong mipahiyom paghinumdom sa kamahinuklogon sa maong event sa ilang kinabuhi isip banda.

Mga hilomon, pormal, manggiuwawon kaayo, ug puros gentleman, mao kini ang akong paghulagway sa duruha. Dako kuno kaayo ang ilang pasalamat sa mga tawo nga kanunay nagsuporta kanila. Una sa Ginoo, sa ilang mga ginikanan, sa ilang lola, mga aunties, Urgello Boys, nilang Edel, Sharmaine, Dora, Batman, Amahan, Aiko, Sato, Cheeno, Niel Plan (bokalista sa Gangrene), Salmo, Monika, Jickoy, Bemi, Bobot ug sa tanang mga nalingaw ug nagtamod sa Bisayang pinulongan.