“Dili uyon si papa nga maghilak ang magbilar sa iyang kamatayon kay matod niya nakahuman na siya sa iyang pagpaningkamot diin, kanunay siyang nagpatulo sa iyang mga luha, busa niining iyang pagbalik ngadto sa naghimo niya nga way lain kon dili ang Diyos, kinahanglang malipayon ang tanan, kay nakahuman na siya sa iyang tahas dinhi sa kalibutan.”
Kini maoy pasiuna ni Congresswoman Nerissa Soon Ruiz sa dihang gipaila niya ang sunod nga mokanta nga way lain kon dili ang nasuod na kaayo niyang higala nga si Dulce.
Apan sa wa pa mokanta si Dulce, miawit pod una ang l970 Grand National Champion sa Tawag Ng Tanghalan nga si Nobo Bono kinsa, gidayeg kaayo sa mga bisita kon nagbilar tungod kay wa pa man gyod mausab ang tingog bisan sa kadugay na sa panahon nga nanglabay.
Lima ra unta ka kanta ang gikatakda nga awiton ni Dulce, apan dili kapugngan ang mga hangyo sa mga tawo sa pagpakanta niya sa mga awit nga “ Kamingaw sa Payag,” “Maalaala Mo Kaya?” ug “Usahay” nga wa gyod unta sa iyang listahan nga maoy kantahon. Maayo gani, kay ang nagduyog sa keyboard nga si Jun Enriquez, nasayod na sa range ni Dulce busa, bisag way practice, nindot gihapon. Unya, miawit usab ang bise mayor sa dakbayan sa Sugbo, ang gitawag og “The Singing Vice Mayor” ug “Crush Ng Bayan, si Hon.Michael Rama [kinsa pa?}.
Kini nahitabo niadtong Lunes sa gabii, Agosto 6 didto sa gihayaan ni Mano Toto Soon diin nakita nako ang daghan kaayong mga higala ug kon hinganlan ang tanan, mahurot ang tanang space sa Hugyaw karong adlawa basta usa sa nasuod ni Dulce nga si Eliza Estenzo, ang Rayna Emperatriz sa Qouta Club karong tuiga, didto pod.
Si VM Rama miawit pod sa bilar ni Nyor Cesar Laspinas diin, daw sama pod sa concert kay daghan man pod og giawit si Max Surban nga nagkomedya pa gani sa gihaya. Siyempre, ang umagad ni nyor Cesar nga si Girlie Lapinid nga concert artist miawit pod, kay dili pod kono gusto ang nahisgutan nga magsubo ang kahigalaan ug kaparyentihan sa iyang pagtalikod.