Hindi totoo na tinalak-talakan o minura si Pia Guanio ng road manager ni Regine Velasquez nang mag-guest ito sa Showbiz Central noong Linggo.
Kumalat noong Lunes ang balita na tinalakan daw si Pia ng road manager ni Regine dahil nagtanong siya tungkol kay Ogie Alcasid nang umapir sina Regine at Piolo Pascual sa Showbiz Central para i-promote ang kanilang pelikula.
Takang-taka si Pia dahil walang ganoong insidente na nangyari at clueless siya kung sino ang nag-umpisa ng tsismis.
Si Pia, matatalakan mo? Ano ba ang masama sa pagtatanong niya tungkol sa paghahalikan nina Regine at Ogie sa concert nito sa Music Museum eh totoo naman na nagtukaan ang dalawa?
Hindi maganda para kay Regine ang kumakalat na tsismis dahil siya ang nagiging nega at hindi ang kanyang road manager na Maru ang pangalan.
Alam n’yo ba kung ano ang totoo? Tinabig ni Maru ang Startalk reporter na si Gorgy Rula nang subukan nitong interbyuhin si Regine habang papalabas sa studio ng SOP noong Linggo.
Pinagsabihan ko nga si Gorgy kung bakit siya pumayag na tabigin ng road manager ni Regine? Puwede naman siyang pakiusapan na huwag interbyuhin si Regine, bakit kailangan pa na magkaroon ng tabigan portion?
Knowing Gorgy, nagpasensya ito pero kung ako ang tinabig ni Maru, daaay, ihahampas ko sa kanya ang kamera para makita niya ang hinahanap niya! Wala siyang karapatang maging bayolente ‘noh!
Kung nagagawa ni Maru na tabigin ang mga miyembro ng media, puwede rin niyang gawin ‘yon sa ordinaryong fans ni Regine!
* * *
Nasa cloud 9 ang pakiramdam ni Aiai delas Alas dahil pinupuri ng madlang-bayan ang billboard niya para sa Belo Medical Group.
Tuwang-tuwa nga raw pati ang mga anak ni Aiai dahil seksing-seksi sa billboard ang kanilang mother dear.
Si Dra. Vicki Belo ang may kagagawan kaya nagmumura ang sexy body ni Aiai.
August 2006 nang pumayag si Aiai na gawin sa kanya ni Dra. Belo ang Smartlipo procedure at hindi raw siya nagsisi dahil kitang-kita ang ebidensya, lumiit ang kanyang mga braso at puson.
Naranasan na ni Aiai na magpahigop ng taba sa katawan noong 2001 pero traditional liposuction at hindi Smartlipo ang ginawa sa kanya. Mas gusto raw niya ang Smartlipo dahil hindi ito masakit at mas mabilis ang recovery period.
* * *
Birthday kahapon ng Seiko Films produ na si Robbie Tan at happy siya dahil magandang birthday gift ang R13 classification na ibinigay ng MTRCB sa Silip.
Kararating lang ni Robbie mula sa Cannes Film Festival. Ang sey niya, mainit ang naging pagtanggap ng audience sa Foster Child, ang pelikula ng Seiko Films na ipinalabas sa Directors Forthnight.
Hindi pa masabi ni Robbie kung kailan ang playdate sa ating bayang magiliw ng Foster Child na siguradong ipalalabas din sa ibang mga international film festival.
* * *
Nagpainterbyu si Dennis Padilla kay Papa Ricky Lo noong Lunes ng gabi at ipalalabas mamayang gabi sa Ricky Lo Exclusives sa QTV 11 ang kanilang kuwentuhan.
Siyempre, tungkol sa paghihiwalay nila ni Marjorie Barretto ang ikinuwento ni Dennis kay Papa Ricky.
Sinabi kaya ni Dennis ang tunay na dahilan ng paghihiwalay nila ni Marjorie? Nagkaroon kaya siya ng lakas ng loob na sabihin ang pangalan ng mayor na nali-link sa kanyang asawa pero kapwa nila idinenay?
Watch natin mamaya ang Ricky Lo Exclusives para ating malaman ang buong katotohanan mula mismo kay Dennis.