Handuraw takes a bow!
Mi-release na gyod og press statement ang tagdumala sa Handuraw Events Café nga mo-"goodbye, hasta la vista" una sila. Mo-babay usa sila sa mga tawo nga nahimong tipik o kabahin sa maong "artists haven". Mga tawo nga nahimo nang "habit" ang pagyampungad sa Handuraw. Kon dili mokanta, kining mga tawhana makita nga maminaw, mapalgan nga modayeg ug madunggan nga mihangop sa lokal nga musika ug kultura.
Hapit motulo ka tuig ang Handuraw sa Mabolo. Kahinumduman nga sa ilang pagpangabli sa tunga-tungang bahin sa 2004, ang na-a sa hunahuna sa tagdumala mao ang pagsilbi og maayong pagkaon sama pananglit sa pizza ngadto sa mga kustomer niini. "We offered great company and a homey ambiance. It was not long before another service was conceived of and acted upon - to support the local band scene," mao kini ang gibuhiang pamahayag ni Zarah Smith, usa ka musikera ug tag-iya sa Handuraw.
Sa dihang na-establisar na ang Handuraw isip "significant venue for gigs and album launchings by independent Bisdak musicmakers, as well as indie filmmakers, Handuraw has tried its best to serve its patrons well, and for the most part, it has enjoyed and reciprocated the support of Cebu's up-and-coming artists from all genres, as well as its well-established ones," apas-sumpay ni Zarah.
Ang Handuraw ("the power to imagine") nagsilbing "jump-off point" alang sa mga local artists nga makab-ot ang ilang mga damgo - madunggan ug matagad ang "loud and proud sound of the Great South" ug ingon man makita ang mga tingog likod sa mga lokal nga komposisyon.
"But, it is with great regret that the time has come for us to say goodbye to our patrons and friends as we have decided to close operations in Mabolo as an events café," pagklaro ni Zarah sa mga mikatap karong hungihong nga manira gyud ang Handuraw.
Nasayran gikan sa mga Smiths nga ang Aboitizland diay ang tag-iya sa Coaco Building nga mao ang kasamtangan nilang nahimotangan. Enero ning tuiga, mipahibalo na ang Aboitizland sa tanang nag-abang sa maong edipisyo nga bakantehon ang maong luna taman karong Hunyo 30 alang sa paghatag og lugar sa katukoran sa usa ka commercial high-rise building.
Nasayran usab nga tungod sa maong ultimatum, nangita ang tagdumala niini og hulip nga lugar nga kabalhinan sa Handuraw. Apan pakyas sila nga makakita og lugar nga mosibo sa ilang primary requirements alang sa katukoran sa events café. Suitable space with reasonable rent and accessibility ang naglangkob sa maong primary requirements. Gawas pa, hilisgutang pinansyal ang nakapakgang nila nga makigsabot sa mga tag-iya sa nakit-an na unta nilang luna tungod kay taas man ang "financial costs" sa pagpadagan og events café susama sa Handuraw, matud pa ni Zarah.
Gusto gyud unta sa Handuraw nga "magsaba-saba" atol sa nahibiling mga adlaw niini isip events café. Gani may giplano man nga Handuraw Music Awards aron ilhon ang mga talento sa best band, best vocalist, best guitarist, etc. "We wanted to close noisily so to speak and had planned a month-long series of events of various types and genres; featuring the many bands that have made Handuraw their haven. With this series of events, Handuraw wanted to say grateful thanks to loyal and hardworking supporters in the local band scene as well as members of media. We wanted to exit as gracefully as we came in," puno ni Zarah.
