Malipayon ug masulob-ong balita

Ang Globe na sad ang misuroy namo niadtong Martes, Mayo 22 (hangtod sa pagka Miyerkules, Mayo 23) pinaagi gihapon sa GY Gonzales and Partners, busa nagkita na sad mis Jones Campos, and pangulo sa PR Department of Globe. Ang among destination kon gipadulngan mao ang isla sa Hilutongan og kay mag-overnight man mi tungod kay mag-island hopping pa man pagka ugma sa (Miyerkules), gibutang mi sa Sun and Sand Beach Resort nga kauban sa Cordova Reef, busa, miagi gyod una mi sa Cordova Reef, kay adto mi mosakay sa  yacht nga “Ang Mandaragat” paingon sa Hilutongan Island. Sa pag-abot namo sa sulod sa Cordova Reef, nalipay mi si Roger Serna ug Han Kintanar pagka kita namo sa giilang All around administrator nga way lain kon dili si Nancy Goyangco Cathedral, ang kanhi manager sa Lighthouse Restaurant. Mao ni hinungdan nga kami ra's Roger Serna ug Han Kintanar ang nakita niya kay ang uban namong mga kauban, bag-o pa man, sama nilang Nathalie Tomada, Ryan Mark, Jonas Panero (should I dare say nga  gikalimtan na ni Han Kintanar silas Mickey Feriols ug Erwin Lim, ug sila na ron si Jonas?), Mimi,Ms. Niza M ug uban pa. Hinungdan nga wa kaayo sila ma-excited nga nakakita ni Ms. Nancy.

Pag-abot sad namo sa Sun and Sand Beach Resort, gisugat sad mis nakapalipay nako, pipila ka mga mananagat didto nga nakaila ni Ponso (ang akong ngan sa among salidang "Tres Metros"). Sa pag-abot namo sa front desk, nagpahiyom ang usa ka babaye nga misangpit sa akong ngalan, pero sa pagka ugma na nako siya gika-estorya ug ikaila, si Gigi Tijano kinsa miingon nga nakatan-aw siya sa Jud Morning diin kami si Ryan Mark maoy guest sa maong episode. Gipangutana gani ko ni Gigi, kinsay buot nakong ipasabot sa giistorya nako sa maong guesting, nga usa ka babaye nga nagpasaway sa among programa sa 'Tres Metros' ug giistoryahan gyod nako siya sa tanang nahitabo, nga maoy hinungdan ngano nga ang maong babaye, wa na gyod sa among teleserye. Medyo nadugaydugay gyod ang istoryahanay namo ni Gigi hangtod nasayran nako nga taga Talamban siya, busa nahisgotan nako ang mga paryente nako sa Talamban ug usa niini, dili pa lang dugay namatay, apan, kamatayon nga hilabihan gyod ka masulob-ob, kay didto na man lang, matud pa ni Gigi kono, mamatay sa usa ka taytayan kay wa nay mga paryenteng nagtagad, tungod sa pagka addict na gyod niya sa ginadili nga drugas nga may higayon na gani kono kaniadto,nga mangawat na. Usa ka masulob-ong sugilanon sa usa ka tawo nga dili na gyod makahaw-as sa iyang bisyo,nga angayang hinoktokan sa mga batan-on karon. Gianugonan ko sa maong paryente nako, kay kaniadto, himoon unta siyang artista sa Seiko Films tungod sa iyang talagsaong kaambong ug talento.