Harry, Hermione o Ron?

Ugma puhon, July 21, ipagawas na ang last book sa Harry Potter series— Harry Potter and the Deathly Hallows.

Naghinamhinam na ang mga fans nga mahibawo kinsay gipasabot sa author nga si J.K. Rowling, nga duha ka major characters ang mamatay sa Book 7. Sila si Harry ug Hermione ba?

Ning bag-o lang nagkadaiyang mga websites ang mitumaw, ug nag-una-una og tagna sa mamahimong ending.

Dunay miingon nga usa nilang Harry, Hermione ug Ron ang mamatay. Duna poy nag-detalye sa kamatayon matud pa nila ni Lupin, Percy, Voldemort ug Snape.

Naa poy website nga miingon nga napatay ni Voldemort si Hermione nga nanalipod ni Ron.

Tungod niini, nanawagan si Rowling nga mas maayo nga paabuton na lang ang paggawas sa libro ugmang adlawa, ilabi na nga dunay mga peke nga libro nga nanggawas ug nagbaha pagkakaron.

Rodrigo Santino gihimugso na

Gihimugso na ni Claudine Barretto ang unang anak nila ni Raymart Santiago nga si Rodrigo Santino Barretto Santiago, 7:44 a.m. kagahapon sa Medical City. Normal ang delivery ni Claudine, 6.9 lbs ang gibug-aton sa bata.

Si Raymart ug Claudine dunay sinagop  nga bata, si Sabina.

Ang pagkatawo ni Santino, labing hugyaw nga gasa ngadto sa magtiayong Raymart ug Claudine alang sa ilang birthday karong adlawa. Si Claudine 28-anyos na, samtang si Raymart, 34.

Cebuana rason sa pagkapukan ni Amalia

Si Amalia Fuentes na mismo maoy mitino nga tinuod nga nagbuwag na sila sa iyang bana nga si Joey Stevens. Milungtad og 28 ka tuig ang ilang kaminyuon ug third party ang hinungdan sa separation.

Tsika sa PangMasa nga diretso ang mga tubag ni Amalia sa presscon nga iyang gipatawag aron pagtin-aw sa tanan, kaysa bisan unsa nga pagduda pa ang mutumaw.

“The woman from Cebu” ang paghulagway ni Amalia sa babaye nga matud pa rason sa ilang panagbuwag. Gikatahong Angie  ang ngalan sa babaye,36-37 years old ug buwag sa unang bana.

Suma pa ni Amalia nga five years na ang maong affair ni Angie ug Stevens, apan niadtong June 18, 2007 lamang siya nasayod niini.

Sa lima ka buwan nga pag-istar niya sa Amerika, matud ni Amalia nga wala poy uli-uli ang iyang bana sa ilang balay sa Manila, didto na siya nakabantay.

Matud niya nga nakugang siya sa nahitabo, apan kinahanglan niya nga mag-move-on.

Pagkakaron gitun-an na sa abogado ni Amalia ang musunod nilang lakang.