Pero sa dihang usa ka trahedya ang niulbo niadtong sayong buntag sa Mayo 21, Lunes, nakahukom ang tagdumala nga diha-diha kanselado na ang mga "scheduled events" ug manira gilayon sa ilang pultahan, bisan pa man sa giplanong nahibiling mga pasundayag taman Mayo 31. Duha ka wala hiilhing mga mamumuno ang misulod sa Handuraw sa dihang ang mga staff nanghipos na human sa usa ka album launching sa usa ka banda. Padulong na manira niadto ang Handuraw. Misulod ang duruha, gipangita si Amador "Undo" Tabada, 21, usa ka part-time server sa maong establisamento ug gipusil-patay. Lima ang samad inagian sa bala nga natagamtaman ni Undo sa kamot sa bangis niyang mamumuno. Wala pa'y suspetsado nga naestablisar hangtod ning mga orasa. Gani, wala pa mahibaw-i ang klarong motibo nganong gihunosan si Undo sa iyang bililhong kinabuhi. Padayon pa kuno ang pagpanuki-duki sa mga kapolisan. Apan ang dakong pangutana, ngano man nga ang usa ka bag-ohay lang nakagradwar sa kolehiyo, ug gihulagway nga "devoted brother and son", nahimo mang target niadtong mga tawhana?
"Handuraw is greatly saddened by this senseless travesty of life and condole with the victim's family and friends. It is with this feeling of sadness and disquiet that we have to close earlier than May 31," pagtataw ni Zarah.
Niining puntoha, buot pasalamatan sa Handuraw ang tanan nga nahimo nilang kapamilya, kapuso, kaberkz, katugtogan, ka-jamming, ug ka-rock-rakan sulod sa hapit tulo ka tuig nga panikay-sikay!
"It closes its doors with happy memories and a strong sense of pride and fulfillment that it has, on its own way, helped advance to a certain level of vibrancy the local band scene in Cebu," puno ni Zarah.
Ang iyang pamilya naglaom nga may mga venue pa nga mosunod sa unsa mang lakang nga ilang nasugdan may kalabotan ang pagpalanog sa indie music. Maingon nga duna'y mobanos og bansiwag sa sulo aron dili mapalong ang kalayo ug dili masubhan ang kainit alang sa atong kaugalingong musika ug kultura. "We hope there will be more venues that will take on the cause of promoting Visayan talent and music, and we wish them all the best," nagkanayon ang gi-isyung press statement.
Samtang ang Handuraw Lahug (sa Gorordo Avenue) magpadayon sa iyang operasyon ingon man ang 460 Gaming and Internet Café. May mga plano usab nga mag-abli og dungag nga Handuraw pizza outlets sa umaabot nga mga adlaw. Gikan sa kinatibuk-ang pwersa sa The FREEMAN-Banat News/family ug sa akong pikas pamilya, ang Smash FM, kami magaingon "So long, Handuraw! Hangtod sa sunod nga anib!"
* * *
Rakrakan na sab diha sa Basak karong Hunyo 3, Domingo. Mahitabo ang "Bisrockan sa Ubos Poso" diha sa BUP Basketball Court sa sitio Ubos Poso, Basak, San Nicolas. Usa kini ka kalingawan nga ipahigayon atol sa tinuig nga pangilin sa Sta. Cruz. Gisuportahan kini sa Cyberwheltz Café ug sa maabtik nga presidente sa mga batan-on sa Ubos Poso nga si Glen Tabada ug sa iyang mga opisyales nga silang Regie Conson, Jojo Alburo, Wilborn Torregosa, Jake Enriquez, Marid Ramirez, Jeserie Bede, J. Beck ug Apple Beck, ug Mitzi Ann. Ang concert tickets mapalit sa entrance mismo sa basketan. Tag P25 lang. Magsugod ang konsiyerto human sa prosesyon sa mga sagala atol sa ipahigayong Santacruzan, mga alas-9 sa gabii. Ang mga banda nga manukar mao ang Deadstring, Stonestomp (Samad), Abscond (Agay), Session of the Fighters (Ayaw Padala sa Tama), Phylum (Palagot sa Kontra) ug Assembly Language (Chinita).