World Championships of the Performing Arts, o mas naila nga WCOPA. Giisip nga “Official Talent Olympics,” sanglit ang mga baggiitang binuhat sa natad sa performing arts, maghugop aron magtigi kinsa nilang tanan ang labing maayo sa tibuok kalibutan. Usa ang Pilipinas sa daghang mga nasud nga maayo og natala nga kalampusan sa maong indigay sa milabay’ng tulo ka tuig.
Sila si Jed Madela ug ang Sugbuanong si Rizza Navales, ang nag-una pagpaamgo sa kalibutan nga dili basta-basta ang talentong Pinoy kun performing arts ang hisgutan. Pipila ka adlaw na ang milabay, milupad na ang delegasyon sa Pilipinas paingon sa Hollywood, California alang sa maong indigay nga magsugod karong Hulyo 28 hangtud sa Agosto 5, 2007.
Sa sentro sa maong delegasyon, walay lain kun dili ang laing garbo sa Sugbu—si Rochelle “Raki” Vega—ang una ug nag-inusarang Born Diva sa Pilipinas.
Mao kini ang unang higayon ni Raki nga makigtigi sa usa ka prestihiyosong international singing competition. Dako niyang garbo nga mapili isip usa sa mga Ambassadors of Goodwill sa WCOPA. Niining maong kahigayonan, mapasalamaton si Raki ngadto ni WCOPA National Director Carlo Oroza, nga maoy mitanyag kaniya nga molangkub sa RP Team niadto pang milabay nga tuig, apan iyang gibalibaran tungod sa kadaghan pa niya og gimbuhaton.Subling gisukna ni Oroza si Raki karong tuiga, pwes wala na kini niya palabya pa.
Nasayran, nga sa malampuson kaayong musical play nga “Once On This Island” niadtong 2005, unang nakit-an ni Oroza ang kamaayo ni Raki isip ang bida nga si Ti Moune. Sukad niadto kumbinsido na si Oroza sa katakus ug sa mahimo pang maabot sa maong Sugbuanon.
Lima ka kategorya ang salmutan ni Raki sa WCOPA lakip niini ang Broadway, Contemporary, Gospel Music, World Music ug ang Original Composition.
Sa Original Composition, kantahon ni Raki ang iyang winning piece sa Born Diva, ang “Today” nga mugna ni Trina Belamede, nga mao pod ang naghimo sa mga sikat nga kantang “Tell the World of His Love” ug “Now that I have you” ug uban pa.
Ang ubang mga kanta nga iyang awiton mao ang “Winning for Life” para sa Broadway category. Gi-pahimangnuan siya sa iyang coach ug ni Oroza nga kantahon ang mga kanta nga duol sa iyang kasing-kasing.
Sa maong indigay sul-obon ni Raki ang mga gowns ug creations sa inilang Cebuano designer nga si Jed Sevilla. Mapasalamaton kaayo si Raki kang Sevilla sa walay puas nga pagsuporta niini kaniya, diin tanang mga gown libre nga ipagamit niya. Lima hangtud unom ka mga gowns ang gidisenyo ni Sevilla para kang Raki para sa WCOPA.
“Nakulbaan ko para sa competition but at the same time I am honored to represent Cebu and the Philippines as well”, butyag pa ni Raki sa iyang pagbisita sa buhatan sa Banat Hugyaw, duha na ka semana ang milabay.
Aside sa voice lessons, nangandam pag-ayo si Raki para sa kompetisyon, “I’ve been always a Marian devotee, all my shows are for the Lord and what I will sing will be offered to Him,” matud pa sa 26-anyos nga mang-aawit.
Unsay gipangbuhat ni Raki sa mga milabay nga mga buwan?
“I’m still singing and working. I had my shows and concerts in the Asian countries and also do theatre musical plays and beneficial shows for our less fortunate brothers and sisters,” tug-an pa niya.
Wala ilimod ni Raki nga ang iyang kalampusan isip Ti Moune sa Once On This Island, mibukas og daghang kahigayon kaniya isip mang-aawit. Gani kini man ang naghatag og dalan aron mag-kaabot sila sa world-class artist nga si Lea Salonga, kinsa maoy mi-train niya alang sa nahisgutang musical.
Dugay na kaayo nga idolo ni Raki si Lea. Mga awit ni Lea ang iyang kantahon sa matag kompetisyon nga iyang salmotan niadtong bata pa siya. Gani matud pa sa iyang mga classmates sa college, siya maoy “Lea Salonga of STC”.
Ang nakapahugyaw pa gyud niini mao nga sunod sila og birthday ni Lea, siya Pebrero 21 ug ang nahisgutan Pebrero 23.
Gumikan sa maong musical nagkasuod sila og maayo ni Lea, gani walay sipyat nga sa mga okasyon nga pasiugdahan ni Lea, apil gyud si Raki sa guest list.
Human sa WCOPA, mo-release na si Raki sa iyang album. Lakip sa tracks ang mga orihinal nga compositions ni Raki, nga iyang gipanghinaot nga makahatag unta og inspirasyon sa katawhan. “(If given a chance) I’d really wanted do inspirational songs” pong pa ni Raki.
Para sa mga aspiring performers mao kini ang mensahe nga giluwatan ni Raki: “Never stop believing in yourself dream big for dreams do come true. I am a dreamer myself. Offer everything to the Lord and be the best you can be”.