Ang abogado sa magtiayong Claudine Barretto ug Reymart Santiago miadto sa National Bureau of Investigation (NBI) niadtong Huwebes para ikompirma nga ang iyang mga kliyente mi-invest sa kontrobersiyal nga FrancSwiss Investment.
Si Atty. Ellen Veza nagkanayon ngadto sa NBI nga ang iyang mga kliyente mibutang og salapi sa FrancSwiss Investment apan pareho kining walay kalibutan nga mabiktima diay sila sa ‘pyramiding scam.
Ang pyramiding scam giingon nga usa ka transaksiyon nga nalambigit sa kwarta kinsa ang usa ka tawo o investor kombinsihon sa pagbayad ubos sa pasalig nga ang kwarta nga gi-invest niini motubo.
Ang pangalan sa magtiayong Claudine ug Reymart nasuta nga usa sa mga investors sa FrancSwiss Investment dihang gisusi kini sa NBI.
Base sa pasiunang taho nga gisumiti sa mga mipahigayon sa imbestigasyon mikabat na sa P1 billion nga salapi ang nakuha sa maong oragnisasyon gikan sa mga tawo nga giingon nga ilang nailad.
Nasuta usab nga ang maong organisasyon wala makarehistro sa Security Exchange Commission (SEC) ug wala usab kini permit gikan sa Bureau Internal Revenue (BIR).
Si Claudine Barretto nakig-istorya ni NBI Director Ruel Lasala sa telepono diin ang actrees mihangyo nga dili siya motungha sa buhatan sa NBI tungod kay mabdos siya.
Ang abogado sa magti-ayong Reymart ug Claudine nagdumili sa pagbutyag sa kantidad sa salapi nga na-invest sa duha ngadto sa FrancSwiss ug wala usab ibutyag kung ang magtiayon nakapang-recruit na ba usab kini.
Ang magtiayaon mipasaka na og kaso batok sa financial adviser sa FrancSwiss nga si Eli Castillo kinsa nasikop niadtong Hulyo kwatro didto sa Baguio City.