Swarovski explores the “Art of Being”

Gihalad sa Bisrock band “Station Avenue” ang ilang labing ulahing pasundayag - atol sa “Touch Mobile Top 20 Text Ur Vote” concert diha sa ALU-Vimcontu compound – ngadto sa mga kabilin-biling handumanan sa ilang drummer nga mitaliwan na ning kalibotana – si Rafael Gumban, kinsa maoy dako kaayo’g impluwensya sa ilang pagkatukod isip usa ka banda.

Gani, human sa “TM Text Ur Vote” concert niadtong Sabado, Mayo 12, magkagulkol na sab ang Station Avenue sa Pardo Gym karong gabii alang sa usa ka fundraising concert nga nag-ulohan og “Amigo Ta!” (Dodong Gumban) Concert for a Cause. Makauban nila ang Comic Crash Cans, Misplaced, Yield, Birth Control, Kepada, 3Chordschoir, Castle Freak, What’s The Frequency?, Ossified, Jimmycycle, KDB, Indephums, Aggressive Audio, Agadiers, Agipo, Abscond, Session of the Fighters, Phylum ug Assembly Language. Tag P50 ang ticket, mapalit sa gate. Magsugod ang concert alas-7 unyang gabii.

Matud pa ni Rhosie “Ma’m Rose” Abanto, ang nibarog isip manager sa Station Avenue, wala sila’y nakuhang sponsors alang sa maong pasundayag. Wala gani sila’y budget sa pagpaprinta og posters ug wala pa masayod unsaon pagbayad sa sound system. Apan positibo sila nga ang ilang pagabuhaton karong gabii para makatigom og igong pundo nga ikatunol ngadto sa banay’ng Gumban makahakot ra og pagtagad ug pag-abag gikan sa publiko.

“Matawag gyud ni siya’g sugal kay wa mi kahibalo unsaon namo pagbayad ang sounds ug ang venue ug ang uban pang balayranan namo ani. Bahala na ang mga Bisrockers nga mosuporta alang sa kawsa. We rely on them to help us. Total para man ni Dodong Gumban ug sa iyang pamilya. This is non-profit,” panawagan ug pagpasabot ni Ma’m Rose atol sa usa ka pagpakighinabi.

“Ang importante nga pinaagi sa ‘Amigo Ta’ nga usa sa mga kanta sa Station Avenue ug maoy among gigamit nga titulo sa event, magka-bonding ang mga banda. It’s not about the money all the time. Ang importante ang camaraderie nila mapalig-on pa,” sumpay ni Ma’m Rose.

Lumad nga Sugbuanon si Ma’m Rose, taga Lawaan 1 sa dakbayan sa Talisay. Nagtrabaho isip usa ka manager sa usa ka fast food chain diri sa Sugbu. Ang ubang sakop sa Station Avenue nangalagad usab sa maong fast food chain ubos sa iyang pagmando. Gradwado siya sa kursong Bachelor of Science in Elementary Education major in Mathematics sa Cebu Normal University.

Atol usab sa maong pakighinabi, gipangutana ning tagsulat si Ma’m Rose kon masaligon ba siya nga dugokon sa mga tawo ang “Amigo Ta” concert.

“Basta Bisrock humot gyud na. Dali ra man god masabtan ug masakyan ang mga kanta,” niya pa.

Sa pangutana kun unsa pa man ang mga angayang palamboon sa mga banda labi na gyud ang Station Avenue aron dumugon pa sa bagang duot sa mga mahigugmaon sa Bisayang mga kanta, siya nagkanayon nga “dapat pa seguro nga i-improve nila ang quality sa ilang musika. Dapat kamao sila modala sa ilang attitude aron dili mawad-an og mga magdadayeg.”

Sa dihang gisukna siya kon unsa ang labing unang rason kon nganong mibarog siya isip manager sa Station Avenue, siya mitubag, “mostly man gud sa uban nga mo-manage, para makakwarta ang purpose. O madalahig ang ilang ngalan sa pagsikat puhon sa banda. Pero sa akong case, spontaneous lang ang akong pagka-manager sa Station Avenue though sa una pa ko ganahan mag-manage.”

Kaniadto matud pa niya wala pa gyod siya’y kasinatian o nasabtan ni may nasaksihan may kalabotan ang Bisrock. Usa sa sakop sa Station Avenue maoy niimbitar niya para motan-aw og concert. Didto nagsugod ang iyang pagkahilig sa maong matang sa musika.

“At that time, nangita pa sila og mo-manage. Tungod kay nakita man nako ilang potential, nga naa gyud silay talents and skills sa musika maong nisugot ko nga mo-handle nila,” pasabot ni Ma’m Rose.

Lahi  sa ubang managers nga more on monetary ang considerations, si Ma’m Rose mas nihatag og taas nga level sa moral support. “All-out gyud ang akong support. Nice gyud mosuporta ilabi na if naa gyuy talent, sayang man pod ang ilang kahibalo if dili ma-enhance,” niya pa.

Sa isyu sa pamirata og kanta, nagkanayon si Ma’m Rose nga sakit gyud as a manager kon makita niyang ang mugna sa iyang mga “alaga” gipampirata na. “Pero so far, wala pa gyud mi maka-release og album maong wala pay napirata. Lisod gyud sumpoon kay ang magpasiugda og pamirata wala makaila unsa ang tinood nga diwa sa panaghinigalaay ug gusto lang gyud mangwarta nga dawat limpyo ra,” panapos ni Ma’m Rose.