Tulo ka buwan ang kontrata ni Valerie Concepcion alang sa Wowowee, kini maoy gibutyag sa iyang manager nga si Becky Aguila.
Gawas sa pormal nga pagpahibawo ni Becky niadtong Biyernes sa gabii nga sa ABS-CBN na mopirma og kontrata si Angel Locsin inigbalik niini gikan sa London, laing dakung balita mao nga ang usa niya ka talent nga si Valerie mipirma usab og kontrata sa ABS-CBN sa Wowowee noon time show ni Willie Revillame diin sulod sa tulo ka buwan ang iyang starting nga kontrata.
Didto pa lang sa London si Becky nakadawat na og offer si Valerie nga mo guest sa Wowowee diin niadtong Agosto 1 nagsugod na siya diin usa lang unta kini ka semana.
Wala nay kontrata sa GMA-7 si Valerie ug sa milabay’ng semana nahuman na ang iyang Sinasamba Kita apan naa gihapon siya sa Fantastic Man isip Agent Belle.
Sa pagka-guest co-host ni Valerie sa Wowowee gipatay ang iyang character sa production manager sa Fantastic Man.
Sa taping niadtong Agosto 2 gitapos na ang character ni Valerie apan wala kini ipakita nga namatay ug si Jewel Mische ang mipuli ni Valerie sa Fantastic Man.
Base sa taho nga dis-appointed ang mga taga Fantastic Man sa kalit nga pagkawagtang ni Valerie tungod kay aduna na kini show sa ABS-CBN.
Wala sa script sa week 19 ang pagpatay sa character ni Valerie apan kinahanglan gyud nila kining buhaton.
Ang week 17 pa lang maoy makita nga pasundayag sa Fantastic Man hinungdan nga duha pa ka semanang makita si Valerie sa GMA-7 bisan og aduna na kini show sa ABS-CBN.